સુરતના કામરેજમાં રેન્જ ફોરેસ્ટ ઓફિસર સોનલ સોલંકી પર ફાયરિંગ, પોલીસે તપાસ શરૂ કરી

સુરત જિલ્લામાં આજે સવારની ગંભીર ઘટના સામે આવી છે. કામરેજ તાલુકાના જોખા ગામ પાસે વાવ ગામની સીમમાં રેન્જ ફોરેસ્ટ ઓફિસર (RFO) સોનલ સોલંકી પર અજાણ્યા વ્યક્તિઓ દ્વારા ફાયરિંગ કરવામાં આવ્યું હોવાનું જાણવા મળ્યું છે.

મળતી માહિતી મુજબ, સોનલ સોલંકી પોતાના બાળકને પ્લે સ્કૂલમાં મૂકવા જતી હતી, એ દરમિયાન આ હુમલો થયો. ગોળીબાર પછી તેમને ગંભીર હાલતમાં હોસ્પિટલમાં ખસેડવામાં આવ્યા છે. હોસ્પિટલ સૂત્રો અનુસાર, તેમની સ્થિતિ ચિંતાજનક છે.

પોલીસ અને ફોરેન્સિક ટીમ તાત્કાલિક સ્થળ પર પહોંચી છે અને તપાસ શરૂ કરી છે. અત્રે ઉલ્લેખનીય છે કે, બે દિવસ પહેલા જ સોનલ સોલંકીએ પોલીસમાં ફરિયાદ નોંધાવી હતી, જેમાં તેમણે પોતાની કારમાં અજાણ્યો GPS ટ્રેકર લગાવાયેલો હોવાની વાત જણાવી હતી.

સૂત્રોના જણાવ્યા અનુસાર, સોનલ સોલંકીનો પતિ આરટીઓ ઇન્સ્પેક્ટર તરીકે ફરજ બજાવે છે અને છેલ્લા કેટલાક સમયથી બંને વચ્ચે અણબનાવ ચાલી રહ્યો હતો. તપાસ એ દિશામાં પણ આગળ વધી રહી છે કે શું આ હુમલો વ્યક્તિગત વિવાદ સાથે જોડાયેલો છે કે પછી કોઈ અન્ય કારણ છે.

હાલ, કામરેજ પોલીસે ઘટનાસ્થળેથી પુરાવા એકત્ર કરી તપાસ શરૂ કરી છે. સુરત જિલ્લા પોલીસ અધિકારીઓ પણ સ્થળ પર પહોંચી ગયા છે અને આ કેસને ગંભીરતાથી લેવામાં આવ્યો છે.

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/buletin_india
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in