દિલ્હી: વઝીરપુરની વાસણ ફેક્ટરીમાં લાગી ભીષણ આગ, શોર્ટ સર્કિટની આશંકા

શનિવારે સાંજે ઉત્તર પશ્ચિમ દિલ્હીના વઝીરપુર ઔદ્યોગિક વિસ્તારમાં આવેલી એક વાસણ બનાવતી ફેક્ટરીમાં ભીષણ આગ લાગી હતી. આગ એટલી વિકરાળ હતી કે થોડા જ મિનિટોમાં આખી ફેક્ટરી જ્વાળાઓની ઝપેટમાં આવી ગઈ. આગની જાણ થતાં જ ફાયર વિભાગની 9 ગાડીઓ ઘટના સ્થળે પહોંચી ગઈ હતી. આગ બુઝાવવાના પ્રયાસો હાલ પણ ચાલુ છે. સ્થાનિક પોલીસ, આપત્તિ નિવારણ દળ અને રેસ્ક્યુ ટીમો પણ ઘટનાસ્થળે હાજર છે.

મળતી માહિતી મુજબ, આ ફેક્ટરીમાં સ્ટીલ અને એલ્યુમિનિયમના વાસણો બનાવવામાં આવતા હતા. ફેક્ટરીની અંદર રહેલા જ્વલનશીલ પદાર્થો અને મશીનરીને કારણે આગ ઝડપથી ફેલાઈ ગઈ હતી.

પ્રત્યક્ષદર્શીઓએ જણાવ્યું કે “ફેક્ટરીમાંથી ઉઠતા ધુમાડાના ઘેરા ગોટેગોટા દૂરથી પણ દેખાતા હતા.” ફાયર વિભાગના અધિકારીઓએ જણાવ્યું કે ફેક્ટરીની છતનો એક ભાગ તૂટી પડ્યો છે, જેના કારણે બચાવકાર્ય વધુ જોખમભર્યું બન્યું છે.

પોલીસે આસપાસનો વિસ્તાર ખાલી કરાવી દીધો છે અને ટ્રાફિક પણ તાત્કાલિક ડાયવર્ટ કરવામાં આવ્યો છે. સદભાગ્યે અત્યાર સુધી કોઈ જાનહાનીના અહેવાલ નથી.

ફાયર વિભાગના પ્રાથમિક તારણ મુજબ, શોર્ટ સર્કિટ આગનું સંભવિત કારણ હોવાનું મનાય છે. હાલમાં કૂલિંગ કામગીરી ચાલુ છે અને આગને સંપૂર્ણપણે કાબૂમાં લેવા માટે વધુ ગાડીઓ તૈનાત કરવામાં આવી છે. અધિકારીઓએ નાગરિકોને અપીલ કરી છે કે તેઓ આ વિસ્તારમાં ભીડ ન કરે અને ફાયર વિભાગના કામમાં અવરોધ ન ઉભો કરે.

 

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/buletin_india
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in