Bindia
સંયુક્ત રાષ્ટ્ર સુરક્ષા પરિષદ (UNSC)ની બેઠક દરમિયાન ઈરાનના પરમાણુ કાર્યક્રમ મુદ્દે અમેરિકા અને તેના સહયોગી દેશો સામે રશિયા અને ચીને ખુલ્લેઆમ સમર્થન આપતા તીવ્ર ચર્ચા સર્જાઈ હતી. બેઠક દરમિયાન અમેરિકા દ્વારા ઈરાન વિરુદ્ધ લેવાયેલા પગલાંને યોગ્ય ઠેરવવાનો પ્રયાસ કરવામાં આવ્યો હતો.
અમેરિકાએ દલીલ કરી હતી કે મધ્ય પૂર્વમાં શાંતિ અને સુરક્ષા જાળવવા માટે ઈરાનને પરમાણુ હથિયાર બનાવતા રોકવું જરૂરી છે. અમેરિકા મુજબ આ જ કારણોસર ઈરાન સામે સૈન્ય કાર્યવાહી કરવામાં આવી રહી છે.
બેઠક દરમિયાન ઈરાન પરના પ્રતિબંધોની દેખરેખ રાખતી ‘1737 કમિટી’ અંગે ચર્ચા અટકાવવા માટે રશિયા અને ચીને પ્રયાસ કર્યો હતો. જોકે મતદાન દરમિયાન તેઓ સફળ રહ્યા નહોતા. સુરક્ષા પરિષદના 15 સભ્યોમાંથી 11 દેશોએ ચર્ચા ચાલુ રાખવાની તરફેણમાં મત આપ્યો હતો, જ્યારે રશિયા અને ચીને તેનો વિરોધ કર્યો હતો.
અમેરિકાના પ્રતિનિધિ માઈક વોલ્ટ્ઝે આક્ષેપ કર્યો કે રશિયા અને ચીન ઈરાનને બચાવવાનો પ્રયાસ કરી રહ્યા છે. તેમણે તમામ સભ્ય દેશોને ઈરાન પર હથિયાર પ્રતિબંધ લાદવા અને મિસાઇલ ટેક્નોલોજીના વેપાર પર કડક નિયંત્રણ લાદવાની અપીલ કરી હતી.
બીજી તરફ રશિયા અને ચીને અમેરિકાના વલણની કડક ટીકા કરી હતી. રશિયાના રાજદૂત વાસિલી નેબેન્ઝિયાએ કહ્યું કે અમેરિકા બિનજરૂરી રીતે ભયનો માહોલ ઊભો કરી રહ્યું છે. તેમના અનુસાર આંતરરાષ્ટ્રીય પરમાણુ એજન્સીના અહેવાલોમાં ઈરાન પરમાણુ હથિયાર બનાવી રહ્યું હોવાના કોઈ સ્પષ્ટ પુરાવા મળ્યા નથી.
ચીનના પ્રતિનિધિ ફૂ કાંગે પણ અમેરિકાની નીતિ પર સવાલ ઉઠાવતા કહ્યું કે સૈન્ય બળનો ઉપયોગ કરવાથી શાંતિ માટેની વાતચીતના પ્રયાસો કમજોર બન્યા છે. આ દરમિયાન અમેરિકાના પૂર્વ પ્રમુખ ડોનાલ્ડ ટ્રમ્પે ફરી એકવાર કહ્યું કે જો ઈરાન પરમાણુ હથિયાર બનાવવા સફળ થશે તો તે માત્ર મધ્ય પૂર્વ નહીં પરંતુ સમગ્ર વિશ્વની સુરક્ષા માટે ગંભીર ખતરો બની શકે છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
