અમેરિકાના હુમલા બાદ ઈરાનમાં અફરાતફરી, કેન્સર હોસ્પિટલમાંથી 211 બાળકોને ખસેડાયા

મિડલ ઈસ્ટમાં તણાવ વધુ ઉગ્ર બન્યો છે. અમેરિકાએ ઈરાનના અનેક સૈન્ય ઠેકાણાઓ પર હવાઈ હુમલા કર્યા હોવાના અહેવાલો વચ્ચે ઈરાનમાં ભારે અફરાતફરીનો માહોલ સર્જાયો છે. ઈરાનના અધિકારીઓના જણાવ્યા મુજબ, હુમલાની અસરથી અહવાઝ અને અન્ય વિસ્તારોમાં આવેલી આરોગ્ય સેવાઓ પણ પ્રભાવિત થઈ હતી.

ઈરાનના સરકારી મીડિયા અનુસાર, અહવાઝ સ્થિત કેન્સર હોસ્પિટલ નજીક થયેલા હુમલાઓ બાદ હોસ્પિટલને તાત્કાલિક ખાલી કરાવવામાં આવી હતી. હોસ્પિટલમાં સારવાર લઈ રહેલા 211 દર્દીઓને સુરક્ષિત સ્થળે ખસેડવામાં આવ્યા હતા. હુમલા દરમિયાન કીમોથેરાપી લઈ રહેલા બાળકો અને તેમના પરિવારજનોમાં ગભરાટ ફેલાયો હતો. અમેરિકી સેન્ટ્રલ કમાન્ડ (CENTCOM) એ જણાવ્યું કે, હોર્મુઝની સામુદ્રધુનીમાં ઈરાનની સૈન્ય ક્ષમતાને નબળી પાડવાના હેતુથી બંદર અબ્બાસ સહિતના અનેક સૈન્ય ઠેકાણાઓને નિશાન બનાવવામાં આવ્યા હતા.

કુવૈતનો ઈરાની ડ્રોન હુમલાનો દાવો
કુવૈતની સેનાએ દાવો કર્યો છે કે ઈરાન તરફથી ડ્રોન હુમલો કરવામાં આવ્યો હતો, જેના જવાબમાં દેશની એર ડિફેન્સ સિસ્ટમ સક્રિય કરી દેવામાં આવી છે. સૈન્યના જણાવ્યા મુજબ, અનેક ડ્રોનને નિષ્ક્રિય કરવાની કાર્યવાહી હાથ ધરવામાં આવી છે. AFPના અહેવાલ મુજબ, કુવૈત સિટી નજીક વિસ્ફોટોના અવાજો પણ સાંભળવામાં આવ્યા હતા. જોકે, નુકસાન કે જાનહાનિ અંગે સત્તાવાર માહિતી જાહેર કરવામાં આવી નથી.

ઈરાનની ચેતવણી
ઈરાને અમેરિકાને ચેતવણી આપતાં જણાવ્યું છે કે જો દેશના પાવર પ્લાન્ટ, પુલ અને અન્ય મહત્વપૂર્ણ ઈન્ફ્રાસ્ટ્રક્ચર પર હુમલા ચાલુ રહેશે તો સમગ્ર વિસ્તારમાં અમેરિકાના સહયોગી દેશોના મહત્વના માળખાને નિશાન બનાવવામાં આવશે. આ પહેલા પણ ઈરાનના રિવોલ્યુશનરી ગાર્ડ્સે જોર્ડનમાં આવેલા અમેરિકી એર બેઝ પર બેલિસ્ટિક મિસાઈલ હુમલાનો દાવો કર્યો હતો, જેને તેમણે અમેરિકી હુમલાના જવાબ તરીકે વર્ણવ્યો હતો.

ઈરાનનો અમેરિકી હુમલાની નિંદા
ઈરાનના વિદેશ મંત્રાલયના પ્રવક્તા ઈસ્માઈલ બકાઈએ હોસ્પિટલ નજીક થયેલા હુમલાની કડક નિંદા કરી છે. તેમણે આ ઘટનાને “બર્બર” અને “યુદ્ધ અપરાધ” ગણાવી પશ્ચિમી દેશો પર માનવાધિકારના મુદ્દે દ્વિધારી વલણ અપનાવવાનો આરોપ મૂક્યો હતો. તેમણે જણાવ્યું કે હોસ્પિટલમાંથી દર્દીઓને તાત્કાલિક ખસેડવાના કારણે ગંભીર દર્દીઓની સારવાર પર અસર પડી હતી અને અનેક બાળકોની કીમોથેરાપી વચ્ચે જ અટકાવવી પડી હતી.

સમગ્ર મિડલ ઈસ્ટમાં વધ્યો તણાવ
ઈરાનની સરકારી સમાચાર એજન્સી IRNA મુજબ, દેશના અનેક વિસ્તારોમાં વિસ્ફોટોના અહેવાલ મળ્યા છે અને કેટલીક જગ્યાએ એર ડિફેન્સ સિસ્ટમ સક્રિય કરવામાં આવી છે. બીજી તરફ, બહેરીનમાં પણ એર રેડ સાયરન વાગ્યા હોવાના અહેવાલો સામે આવ્યા છે. મિડલ ઈસ્ટમાં વધતા હુમલા અને પ્રતિહુમલાઓને કારણે સમગ્ર વિસ્તારમાં સુરક્ષા અંગે ચિંતા વધી રહી છે અને પરિસ્થિતિ સતત બદલાઈ રહી છે.