દેશભરમાં મેઘતાંડવનો કહેર: ઉત્તરાખંડમાં પૂર અને ભૂસ્ખલન, હિમાચલમાં રસ્તા બંધ

ઉત્તરાખંડ સહીત દેશભરમાં અનેક રાજ્યોમાં ભારે વરસાદે જનજીવનને ગંભીર અસર પહોંચાડી છે. ઉત્તરાખંડ, હિમાચલ પ્રદેશ અને દિલ્હી સહિત અનેક વિસ્તારોમાં મુશળધાર વરસાદ, ભૂસ્ખલન, પૂર જેવી સ્થિતિ અને ટ્રાફિક જામના કારણે લોકો ભારે મુશ્કેલીનો સામનો કરી રહ્યા છે. હવામાન વિભાગે અનેક વિસ્તારોમાં ભારે વરસાદનું એલર્ટ જાહેર કર્યું છે અને લોકોને બિનજરૂરી મુસાફરી ટાળવાની સલાહ આપી છે.

ઉત્તરાખંડમાં સતત વરસાદથી સ્થિતિ ગંભીર

ઉત્તરાખંડમાં છેલ્લા કેટલાક દિવસોથી સતત પડી રહેલા ભારે વરસાદને કારણે અનેક વિસ્તારોમાં જનજીવન પ્રભાવિત થયું છે. ખાસ કરીને દિલ્હી-યમુનોત્રી નેશનલ હાઇવે પર વરસાદ અને ભૂસ્ખલનને કારણે જોખમ વધી ગયું છે. અનેક સ્થળોએ પહાડોમાંથી પાણીના ધસમસતા પ્રવાહ રસ્તાઓ પર ફરી વળ્યા છે, જેના કારણે વાહનવ્યવહાર ખોરવાયો છે.

ઉત્તરાખંડ હાઇવે પરથી સામે આવેલા દૃશ્યોમાં જોવા મળ્યું કે પહાડ પરથી ધોધમાર પાણી રસ્તા પર આવી જતા આખો માર્ગ નદીમાં ફેરવાઈ ગયો હતો. પાણીનો પ્રવાહ એટલો તેજ હતો કે વાહનોને આગળ વધવું મુશ્કેલ બની ગયું હતું. સ્થાનિક લોકો અને મુસાફરોમાં ભયનો માહોલ જોવા મળ્યો હતો.

ભૂસ્ખલનથી હાઇવે પર વાહનો ફસાયા

ભારે વરસાદને કારણે દિલ્હી-યમુનોત્રી હાઇવે પર અનેક સ્થળોએ ભૂસ્ખલનની ઘટનાઓ નોંધાઈ છે. પહાડનો મોટો ભાગ ધસી પડતા માટી અને પથ્થરો રસ્તા પર આવી ગયા હતા. એક વાહન પણ કાટમાળની ઝપેટમાં આવી ગયું હતું, જોકે સમયસર રાહત મળતાં મોટી જાનહાનિ ટળી હતી.

સ્થાનિકોના જણાવ્યા મુજબ, જો થોડો પણ વધુ સમય થયો હોત તો ગંભીર અકસ્માત સર્જાઈ શક્યો હોત. પ્રશાસન દ્વારા રસ્તો સાફ કરવાની કામગીરી હાથ ધરવામાં આવી છે, પરંતુ સતત વરસાદને કારણે મુશ્કેલીઓ વધી રહી છે.

ગંગા નદી ચેતવણીના નિશાનથી ઉપર

ઋષિકેશમાં પહાડી વિસ્તારોમાં ભારે વરસાદના કારણે ગંગા નદીનું જળસ્તર સતત વધી રહ્યું છે. ગંગા ચેતવણીના નિશાનથી ઉપર વહી રહી છે, જેના કારણે ત્રિવેણી ઘાટનું મુખ્ય આરતી પ્લેટફોર્મ પાણીમાં ગરકાવ થઈ ગયું છે.

પ્રશાસને નદી કિનારાના વિસ્તારોમાં સુરક્ષા વધારી છે. SDRF અને આપત્તિ વ્યવસ્થાપન વિભાગની ટીમોને તૈનાત કરવામાં આવી છે. પ્રવાસીઓને ગંગા કિનારેથી દૂર રહેવાની અપીલ કરવામાં આવી છે અને નીચાણવાળા વિસ્તારોમાં રહેતા લોકોને સુરક્ષિત સ્થળોએ ખસેડવાની પ્રક્રિયા પણ શરૂ કરવામાં આવી છે.

દહેરાદૂનમાં અનેક રસ્તાઓ બંધ

દહેરાદૂનના માલદેવતા વિસ્તારને નજીકના ગામો સાથે જોડતા અનેક માર્ગો ભૂસ્ખલનના કારણે બંધ થઈ ગયા છે. સતત વરસાદને કારણે પહાડોમાંથી માટી અને પથ્થરો ધસી પડતાં વાહનવ્યવહાર સંપૂર્ણપણે ખોરવાઈ ગયો છે. પ્રશાસન રસ્તાઓ ખુલ્લા કરવાની કામગીરીમાં વ્યસ્ત છે.

