નેપાળ: સામાન્ય ચૂંટણીઓની તૈયારીઓ તેજ, વડા પ્રધાન સુશીલા કાર્કીએ રાજકીય પક્ષો સાથે બેઠક યોજી

નેપાળમાં આવનારી સામાન્ય ચૂંટણીઓ (General Elections) માટેની તૈયારીઓ હવે ઝડપી ગતિએ આગળ વધી રહી છે. વડા પ્રધાન સુશીલા કાર્કીએ 5 માર્ચે યોજાનાર ચૂંટણી પહેલાં રાજકીય પક્ષો, મુખ્યમંત્રીઓ અને વિવિધ હિતધારકો સાથે બેઠક યોજી છે. વડા પ્રધાનના પ્રેસ કોઓર્ડિનેટર રામ બહાદુર રાવલે જણાવ્યું કે આ બેઠકનો હેતુ સંઘીય અને પ્રાંતીય સરકારો વચ્ચે સંદેશાવ્યવહાર અને સંકલન મજબૂત બનાવવો છે જેથી ચૂંટણી પ્રક્રિયા સુચારુ રીતે પૂર્ણ થઈ શકે.

પ્રથમ મહિલા વડા પ્રધાન તરીકે સુશીલા કાર્કીનું નેતૃત્વ
73 વર્ષીય સુશીલા કાર્કી 12 સપ્ટેમ્બરે નેપાળની પ્રથમ મહિલા વડા પ્રધાન બની હતી. તેમના પૂર્વવર્તી કેપી શર્મા ઓલીને ભ્રષ્ટાચાર અને સોશિયલ મીડિયા પ્રતિબંધ મુદ્દે થયેલા યુવા આંદોલન બાદ પદભ્રષ્ટ કરવામાં આવ્યા હતા. સુશીલા કાર્કી હવે નવા રાજકીય વાતાવરણમાં પારદર્શક અને સર્વસંમતિ આધારિત ચૂંટણી યોજવાનો પ્રયાસ કરી રહી છે.

રાજકીય પક્ષો અને યુવા જૂથો સાથે ચર્ચા
પીએમ કાર્કી છેલ્લા કેટલાક અઠવાડિયાથી વિવિધ રાજકીય પક્ષોના નેતાઓ તેમજ જનરલ-ઝેડ જૂથો સાથે સંવાદ શરૂ કર્યો છે. ગઈકાલે તેમણે નેપાળી કોંગ્રેસ (NC) ના મહાસચિવો ગગન થાપા અને વિશ્વ પ્રકાશ શર્મા સાથે મુલાકાત કરી હતી. બેઠકમાં ચૂંટણી તૈયારીઓ, કાયદો અને વ્યવસ્થાની સ્થિતિ તથા રાજકીય સહકાર અંગે ચર્ચા થઈ હતી. નેપાળી કોંગ્રેસના નેતાઓએ જણાવ્યું કે તેમની પાર્ટી ચૂંટણીમાં ભાગ લેવા પ્રતિબદ્ધ છે અને ટૂંક સમયમાં અન્ય રાજકીય જૂથો સાથે ચર્ચા શરૂ કરશે.

ચૂંટણી માટેની તૈયારી અને સુરક્ષા પર ભાર
પીએમ કાર્કીના સચિવાલયના સૂત્રો મુજબ, બેઠકમાં એક કલાકથી વધુ સમય સુધી ચર્ચા થઈ હતી જેમાં ચૂંટણી પૂર્વ સુરક્ષા, વહીવટી તૈયારીઓ, અને ચૂંટણી આયોગ સાથે સંકલન જેવા મુદ્દાઓ પર ધ્યાન કેન્દ્રિત કરવામાં આવ્યું હતું. 21 ઓક્ટોબરે સુશીલા કાર્કીએ પ્રથમ વખત મુખ્ય રાજકીય પક્ષોના નેતાઓ સાથે બેઠક કરીને ચૂંટણી અને સુરક્ષા મુદ્દાઓ પર સમીક્ષા કરી હતી. તે બેઠકમાં વિસર્જિત પ્રતિનિધિ ગૃહના અનેક નેતાઓ હાજર રહ્યા હતા.

ગૃહ પ્રધાનની અપીલ
નેપાળના ગૃહ પ્રધાન ઓમ પ્રકાશ અર્યલે પણ તાજેતરમાં હિતધારકોને અપીલ કરી છે કે તેઓ શેરી પ્રદર્શનોથી દૂર રહી, કાર્યકારી સરકાર સાથે સંવાદ દ્વારા ચૂંટણી પ્રક્રિયામાં સહયોગ આપે. વડા પ્રધાન કાર્કીએ તમામ રાજકીય પક્ષોને મુક્ત અને ન્યાયી ચૂંટણી માટે સહકાર આપવા અપીલ કરી છે અને જણાવ્યું કે સરકાર દરેક સ્તરે લોકશાહી પ્રક્રિયા મજબૂત બનાવવાના પ્રયત્નો કરી રહી છે.

 

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/buletin_india
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in