Bindia
અમદાવાદમાં આજે અનેક શાળાઓને બોમ્બની ધમકી ભર્યો ઈ-મેઈલ મળતા અફરાતફરીનો માહોલ સર્જાયો છે. ધમકી મળતાની સાથે જ પોલીસ, બોમ્બ ડિસ્પોઝલ સ્ક્વોડ અને અન્ય સુરક્ષા એજન્સીઓએ તાત્કાલિક ચેકિંગ શરૂ કર્યું છે. પરિસ્થિતિને ધ્યાનમાં રાખી ગાંધીનગર સચિવાલયને પણ એલર્ટ પર મૂકવામાં આવ્યું છે અને સુરક્ષા વ્યવસ્થા કડક કરવામાં આવી છે.
સચિવાલયમાં ચુસ્ત બંદોબસ્ત
દિલ્હી બાદ હવે અમદાવાદમાં પણ શાળાઓને બોમ્બની ધમકી મળતા તંત્ર સાવચેત બન્યું છે. રાજધાની ગાંધીનગરના સચિવાલયમાં સ્ક્વોડ દ્વારા સઘન તપાસ હાથ ધરાઈ છે. સચિવાલયની આસપાસના વિસ્તારોમાં ચેકિંગ વધારાયું છે. સુરક્ષાના ભાગરૂપે બહારના રસ્તાઓ પર ફૂલના કુંડા સહિતની વસ્તુઓ તપાસવામાં આવી રહી છે અને આવન-જાવન કરતા તમામ લોકોની કડક ચકાસણી કરવામાં આવી રહી છે. પાટનગર વિસ્તારમાં ખાનગી વાહનોનું પણ સઘન ચેકિંગ ચાલી રહ્યું છે.
શાળાઓમાં સ્વૈચ્છિક રજા, તપાસ ચાલુ
અમદાવાદ અને ગાંધીનગરની શાળાઓને મળેલી બોમ્બ ધમકી બાદ અનેક શાળાઓએ વિદ્યાર્થીઓની સુરક્ષા માટે સ્વૈચ્છિક રજા જાહેર કરી છે. ચાંદખેડા વિસ્તારની ગ્લોબલ ઈન્ડિયન ઈન્ટરનેશનલ સ્કૂલ તેમજ ગાંધીનગરના અડાલજ ખાતે આવેલી ડિવાઇન સ્કૂલને પણ ધમકી મળ્યાની માહિતી સામે આવી છે. ધમકીના સમાચાર મળતા જ શાળાઓમાં તપાસ શરૂ કરી દેવામાં આવી હતી અને સાવચેતીરૂપે વિદ્યાર્થીઓને બહાર કાઢવાની કાર્યવાહી કરવામાં આવી છે.
અઘટિત ઘટનાનો અહેવાલ નથી
હાલ સુધી કોઈ અઘટિત ઘટનાના સમાચાર નથી. જોકે, વહીવટી તંત્ર દ્વારા ઉચ્ચ સ્તરે તપાસ શરૂ કરી દેવામાં આવી છે. તંત્રએ શાળાઓને વિદ્યાર્થીઓની સુરક્ષા મામલે સંપૂર્ણ તકેદારી રાખવા અપીલ કરી છે. આ દરમિયાન AMC દ્વારા નિયમો ભંગ કરતી પ્રિ-સ્કૂલો સામે કડક કાર્યવાહી કરવામાં આવશે તેવી પણ સૂચના આપવામાં આવી છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
