પાટીલના ઉત્તરાધિકારી કોણ? ગુજરાત પ્રદેશ ભાજપ અધ્યક્ષનું કોકડું ક્યાં ગૂંચવાયું!

ગુજરાત પ્રદેશ ભાજપના અધ્યક્ષની ચર્ચાઓ અચાનક વેગ પકડે છે અને અચાનક ચર્ચાઓ શાંત થઈ જાય છે. ગઈકાલે છ શહેર-જિલ્લા પ્રમુખોના નામની જાહેરાત કરી છે. આ સાથે બીજી તરફ ભાજપના રાષ્ટ્રીય અધ્યક્ષની ચૂંટણી પ્રક્રિયા મુલતવી રાખવામાં આવી છે. આ દરમિયાન ફરી પાટીલના ઉત્તરાધિકારીના નામની ચર્ચાઓ તેજ થઈ છે.

ગુજરાત ભાજપના પ્રદેશ અધ્યક્ષ સી આર પાટીલને ગત લોકસભાની ચૂંટણી બાદ મંત્રીમંડળમાં સ્થાન આપવામાં આવ્યું છે. ત્યારથી ગુજરાતને નવા પ્રદેશ અધ્યક્ષ મળશે તેવી ચર્ચાઓ ચાલી રહી છે. જોકે આ વાતને પણ એક વર્ષ વીતી ચૂક્યું છે. બીજી તરફ ટીલે ઘણા સમય પહેલા જ આ પદ છોડવાની ઇચ્છા વ્યક્ત કરી હતી. ત્યારથી તેમના ઉત્તરાધિકારી વિશે અટકળો ચાલી રહી છે. એક તરફ કેન્દ્રીય નેતૃત્વ હવે પાકિસ્તાન માટે રણનીતિ ઘડવામાં વ્યસ્ત છે. સાથે જ સિંધુ જળ સંધિ અટકાવતાં હવે પાટીલની પણ કેન્દ્રમાં જવાબદારી વધી છે. આ દરમિયાન ગુજરાત ભાજપને મી મહિનાના પ્રથમ પખવાડિયામાં નવા અધ્યક્ષ મળી શકે તેવી ચર્ચાઓ ચાલી રહી છે.

પાટીલના ઉત્તરાધિકારી કોણ ?
ગુજરાત પ્રદેશ ભાજપના અધ્યક્ષ પાટીલનો કાર્યકાળ પૂર્ણ થઈ ચૂક્યો છે. આ સાથે જ ગત લોકસભાની ચૂંટણી બાદ તેમણે કેન્દ્રીય કેબિનેટમાં સ્થાન આપવામાં આવ્યું છે. ત્યારે હવે તેમના ઉત્તરાધિકારીની ચર્ચાઓ તેજ થઈ છે. પરંતુ આ પહેલી વખત નથી કે ઉત્તરાધિકારીની ચર્ચાઑએ વેગ પકડ્યો હોય. અનેક નામોની પણ ચર્ચાઓ થઈ ચૂકી છે. ક્યારેક ક્ષત્રિય નેતાના નામની ચર્ચાઓ તો ક્યારેક OBC ચહેરાની ચર્ચાઑ પણ ચાલી છે. પરંતુ ભાજપ પ્રદેશ ભાજપના ચહેરામાં પણ સરપ્રાઈઝ આપે તો નવાઈ નથી. લોકો નામોની ફક્ત અટકળો જ લાગાવી શકે છે. નિર્ણય તો દિલ્હીથી જ લેવાય તેવી લોકમુખે ચર્ચાઓ છે.

કોકડું ક્યાં ગૂંચવાયું
ગત લોકસભાની ચૂંટણી બાદ તુરંત ચર્ચાઓ ચાલી હતી નવા અધ્યક્ષ માટે પરંતુ ત્યાર બાદ સ્થાનિક સ્વરાજની ચૂંટણીના કારણે અટવાયું તેમ કહેવાય રહ્યું હતું. ત્યાર બાદ કમુરતા બાદની ચર્ચા હતી. હવે વિસાવદર અને કડી બેઠકની ચૂંટણી નવા અધ્યક્ષની રણનીતિ હેઠળ યોજાઇ શકે છે. જોકે આ ફક્ત ચર્ચાઓ જ છે. કારણકે ભાજપના નિર્ણય હમેશા સરપ્રાઈઝ આપતા જ રહ્યા છે. કારણકે સંઘ અને સંગઠન જ બધા સમીકરણો તૈયાર કરી અને નામ નક્કી કરે છે. એક તરફ ભાજપમાં આંતરિક વિખવાદ સતત સામે આવી રહ્યો છે. બીજી તરફ લેટરકાંડ, આયાતી નેતાઓનો વિરોધ સહિતના અનેક પડકારો આવનાર અધ્યક્ષ માટે રહેશે.

ચર્ચાઑ એવી પણ છે કે, અમિત શાહ પોતાના જૂથના વ્યક્તિને પ્રમુખ પદ અપાવવા સક્રિય થયાં છે. તો બીજી આનંદીબેન પટેલ પણ ગુજરાત તરફ પોતાનું ફોકસ વધારી રહ્યા છે. આ સાથે જ પાટીલ ભલે કેન્દ્રમાં મંત્રી હોય પણ પોતાનો દબદબો જાળવી રાખવા રસ લઈ રહ્યા છે. આ સાથે જ હવે દક્ષિણ ગુજરાતના સ્થાને સૌરાષ્ટ્રમાંથી ફરી કોઈ નેતાને કમાન સોંપાઈ તો પણ નવાઈ નથી.

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/buletin_india
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I