Bindia
અમદાવાદમાં આજે ઉજવણીનો માહોલ છે. આજે અમદાવાદ સ્થાપના દિવસ અને મહાશિવરાત્રી પર્વની સાથે નગરદેવી ભદ્રકાળીની નગરયાત્રાનું આયોજન હાથ ધરાયું છે. 614 વર્ષ બાદ ભદ્રકાળી મંદિરથી નગરદેવીની નગરયાત્રા નીકળી છે. નગરદેવીની નગરયાત્રાને લઈને ભક્તોમાં અનેરો આનંદ ઉત્સાહ જોવા મળ્યો છે. મંદિરના મહારાજ, મેયર પ્રતિભા જૈન અને મંત્રી જગદીશ વિશ્વકર્માએ પહિંદ વિધિ કરી રથનું પ્રસ્થાન કરાવ્યું છે.
નગરદેવી ભદ્રકાળી માતા નગરયાત્રામાં મોટી સંખ્યામાં માઈભક્તો ઊમટ્યા છે. અમદાવાદ શહેર પોલીસ દ્વારા માતાજીને ગાર્ડ ઓફ ઓનર આપી ઢોલ, નગારા, શરણાઈ, ધજા અને ખુલ્લી જીપ અને વાહનો સાથે નગરજનો રથ લઈ આગળ વધી રહ્યાં છે. નગરયાત્રામાં અનેક અખાડાઓ પણ જોડાયા છે. નગરયાત્રા ત્રણ દરવાજા પાસે પહોંચતા જ ભાજપના કોર્પોરેટર પંકજ ભટ્ટ દ્વારા આરતી ઉતારવામાં આવી, આ સાથે જ મુસ્લિમ સમુદાય દ્વારા રથનું સ્વાગત પણ કરવામાં આવ્યું હતું.
-> વર્ષો જૂની પરંપરાની પુનઃશરૂ કરાઈ :- અમદાવાદમાં વર્ષો જૂની પરંપરાની ફરીથી આજથી શરૂ કરવામાં આવી છે. આપણા વડીલો કહેતા હતા કે પહેલા ભદ્રકાળી મંદિરની નગરયાત્રા નીકળતી હતી. અને હવે વડીલોની માન્યતાને માન આપતા શહેરમાં 614 વર્ષ બાદ નગરદેવી ભદ્રકાળીની નગરયાત્રાનું આયોજન કરવામાં આવ્યું છે. ભદ્રકાળી મંદિર અમદાવાદના ઇતિહાસમાં વિશેષ સ્થાન ધરાવે છે. બીજા શબ્દોમાં કહીએ તો અમદાવાદની આગવી ઓળખ અને પહેલુ મંદિર એટલે નગરદેવી ભદ્રકાળીનું મંદિર. અહેમદશાહે પોતાના શાસનકાળ દરમિયાન ભદ્રકાળી મંદિરની નગરયાત્રા પર રોક લગાવી હતી.એક માન્યતા મુજબ માતા ભદ્રકાળીના આર્શીવાદ થકી જ અમદાવાદ વધુ સમૃદ્ધ બન્યું છે.
