Bindia
HMPV પર વિશ્વ આરોગ્ય સંગઠનની પહેલી પ્રતિક્રિયા સામે આવી છે. WHO એ તેને એક સામાન્ય વાયરસ ગણાવ્યો છે. WHOએ કહ્યું છે કે, HMPV એટલે કે હ્યુમન મેટાન્યૂમોવાયરસ નવો નથી. તેની ઓળખ 2001 માં જ થઈ હતી. તે ઘણા સમયથી લોકોમાં હાજર છે જે શિયાળાની ઋતુમાં વધે છે.ઉલ્લેખનિય છે કે, ચીનમાં HMPV ના ઘણા કેસ નોંધાયા હતા. ત્યારબાદ ભારતમાં પણ તેના દર્દીઓ જોવા મળવા લાગ્યા છે. આવી સ્થિતિમાં લોકોની ચિંતા વધી ગઈ હતી. વિવિધ અટકળો લગાવવામાં આવી રહી હતી કે, આ વાયરસ પણ કોરોનાની જેમ વિનાશ સર્જી શકે છે.
હવે WHO એ પણ આ સ્પષ્ટ કરી દીધું છે. સોશિયલ મીડિયા પ્લેટફોર્મ X પર એક પોસ્ટમાં વિશ્વ આરોગ્ય સંગઠને કહ્યું કે, HMPV એ કોઈ નવો વાયરસ નથી. તેની ઓળખ 2001 માં થઈ હતી અને તે લાંબા સમયથી લોકોમાં હાજર છે. આ એક સામાન્ય વાયરસ છે જે શિયાળા અને વસંત ઋતુમાં ફેલાય છે. આમાં શ્વાસ લેવામાં તકલીફ અને સામાન્ય શરદી જેવી ફરિયાદો શામેલ હોઈ શકે છે.
આપને જણાવી દઈએ કે, ભારતમાં અત્યાર સુધીમાં HMPV ના નવ કેસ નોંધાયા છે. બુધવારે સવારે મહારાષ્ટ્રમાં નવમો કેસ નોંધાયો હતો. જ્યાં હિરાનંદાની હોસ્પિટલમાં 6 મહિનાની બાળકીમાં ચેપ જોવા મળ્યો હતો. આગાઉ નાગપુરમાં પણ બે કેસ નોંધાયા હતા. આ વાયરસનો પહેલો કેસ કર્ણાટકમાં નોંધાયો હતો. ત્યાં બે કેસ નોંધાયા, તમિલનાડુમાં બે અને પશ્ચિમ બંગાળ અને ગુજરાતમાં એક-એક કેસ નોંધાયા છે.
