Bindia
અમદાવાદના પોશ વિસ્તાર શિલજમાં દારૂ પાર્ટીની મોજમસ્તી વચ્ચે પોલીસે દરોડા પાડી 20 વિદેશી નાગરિકો અને 2 ભારતીયોને ઝડપ્યા છે.
આ પાર્ટી દરમિયાન દારૂ, હુક્કા સહિતનો મુદ્દામાલ મળી આવ્યો હતો. આ રેવ પાર્ટી ઝેફાયર ફાર્મ હાઉસ ખાતે યોજાઈ હતી, જ્યાંથી પોલીસે 6 મહિલાઓ સહિત કુલ 15થી વધુ લોકોની અટકાયત કરી છે.
ઝેફાયર ફાર્મ હાઉસ પર બોપલ પોલીસે પાડ્યો દરોડો
મોડી રાત્રે મળેલી બાતમીના આધારે બોપલ પોલીસે શિલજના ઝેફાયર ફાર્મ પર દરોડો પાડ્યો હતો. ફાર્મ હાઉસના માલિક મિલન પટેલની ધરપકડ કરવામાં આવી છે. પોલીસે ત્યાંથી અનેક દારૂની બોટલો, બીયરના ટીન અને હુક્કા સેટ્સ કબ્જે કર્યા છે. આ પાર્ટીમાં હાજર વિદેશી વિદ્યાર્થીઓમાં કેન્યા અને મોંગોલિયાના નાગરિકો હોવાનું સામે આવ્યું છે.
‘આફ્રો ડાન્સ નાઈટ’ રેવ પાર્ટી
ઝડપાયેલા વિદ્યાર્થીઓએ ‘આફ્રો ડાન્સ નાઈટ’ નામે આ દારૂ પાર્ટી યોજી હતી. પાર્ટીમાં પ્રવેશ માટે ખાસ પાસ છપાવ્યા હતા, જેમાં દારૂ અનલિમિટેડ પી શકાય એવો ઉલ્લેખ હતો.
પાસની કિંમત નીચે મુજબ હતી:
– અર્લી બર્ડ પાસ: ₹700
– VIP પાસ: ₹2500
– ડાયમંડ ટેબલ (5 લોકો માટે): ₹15,000 — જેમાં 1 બ્લેક લેબલ બોટલ અને 1 મેટલ શામેલ
પોલીસની કાર્યવાહી અને તપાસ
બોપલ પોલીસે ઝડપાયેલા તમામ લોકોને મેડિકલ ટેસ્ટ માટે મોકલ્યા છે. જેઓ દારૂના નશામાં નહોતા, તેમની સામે ગુનો નોંધવામાં આવ્યો નથી. હાલમાં પોલીસે ફાર્મ હાઉસના માલિક, આયોજક જ્હોન (વિદેશી વિદ્યાર્થી) અને પાર્ટીમાં હાજર વિદેશી નાગરિકો સામે દારૂબંધી કાયદા હેઠળ કેસ નોંધ્યો છે.
પાર્ટી માટે કોણે આપી મંજૂરી?
આ રેવ પાર્ટી માટે કોણે મંજૂરી આપી અને દારૂ ક્યાંથી આવ્યો તે અંગે તપાસ શરૂ કરવામાં આવી છે. સૂત્રો મુજબ, આ પાર્ટીમાં મોટા માથાઓ જોડાયેલા હોવાની પણ ચર્ચા છે. પોલીસ હવે આયોજક અને ફાર્મ હાઉસ માલિકની પૂછપરછ કરી રહી છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/buletin_india
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
