ભાજપના પ્રવેશ વર્માએ અરવિંદ કેજરીવાલને હરાવ્યા, મનિષ સિસોદીયા પણ હાર્યા

દિલ્હી વિધાનસભા ચૂંટણીમાં આમ આદમી પાર્ટીને મોટો ફટકો પડ્યો છે. એક તરફ, AAP કારમી હાર તરફ આગળ વધી રહી છે. બીજી તરફ, દિલ્હીના પૂર્વ મુખ્યમંત્રી અને AAP કન્વીનર અરવિંદ કેજરીવાલ નવી દિલ્હી બેઠક પરથી ચૂંટણી હારી ગયા છે. ભાજપના ઉમેદવાર પ્રવેશ વર્માએ તેમને હરાવ્યા. જ્યારે કોંગ્રેસના સંદીપ દીક્ષિત ત્રીજા સ્થાને રહ્યા. અરવિંદ કેજરીવાલને 11મા રાઉન્ડનું કાઉન્ટિંગ પુરુ થયા પછી કુલ 22057 મત મળ્યા. જ્યારે પ્રવેશ વર્માને 25 હજારથી વધુ મત મળ્યા. નવી દિલ્હી વિધાનસભા ક્ષેત્રમાં કુલ 13 રાઉન્ડનું કાઉન્ટિંગ થશે. કોંગ્રેસના ઉમેદવાર સંદિપ દિક્ષિતને માત્ર 3873 મત મળ્યા. કાઉન્ટિંગની શરૂઆતથી જ, અરવિંદ કેજરીવાલ પ્રવેશ વર્માથી પાછળ હતા.

-> ભાજપ 47 બેઠકો પર આગળ છે :- તમને જણાવી દઈએ કે દિલ્હી વિધાનસભા ચૂંટણી માટે મત ગણતરી ચાલી રહી છે. હાલમાં, ભાજપ 47 બેઠકો પર આગળ છે, જેમાંથી તેણે ઘણી બેઠકો જીતી લીધી છે. જ્યારે આમ આદમી પાર્ટી 22 બેઠકો પર આગળ છે. આ સાથે, કોંગ્રેસ સતત ત્રીજી વખત પોતાનું ખાતું ખોલાવી શકી નથી.

-> મનીષ સિસોદિયા પણ ચૂંટણી હારી ગયા :- માત્ર અરવિંદ કેજરીવાલ જ નહીં, દિલ્હીના ભૂતપૂર્વ નાયબ મુખ્યમંત્રી અને જંગપુરાથી આમ આદમી પાર્ટીના ઉમેદવાર મનીષ સિસોદિયા પણ ચૂંટણી હારી ગયા છે. દરમિયાન, દિલ્હી સરકારના મંત્રી સૌરભ ભારદ્વાજ ગ્રેટર કૈલાશથી પાછળ છે.

-> સત્યેન્દ્ર જૈન અને અવધ ઓઝા પાછળ :- એટલું જ નહીં, દિલ્હી સરકારમાં મંત્રી રહેલા સત્યેન્દ્ર જૈન પણ શકુર બસ્તીથી પાછળ છે. તે જ સમયે, શિક્ષક અને પટપડગંજથી આમ આદમી પાર્ટીના ઉમેદવાર, અવધ ઓઝા પણ પાછળ છે.

-> આતિશીએ રમેશ બિધુરીને હરાવ્યા :- જોકે, આમ આદમી પાર્ટી માટે રાહતની વાત છે કે દિલ્હીના મુખ્યમંત્રી આતિશી કાલકાજી બેઠક પરથી ચૂંટણી જીતી ગયા છે. આતિશીએ ભાજપના ઉમેદવાર રમેશ બિધુરીને હરાવ્યા. જો આપણે ઓખલા બેઠકની વાત કરીએ તો AAP ઉમેદવાર અમાનતુલ્લાહ ખાન ત્યાં આગળ ચાલી રહ્યા છે.