હવે રશિયા કરશે પરમાણુ પરીક્ષણ: પુતિનનો આદેશ, કહ્યું -“અમેરિકા કરે તો અમે પણ કરીશું”

વિશ્વમાં તણાવ વચ્ચે પરમાણુ સ્પર્ધા ફરી ઉગ્ર બનવાની શક્યતા છે. રશિયાના રાષ્ટ્રપતિ વ્લાદિમીર પુતિને પોતાના સૈન્ય અધિકારીઓને પરમાણુ શસ્ત્રોનું પરીક્ષણ (Nuclear Test) શરૂ કરવા માટે તૈયારી રાખવાનો આદેશ આપ્યો છે. આ નિર્ણય અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ દ્વારા તાજેતરમાં અણુ મિસાઈલ પરીક્ષણ કરવાની જાહેરાત બાદ આવ્યો છે. પુતિને કહ્યું છે કે, જો અમેરિકા અથવા અન્ય કોઈ પરમાણુ શક્તિ ધરાવતું દેશ પરીક્ષણ કરે છે, તો રશિયા પણ “તેના સમકક્ષ જવાબ” આપશે.

“અમેરિકા કરે તો અમે પણ કરીશું” — પુતિન
પુતિને સ્પષ્ટ શબ્દોમાં જણાવ્યું “રશિયા હંમેશા વ્યાપક પરમાણુ પરીક્ષણ પ્રતિબંધ સંધિ (CTBT)નું પાલન કરે છે, પરંતુ જો અન્ય દેશો આ સંધિનું ઉલ્લંઘન કરે છે, તો રશિયા નિષ્ક્રિય નહીં રહે.” તેમણે અમેરિકા દ્વારા કરવામાં આવેલા પગલાને રશિયાની રાષ્ટ્રીય સુરક્ષાને ખતરો ગણાવ્યો અને સૈન્યને તાત્કાલિક પરમાણુ તૈયારી શરૂ કરવાનો આદેશ આપ્યો.

આર્કટિક ક્ષેત્રમાં થઈ શકે છે પરીક્ષણ
રશિયન સંરક્ષણ પ્રધાન આન્દ્રે બેલોસોવે પુતિનને જણાવ્યું કે અમેરિકાએ તાજેતરમાં પોતાની પરમાણુ ક્ષમતામાં વધારો કર્યો છે, તેથી રશિયાએ પૂર્ણ સ્તરના પરમાણુ પરીક્ષણ માટે તૈયારી શરૂ કરવી જરૂરી છે. સૂત્રો મુજબ, રશિયાનું નોવાયા ઝેમલ્યા (Novaya Zemlya) ક્ષેત્ર આર્કટિક વિસ્તારમાં આવેલું જુનું અણુ પરીક્ષણ સ્થળ ટૂંક સમયમાં ફરી કાર્યરત થઈ શકે છે.

રશિયન સુરક્ષા પરિષદને મળ્યો નવો આદેશ
પુતિને વિદેશ મંત્રાલય, સંરક્ષણ મંત્રાલય અને ગુપ્તચર એજન્સીઓને અમેરિકાની યોજનાઓ અંગે માહિતી એકત્રિત કરવા અને તેની આધાર પર પરમાણુ પરીક્ષણ માટેની રણનીતિ તૈયાર કરવાનો આદેશ આપ્યો છે. કહ્યું કે, “ટ્રમ્પના નિવેદનથી આંતરરાષ્ટ્રીય પરિસ્થિતિ ખતરનાક બની છે. રશિયા પોતાના રાષ્ટ્રીય હિતોનું રક્ષણ કરવા સમાન પગલાં લેશે.”

પરમાણુ પરીક્ષણનો ઇતિહાસ
– અમેરિકા: છેલ્લું પરીક્ષણ 1992માં
– ચીન અને ફ્રાન્સ: 1996માં
– સોવિયેત સંઘ: 1990માં
– રશિયા: 1991 પછી કોઈ અણુ પરીક્ષણ કર્યું નથી

જો પુતિનનો આદેશ અમલમાં આવે છે, તો 33 વર્ષ પછી રશિયા ફરીથી પરમાણુ પરીક્ષણ કરશે, જે વૈશ્વિક રાજનીતિ અને સુરક્ષા માટે મોટું પરિવર્તન સાબિત થઈ શકે છે.

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/buletin_india
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in