Bindia
મધ્ય પૂર્વમાં ચાલી રહેલા યુદ્ધના પ્રભાવ હવે પાકિસ્તાન સુધી પહોંચ્યા છે. વધતા તેલ સંકટ વચ્ચે પાકિસ્તાનના વડા પ્રધાન શહબાઝ શરીફે દેશને સંબોધતા કડક બચત પગલાં જાહેર કર્યા છે. સરકારે ઇંધણ વપરાશ ઘટાડવા અને ઊર્જા સંકટનો સામનો કરવા માટે અનેક મહત્વપૂર્ણ નિર્ણય લીધા છે.
અઠવાડિયામાં માત્ર ચાર દિવસ ઓફિસ
સરકારના નવા નિર્ણય મુજબ હવે સરકારી કચેરીઓ અઠવાડિયામાં માત્ર ચાર દિવસ જ ખુલ્લી રહેશે. સાથે જ લગભગ 50 ટકા કર્મચારીઓ ઘરેથી કામ કરશે. જોકે આ નિર્ણય બેંકો પર લાગુ નહીં પડે. ઉપરાંત શાળાઓમાં બે દિવસની વધારાની રજાઓ પણ જાહેર કરવામાં આવી છે.
તેલ સંકટ પાછળ મધ્ય પૂર્વનું યુદ્ધ
વડા પ્રધાન શહબાઝ શરીફે જણાવ્યું કે અમેરિકા, ઈઝરાયલ અને ઈરાન વચ્ચે ચાલી રહેલા યુદ્ધને કારણે વૈશ્વિક બજારમાં ક્રૂડ ઓઇલની કિંમતોમાં ભારે વધારો થયો છે. ક્રૂડ ઓઇલની કિંમત લગભગ 60 ડોલરથી વધીને 100 ડોલર પ્રતિ બેરલ સુધી પહોંચી ગઈ છે. પાકિસ્તાન મોટાભાગનું તેલ અને ગેસ ખાડી દેશોમાંથી આયાત કરે છે, તેથી આ પરિસ્થિતિનો દેશ પર સીધો અસર થયો છે.
સરકારી ખર્ચમાં કડક કાપ
સરકારે ઊર્જા બચાવવા માટે અનેક કડક નિર્ણયો લીધા છે. આગામી બે મહિના સુધી સરકારી વિભાગો દ્વારા ઉપયોગમાં લેવાતા વાહનો માટે ઇંધણ ફાળવણીમાં 50 ટકા ઘટાડો કરવામાં આવશે. ઉપરાંત લગભગ 60 ટકા સરકારી વાહનો બે મહિના સુધી રસ્તાઓ પરથી દૂર રાખવામાં આવશે.
મંત્રીઓનો પગાર બંધ, સાંસદોના પગારમાં કાપ
ખર્ચ ઘટાડવા માટે સરકારે મંત્રીઓ, સલાહકારો અને ખાસ સહાયકોનો પગાર આગામી બે મહિના માટે બંધ કરવાનો નિર્ણય કર્યો છે. સાથે જ સંસદ સભ્યોના પગારમાં 25 ટકા કાપ મૂકવામાં આવશે.
ઇફ્તાર પાર્ટી અને વિદેશ પ્રવાસ પર પ્રતિબંધ
સરકારે સત્તાવાર ડિનર અને ઇફ્તાર પાર્ટીઓ પર સંપૂર્ણ પ્રતિબંધ લગાવ્યો છે. ઉપરાંત મંત્રીઓ અને સરકારી અધિકારીઓના વિદેશ પ્રવાસ પર પણ રોક લગાવવામાં આવી છે. ખર્ચ ઘટાડવા માટે સેમિનાર અને સત્તાવાર કાર્યક્રમો હવે માત્ર સરકારી સ્થળોએ જ યોજાશે.
સરકારનું કહેવું છે કે આ તમામ નિર્ણયો ઊર્જા સંકટને નિયંત્રિત કરવા અને દેશની આર્થિક સ્થિતિને સ્થિર રાખવા માટે લેવામાં આવ્યા છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
