બંગાળની સ્કૂલોમાં ‘વંદે માતરમ’ ફરજિયાત: દેશભક્તિ વધારવા સરકારનો મોટો નિર્ણય

પશ્ચિમ બંગાળ સરકારે રાજ્યની શૈક્ષણિક વ્યવસ્થામાં દેશભક્તિની ભાવના મજબૂત બનાવવા માટે મહત્વપૂર્ણ નિર્ણય લીધો છે. મુખ્યમંત્રી શુભેન્દુ અધિકારીએ જાહેરાત કરી છે કે હવેથી રાજ્યની તમામ સરકારી અને ગ્રાન્ટેડ સ્કૂલોમાં સવારની પ્રાર્થના સભા દરમિયાન ‘વંદે માતરમ’ ગાવું ફરજિયાત રહેશે. શિક્ષણ વિભાગ દ્વારા બહાર પાડવામાં આવેલા પરિપત્ર મુજબ આ નિયમ તાત્કાલિક અસરથી અમલમાં મુકવામાં આવ્યો છે.

મુખ્યમંત્રી શુભેન્દુ અધિકારીએ સોશિયલ મીડિયા પ્લેટફોર્મ X પર માહિતી આપતાં જણાવ્યું હતું કે આગામી સોમવારથી રાજ્યની દરેક સ્કૂલમાં આ નિયમ અમલમાં આવશે. સરકારના આદેશ અનુસાર સ્કૂલોએ સવારની પ્રાર્થનાનું વીડિયો રેકોર્ડિંગ રાખવું ફરજિયાત રહેશે, જેથી નિયમનું પાલન થઈ રહ્યું છે કે નહીં તેની ચકાસણી થઈ શકે. શિક્ષણ વિભાગના અધિકારીઓ ગમે ત્યારે સ્કૂલની મુલાકાત લઈને નિરીક્ષણ કરી શકશે અને નિયમનો ભંગ કરતી સંસ્થાઓ સામે વહીવટી કાર્યવાહી પણ કરવામાં આવશે.

ઉલ્લેખનીય છે કે પશ્ચિમ બંગાળની સ્કૂલોમાં અત્યાર સુધી મુખ્યત્વે રાષ્ટ્રગીત ‘જન ગણ મન’ ગવાતું હતું. અગાઉની સરકાર દરમિયાન ‘બાંગલાર માટી બાંગલાર જલ’ને રાજ્ય ગીત તરીકે મહત્વ આપવામાં આવ્યું હતું. હવે બંકિમચંદ્ર ચટ્ટોપાધ્યાય દ્વારા રચાયેલ ‘વંદે માતરમ’ને સત્તાવાર રીતે પ્રાર્થના સભામાં સ્થાન મળતાં તેને સાંસ્કૃતિક અને રાષ્ટ્રીય પુનર્જાગરણ સાથે જોડીને જોવામાં આવી રહ્યું છે.

સરકારના આ નિર્ણયને લઈને શિક્ષણ ક્ષેત્રમાં મિશ્ર પ્રતિક્રિયા જોવા મળી રહી છે. કેટલીક સ્કૂલોએ આ પગલાને દેશપ્રેમ અને સંસ્કૃતિ સાથે જોડાયેલ સકારાત્મક પહેલ ગણાવી છે, જ્યારે કેટલાક શિક્ષક સંગઠનો અને ડાબેરી વિચારધારા ધરાવતા પ્રતિનિધિઓએ વ્યવહારુ પ્રશ્નો ઉઠાવ્યા છે. તેઓનું કહેવું છે કે સવારની પ્રાર્થનાનો સમય મર્યાદિત હોય છે અને તેમાં રાષ્ટ્રગીત, રાજ્ય ગીત તથા હવે ‘વંદે માતરમ’ને કયા ક્રમમાં સામેલ કરાશે તે અંગે વધુ સ્પષ્ટતા જરૂરી છે.

પશ્ચિમ બંગાળ સરકારનું માનવું છે કે ‘વંદે માતરમ’ માત્ર એક ગીત નહીં પરંતુ ભારતના સ્વતંત્રતા સંગ્રામની પ્રેરણાદાયી ઓળખ છે. નવી પેઢીને દેશના ઇતિહાસ અને સાંસ્કૃતિક વારસાની નજીક લાવવા માટે આ નિર્ણય મહત્વપૂર્ણ સાબિત થશે.