હિમાચલ પ્રદેશમાં ભૂસ્ખલનની અનેક ઘટનાઓ

હિમાચલ પ્રદેશમાં પણ ભારે વરસાદે કહેર મચાવ્યો છે. શિમલાના રાજીવ ભવન નજીક કાર્ટ રોડ પર થયેલા મોટા ભૂસ્ખલન બાદ બંને તરફનો વાહનવ્યવહાર બંધ થઈ ગયો હતો. લોક નિર્માણ વિભાગ (PWD) દ્વારા કાટમાળ દૂર કરવાની કામગીરી હાથ ધરવામાં આવી છે.

ચંબા જિલ્લાના ઓવડી વિસ્તારમાં પણ ભારે વરસાદને કારણે ભૂસ્ખલન થયું હતું. કાટમાળ નીચે એક જેસીબી મશીન દબાઈ જતાં તેને નુકસાન પહોંચ્યું હતું. કેટલાક વિસ્તારોમાં દ્વિચક્રી વાહનો પણ કાટમાળ નીચે દબાયા હોવાના અહેવાલો સામે આવ્યા છે.

ધસમસતા પાણીમાં બાઇક સવાર તણાયો

દિલ્હી-યમુનોત્રી હાઇવે પર ભારે વરસાદ બાદ આવેલા પાણીના પ્રવાહમાં એક બાઇક સવાર તણાવા લાગ્યો હતો. ઘટનાસ્થળે હાજર સ્થાનિક ગ્રામજનોએ સમયસર મદદ કરી બાઇક સવારને સુરક્ષિત બહાર કાઢ્યો હતો.

જોકે, પાણીનો પ્રવાહ એટલો જોરદાર હતો કે બાઇક પાણીમાં તણાઈને રસ્તા પરથી નીચે ખાઈમાં જઈ પડી હતી. સ્થાનિકોની સતર્કતાના કારણે મોટી દુર્ઘટના ટળી હોવાનું જણાવવામાં આવ્યું છે.

હવામાન વિભાગનું એલર્ટ

હવામાન વિભાગે ઉત્તરાખંડના અનેક પહાડી જિલ્લાઓમાં ઓરેન્જ અને રેડ એલર્ટ જાહેર કર્યું છે. આગામી દિવસોમાં પણ ભારે વરસાદની આગાહી કરવામાં આવી છે. લોકોને નદી-નાળાઓથી દૂર રહેવા, ભૂસ્ખલનની સંભાવના ધરાવતા વિસ્તારોમાં મુસાફરી ટાળવા અને પ્રશાસનની સૂચનાઓનું પાલન કરવાની સલાહ આપવામાં આવી છે.

નિષ્ણાતોના જણાવ્યા અનુસાર સતત વરસાદના કારણે પહાડોની જમીન નબળી પડી જાય છે, જેના કારણે અચાનક ભૂસ્ખલન અને ફ્લેશ ફ્લડ જેવી પરિસ્થિતિ સર્જાઈ શકે છે.

દિલ્હી-NCRમાં જળબંબાકાર

ઉત્તરાખંડ અને હિમાચલ ઉપરાંત દેશની રાજધાની દિલ્હી અને સમગ્ર NCR વિસ્તારમાં પણ ભારે વરસાદ વરસ્યો હતો. અનેક મુખ્ય માર્ગો અને નીચાણવાળા વિસ્તારોમાં પાણી ભરાઈ જતાં ટ્રાફિક પર ગંભીર અસર પડી હતી.

ઓફિસ જતાં કર્મચારીઓ અને સ્કૂલ-કોલેજના વિદ્યાર્થીઓને ભારે મુશ્કેલીનો સામનો કરવો પડ્યો હતો. અનેક સ્થળોએ લાંબા ટ્રાફિક જામના દૃશ્યો જોવા મળ્યા હતા, જ્યારે કેટલીક જગ્યાએ વાહનો પાણીમાં ફસાઈ ગયા હતા.

પ્રશાસનની અપીલ

વિવિધ રાજ્યોના સ્થાનિક પ્રશાસને લોકોને બિનજરૂરી મુસાફરી ટાળવા, વરસાદ દરમિયાન પહાડી વિસ્તારોમાં સાવચેતી રાખવા અને હવામાન વિભાગ દ્વારા જારી કરવામાં આવેલી સૂચનાઓનું પાલન કરવાની અપીલ કરી છે. રાહત અને બચાવ કામગીરી માટે SDRF, NDRF અને સ્થાનિક ટીમોને સતત સતર્ક રાખવામાં આવી છે.

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276