Bindia
લોકસભામાં આજે કાર્યવાહી શરૂ થતા જ રાજકીય તણાવ જોવા મળ્યો. અધ્યક્ષ પદ પર ફરીથી પરત ફરેલા ઓમ બિરલાના આગમન બાદ જ વિપક્ષી સાંસદોએ વેલમાં આવીને હોબાળો કર્યો. સ્પીકરે સભ્યોને પ્રશ્નકાળ ચાલુ રાખવા માટે અપીલ કરી હતી, પરંતુ વિપક્ષનો વિરોધ યથાવત રહ્યો.
આ દરમિયાન વિપક્ષના નેતા રાહુલ ગાંધીએ દેશમાં LPG સંકટનો મુદ્દો ઉઠાવીને કેન્દ્ર સરકાર પર ગંભીર આરોપ લગાવ્યા. તેમણે ઈરાન સાથે ચાલી રહેલા યુદ્ધ અને હોર્મુઝ સ્ટ્રેટ બંધ થવાની પરિસ્થિતિનો ઉલ્લેખ કરતાં કહ્યું કે તેની અસર ભારત પર પડી રહી છે.
રાહુલ ગાંધીએ કહ્યું કે દેશમાં ખાસ કરીને નાના વેપારીઓ અને શેરી વિક્રેતાઓ LPG સંકટના કારણે મુશ્કેલીમાં મુકાયા છે. તેમણે સવાલ કર્યો કે અમેરિકા ભારતને કેમ કહી રહ્યું છે કે તે કોની પાસેથી તેલ અને ગેસ ખરીદે. “શું આપણે અમેરિકાના કહેવા પર તેલ ખરીદવું જોઈએ? આપણે રશિયા પાસેથી તેલ કેમ ન ખરીદી શકીએ?” એમ તેમણે પૂછ્યું.
રાહુલ ગાંધીના નિવેદન દરમિયાન ટ્રેઝરી બેન્ચમાંથી ભારે હોબાળો થયો. ત્યારબાદ સ્પીકર ઓમ બિરલાએ તેમને રોકતા કહ્યું કે નિયમો મુજબ જ ચર્ચા થવી જોઈએ અને કોઈને પણ નિયમોની બહાર બોલવાની મંજૂરી આપવામાં આવશે નહીં.
આ દરમિયાન સમાજવાદી પાર્ટીના સાંસદ ધર્મેન્દ્ર યાદવને બોલવાની તક આપતા સ્પીકરે પૂછ્યું કે તેઓ કંઈ કહેવા માંગે છે કે નહીં. યાદવે જવાબ આપ્યો કે વિપક્ષના નેતા પોતાની વાત પૂર્ણ કરે ત્યારબાદ તેઓ બોલશે.
બીજી તરફ, પેટ્રોલિયમ અને પ્રાકૃતિક ગેસ મંત્રી હરદીપ સિંહ પુરીએ રાહુલ ગાંધીના આરોપોને નકારી કાઢ્યા. તેમણે લોકસભામાં કહ્યું કે દેશમાં પેટ્રોલ, ડીઝલ અથવા ગેસની કોઈ અછત નથી. ભારત વિવિધ દેશોમાંથી ક્રૂડ ઓઇલ ખરીદી રહ્યું છે અને દેશ પાસે પૂરતું તેલ ઉપલબ્ધ છે.
પુરીએ સ્વીકાર્યું કે હોર્મુઝ સ્ટ્રેટ વિસ્તારમાં તણાવને કારણે તેલની અવરજવર પર થોડો પ્રભાવ પડ્યો છે, પરંતુ ભારતમાં હાલ પુરતું ક્રૂડ ઓઇલ ઉપલબ્ધ છે અને સપ્લાયમાં કોઈ મોટી સમસ્યા નથી.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
