Bindia
બ્રિટનની રાજનીતિમાં હાલ ભારે ગરમાવો જોવા મળી રહ્યો છે. વડાપ્રધાન કીર સ્ટાર્મરની સરકારમાં સ્વાસ્થ્ય મંત્રી વેસ સ્ટ્રીટિંગે કેબિનેટમાંથી રાજીનામું આપતા રાજકીય વર્તુળોમાં ખળભળાટ મચી ગયો છે. આ રાજીનામાને સ્ટાર્મરના નેતૃત્વ સામે પાર્ટીની અંદર વધતા અસંતોષના મોટા સંકેત તરીકે જોવામાં આવી રહ્યું છે.
વેસ સ્ટ્રીટિંગ સ્ટાર્મર કેબિનેટમાંથી રાજીનામું આપનાર પ્રથમ મંત્રી બન્યા છે. તાજેતરમાં યોજાયેલી સ્થાનિક અને પ્રાદેશિક ચૂંટણીઓમાં લેબર પાર્ટીના નબળા પ્રદર્શન બાદ સરકાર પર દબાણ સતત વધી રહ્યું હતું. પરિણામે પાર્ટીની અંદર નેતૃત્વ અને ભવિષ્યની દિશાને લઈને ચર્ચાઓ તેજ બની છે.
રાજકીય સૂત્રોના જણાવ્યા મુજબ વેસ સ્ટ્રીટિંગે લેબર પાર્ટીના અનેક સાંસદોનું સમર્થન મેળવવાનું શરૂ કર્યું છે અને તેઓ ટૂંક સમયમાં પાર્ટી નેતૃત્વ માટે દાવેદારી પણ રજૂ કરી શકે છે. પાર્ટીના નિયમો મુજબ નેતૃત્વ માટે પડકાર આપવા આશરે 81 સાંસદોના સમર્થનની જરૂર પડે છે અને કેટલાક અહેવાલો મુજબ આ સંખ્યા સુધી પહોંચવાના દાવાઓ પણ થઈ રહ્યા છે.
આ વચ્ચે પૂર્વ નાયબ વડાપ્રધાન એન્ગેલા રેનરે સંકેત આપ્યો છે કે જો નેતૃત્વ ચૂંટણી યોજાય તો તેઓ પણ સક્રિય ભૂમિકા ભજવી શકે છે. તેમણે જણાવ્યું કે તાજેતરના ચૂંટણી પરિણામોએ સ્પષ્ટ કર્યું છે કે જનતા સરકારથી અસંતુષ્ટ છે અને બદલાવ ઈચ્છે છે.
બીજી તરફ વડાપ્રધાન કીર સ્ટાર્મરે રાજીનામું આપવાનો ઈનકાર કર્યો છે. તેમનું કહેવું છે કે હાલ નેતૃત્વ સંઘર્ષ દેશમાં રાજકીય અસ્થિરતા વધારી શકે છે. આ સમગ્ર ઘટનાક્રમને કારણે બ્રિટનની રાજનીતિમાં આગામી દિવસોમાં વધુ ઉથલપાથલ જોવા મળી શકે છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
