Bindia
ગુજરાત ભાજપમાં નવી નિયુક્તિ બાદ સુરત શહેરના પાર્ટી કાર્યાલયમાં ઘમાસાન સર્જાયું છે. ભાજપના બે સક્રિય કાર્યકરો દિનેશ સાવલિયા અને શૈલેષ જરીવાલા વચ્ચે કાર્યાલયના અંદર છૂટા હાથની મારામારી થઈ ગઈ, જેનો વીડિયો હવે સોશિયલ મીડિયામાં વાયરલ થયો છે.
વિવાદની શરૂઆત ચા-નાસ્તાની બાબતે થઈ
પ્રાપ્ત માહિતી અનુસાર, દિનેશ સાવલિયાની પટાવાળાના સાથે થયેલી સામાન્ય બોલચાલમાંથી વિવાદ શરુ થયો હતો. જેમા શૈલેષ જરીવાલા, જે ભાજપ કાર્યાલયના ખજાનચી છે, વચ્ચે પડ્યા બાદ મામૂલી બોલાચાલી શારીરિક ઝપાઝપીમાં ફેરવાઈ ગઈ. શૈલેષે દિનેશને સમજાવતાં કહ્યું હતું કે: “હું ખજાનચી છું, મારે બધું જોવાનું છે,” જે પરિસ્થિતિને વધુ બગાડી ગઈ. બંને વચ્ચે ઘર્ષણ વધતાં લાફા અને ધક્કામુકી સુધીનો મામલો પહોંચી ગયો.
ભાજપનો તરત જવાબ: બંનેને નોટિસ
વીડિયો વાયરલ થતાં શહેર પ્રમુખ પરેશ પટેલે સ્પષ્ટ કર્યું છે કે, “બન્ને કાર્યકરોને પાર્ટીશિસ્તના ભંગ બદલ તાત્કાલિક નોટિસ અપાઈ છે. ત્રણ દિવસમાં લેખિતમાં જવાબ આપવો પડશે. તપાસ પછી યોગ્ય પગલાં લેવાશે.” ભાજપના આંતરિક સૂત્રો અનુસાર, દિનેશ સાવલિયાને લઈને અગાઉથી પણ કાર્યાલયમાં અનેક ફરિયાદો મળી ચુકી છે.
ઘટનાએ પ્રદેશ પ્રમુખની નવી નિયુક્તિ પછી પક્ષમાં ઉથલપાથલ ઉમેરી
આ બનાવ એવા સમયે સામે આવ્યો છે જ્યારે ગુજરાતમાં ભાજપના નવા પ્રદેશ પ્રમુખ તરીકે જગદીશ વિશ્વકર્માની તાજી નિયુક્તિ કરવામાં આવી છે. આવી સ્થિતિમાં, પાર્ટી કાર્યાલયમાં જ આમ છૂટા હાથની મારામારી થવી, પાર્ટીની શિસ્ત અને એકતા પર પ્રશ્નચિન્હ ઉભું કરે છે.
