Bindia
તાજેતરમાં બોટાદ જિલ્લાના એક યુવક સાથે IPOમાં રોકાણના લોભમાં બોગસ એપ્લિકેશન મારફતે ₹2.54 લાખની છેતરપિંડી થયાની ઘટના પ્રકાશમાં આવી છે. પોલીસે હરિયાણાના બે આરોપીઓને પકડીને વધુ તપાસ શરૂ કરી છે.
બોગસ એપ ‘Ad-bir capable’ મારફતે છેતરપિંડી
આ બનાવમાં મળતી માહિતી પ્રમાણે, “Ad-bir capable” નામની એપ્લિકેશન દ્વારા બે યુવકો અનિલ જય કિશન રંગા (25) અને ઘનશ્યામ સુમન બહાદુર વર્મા (21)એ બોટાદના એક યુવકને IPOમાં રોકાણ કરવા માટે ઉશ્કેર્યા હતા. યુવકે અને તેના મિત્રે મળીને કુલ ₹1.35 લાખનું રોકાણ કર્યું હતું. આરોપીઓએ બાદમાં નકલી પ્રોફિટ બતાવી ફરિયાદીને ₹10,00,893 મળ્યા છે એવું જણાવ્યું અને વધુ પૈસા ટ્રાન્સફર કરાવ્યા. આખરે આરોપીઓએ કુલ ₹2,54,922ની છેતરપિંડી કરી હતી.
પોલીસે ઝડપ્યા આરોપીઓ
ફરિયાદ મળ્યા બાદ બોટાદ પોલીસે તરત જ તપાસ શરૂ કરી હતી અને ટેક્નિકલ ઈન્ટેલિજન્સના આધારે હરિયાણાથી બંને આરોપીઓને ઝડપી પાડ્યા છે. હાલ આરોપીઓ સામે IPC ની કલમો હેઠળ કેસ નોંધવામાં આવ્યો છે અને વધુ પૂછપરછ ચલાવવામાં આવી રહી છે.
જાગૃત રહો, સુરક્ષિત રહો
પોલીસ અને સાયબર સેલ દ્વારા લોકોને અપીલ કરવામાં આવી છે કે કોઈ પણ અપરિચિત એપ્લિકેશન અથવા લિંક્સ પર ક્લિક કર્યા વગર અને સંપૂર્ણ વિગતો જાણી વિના કોઈ પણ પ્રકારનું ઓનલાઈન રોકાણ ન કરે.
