મહિલા અને બાળ કલ્યાણ રાજ્ય મંત્રી ડૉ. મનીષાબેન વકીલના હસ્તે ‘મહિલા આર્ટ એન્ડ ક્રાફ્ટ ફેસ્ટિવલ’નો શુભારંભ

મહિલાઓની આર્થિક સદ્ધરતા અને સામાજિક સુરક્ષાને પ્રોત્સાહન આપવાના ઉમદા આશય સાથે, ગુજરાત મહિલા આર્થિક વિકાસ નિગમ લિ. (મહિલા અને બાળ વિકાસ વિભાગ, ગુજરાત રાજ્ય) દ્વારા અમદાવાદના સાબરમતી રિવરફ્રન્ટ ગ્રાઉન્ડ ખાતે ‘મહિલા આર્ટ એન્ડ ક્રાફ્ટ ફેસ્ટિવલ’નું ભવ્ય આયોજન કરવામાં આવ્યું છે. આ પ્રદર્શન-સહ-વેચાણ મેળાનો મહિલા અને બાળ કલ્યાણ રાજ્ય મંત્રી ડૉ. મનીષાબેન વકીલે શુભારંભ કરાવ્યો હતો. મંત્રીએ ઉદ્ઘાટન બાદ વિવિધ સ્ટોલની મુલાકાત લઈને મહિલા કારીગરો દ્વારા તૈયાર કરાયેલ વિવિધ ચીજવસ્તુઓ નિહાળી હતી તથા મહિલા કારીગરોને પ્રોત્સાહિત કર્યા હતા.

‘મહિલા આર્ટ એન્ડ ક્રાફ્ટ ફેસ્ટિવલ’ના શુભારંભ પ્રસંગે મહિલા અને બાળ વિભાગના સચિવ રાકેશ શંકર, ગુજરાત મહિલા આર્થિક વિકાસ નિગમના એમ.ડી. પી. એ.નિનામા, ગુજરાત મહિલા આર્થિક વિકાસ નિગમના જનરલ મેનેજર રીટા પંડ્યા ઉપસ્થિત રહ્યા હતા.

અત્રે ઉલ્લેખનીય છે કે ‘મહિલા આર્ટ એન્ડ ક્રાફ્ટ ફેસ્ટિવલ’નું આયોજન 28 જાન્યુઆરી 2026 થી 03 ફેબ્રુઆરી 2026 દરમિયાન સવારે 11:00 થી રાત્રિના 11:00 કલાક સુધી બ્લોક ડી અને ઇ, સાબરમતી રિવરફ્રન્ટ ગ્રાઉન્ડ, આશ્રમ રોડની પાછળ, અમદાવાદ ખાતે કરવામાં આવ્યું છે. જેમાં રાજ્યભરમાંથી અંદાજે 140 જેટલી મહિલા કારીગરો પોતાના હસ્તકલાના નમૂનાઓ સાથે સહભાગી થઈ છે. આ મેળામાં ‘વોકલ ફોર લોકલ’ના સૂત્રને સાકાર કરતી વિવિધ ચીજવસ્તુઓ જેવી કે હાથશાળ, હસ્તકલા, માટીકામ, મોતીકામ, ચર્મકામ, વાંસકામ, પટોળા, બાંધણી, કચ્છી ભરતકામ, અજરખ બ્લોક પ્રિન્ટ, પેચવર્ક, ટાંગલીયા, મશરૂ, કલમકારી, કાષ્ઠકલા અને ટેરાકોટા જેવી વસ્તુઓનું સીધું વેચાણ કરવામાં આવી રહ્યું છે.

ગુજરાત મહિલા આર્થિક વિકાસ નિગમ દ્વારા મહિલા કારીગરોને સીધું બજાર પૂરું પાડવાના પ્રયાસોના ભાગરૂપે ગત વર્ષે રાજ્યમાં કુલ 16 મેળાઓનું આયોજન કરવામાં આવ્યું હતું, જેમાં ૭૩૯ મહિલા કારીગરોએ ₹354.77 લાખનું વેચાણ કર્યું હતું. ચાલુ વર્ષ 2025-26 માં પણ રાજકોટ, ગાંધીનગર અને મોરબી ખાતે યોજાયેલા મેળાઓમાં 240 મહિલા કારીગરોએ ₹97 લાખનું વેચાણ કરી આર્થિક પગભર થવાની દિશામાં મક્કમ ડગ માંડ્યા છે.

આગામી સમયમાં રાજ્યમાં અન્ય સ્થળોએ પણ આવા પ્રદર્શન મેળાનું આયોજન કરવામાં આવનાર છે. અમદાવાદના શહેરીજનોને આ મેળાની મુલાકાત લઈ, ‘ઘર ઘર સ્વદેશી’ અભિયાનને વેગ આપવા અને મહિલા કારીગરોને પ્રોત્સાહિત કરવા ગુજરાત મહિલા આર્થિક વિકાસ નિગમ દ્વારા નમ્ર અપીલ કરવામાં આવી છે.

 

 Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in