T-20 વર્લ્ડ કપ 2026માં પાકિસ્તાન રમશે કે નહીં? પીએમ શાહબાઝ શરીફ સાથે PCB ચીફની બેઠક બાદ સસ્પેન્સ

વર્ષ 2026માં યોજાનારા T-20 ક્રિકેટ વર્લ્ડ કપને લઈને પાકિસ્તાનની ભાગીદારી પર સસ્પેન્સ હજુ યથાવત છે. પાકિસ્તાન ક્રિકેટ બોર્ડ (PCB)એ આ મુદ્દે અંતિમ નિર્ણય સરકાર પર છોડી દેતા ફરી એકવાર અનિશ્ચિતતાનું વાતાવરણ સર્જાયું છે. આ સંદર્ભમાં પીસીબી ચીફ મોહસિન નકવીએ 26 જાન્યુઆરીએ પાકિસ્તાનના વડાપ્રધાન શાહબાઝ શરીફ સાથે મુલાકાત કરી, જેના કારણે ક્રિકેટ જગતમાં ચર્ચા તેજ બની છે.

વડાપ્રધાન સાથેની બેઠક બાદ શું કહ્યું નકવીએ?
વડાપ્રધાન સાથેની બેઠક બાદ મોહસિન નકવીએ સોશિયલ મીડિયા પર જાણકારી આપતા જણાવ્યું કે, “વડાપ્રધાન મિયાં મુહમ્મદ શાહબાઝ શરીફ સાથે સકારાત્મક બેઠક યોજાઈ. મેં તેમને આઈસીસી (ICC) સાથે જોડાયેલા તમામ મુદ્દાઓ અને પરિસ્થિતિની વિગતવાર જાણકારી આપી છે. વડાપ્રધાને તમામ વિકલ્પો ખુલ્લા રાખીને સમસ્યાનો ઉકેલ લાવવા સૂચના આપી છે. આ મામલે અંતિમ નિર્ણય કાં તો શુક્રવારે અથવા આવતા સોમવારે લેવામાં આવશે.”

વિવાદની શરૂઆત ક્યાંથી થઈ?
આ સમગ્ર વિવાદની શરૂઆત ત્યારે થઈ જ્યારે આઈસીસીએ બાંગ્લાદેશની વિનંતી ફગાવી દીધી. બાંગ્લાદેશ પોતાની તમામ મેચો શ્રીલંકામાં રમવા માંગતું હતું, પરંતુ આ પ્રસ્તાવને આઈસીસીએ નકારતા બાંગ્લાદેશે ટૂર્નામેન્ટમાંથી પોતાનું નામ પાછું ખેંચી લીધું. ત્યારબાદ તેમના સ્થાને સ્કોટલેન્ડને ટી-20 વર્લ્ડ કપમાં સામેલ કરવામાં આવ્યું. પાકિસ્તાનને પણ પોતાની મેચો શ્રીલંકામાં રમવાની મંજૂરી આપવામાં આવી છે, છતાં હવે તેઓ ભાગીદારીને લઈને શરતો અને વાંધાઓ ઉઠાવી રહ્યા છે.

ટીમ જાહેર છતાં અનિશ્ચિતતા યથાવત
ગૌરતલબ છે કે 24 જાન્યુઆરીએ મોહસિન નકવીએ સ્પષ્ટ કહ્યું હતું કે જો સરકાર મંજૂરી નહીં આપે તો પાકિસ્તાન વર્લ્ડ કપમાંથી હટી શકે છે. પરંતુ આ નિવેદનના માત્ર એક દિવસ બાદ, 25 જાન્યુઆરીએ PCBએ 15 સભ્યોની ટીમની જાહેરાત પણ કરી દીધી, જેને કારણે સ્થિતિ વધુ ગૂંચવાઈ ગઈ છે. એક તરફ ટીમની જાહેરાત અને બીજી તરફ સરકારના નિર્ણયની રાહ—આ બેવડી સ્થિતિને કારણે આઈસીસી પણ મૂંઝવણમાં મુકાઈ શકે છે.

આખરી નિર્ણય પર સૌની નજર
જો પાકિસ્તાન સરકાર વર્લ્ડ કપ રમવા માટે ઇનકાર કરે છે, તો આઈસીસીએ પાકિસ્તાનના સ્થાને બીજી કોઈ ટીમને તક આપવી પડશે. હવે સમગ્ર ક્રિકેટ જગતની નજર શુક્રવાર અથવા સોમવારે આવનારા પાકિસ્તાન સરકારના અંતિમ નિર્ણય પર ટકેલી છે.

 Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in