ડોનાલ્ડ ટ્રમ્પ અને શી જિનપિંગ વચ્ચે લાંબી ટેલિફોનિક ચર્ચા, એપ્રિલમાં ટ્રમ્પ ચીનની મુલાકાતે

અમેરિકાના રાષ્ટ્રપતિ ડોનાલ્ડ ટ્રમ્પ અને ચીનના રાષ્ટ્રપતિ શી જિનપિંગ વચ્ચે બુધવારે લાંબો અને સકારાત્મક ટેલિફોનિક વાર્તાલાપ થયો હતો. બંને નેતાઓ વચ્ચે વેપાર, સૈન્ય સંબંધો, તાઈવાન, રશિયા-યુક્રેન યુદ્ધ અને ઈરાન જેવા મહત્વના વૈશ્વિક મુદ્દાઓ પર વિગતવાર ચર્ચા થઈ હતી.

ડોનાલ્ડ ટ્રમ્પે સોશિયલ મીડિયા પર આ ચર્ચાને “અત્યંત સકારાત્મક અને ઉત્તમ” ગણાવી હતી. તેમણે જણાવ્યું હતું કે વાતચીત દરમિયાન બંને દેશોના દ્વિપક્ષીય સંબંધોને વધુ મજબૂત બનાવવા પર ભાર મૂકવામાં આવ્યો.

વેપાર અને કૃષિ સૈન્ય મુદ્દા અને તાઈવાન પર ચર્ચા
ટ્રમ્પ અનુસાર, ચીન અમેરિકા પાસેથી તેલ અને ગેસની ખરીદી વધારવા પર વિચાર કરી રહ્યું છે. ઉપરાંત, ચીન દ્વારા સોયાબીનની ખરીદી આ સિઝનમાં ૨૦ મિલિયન ટન અને આગામી સિઝનમાં ૨૫ મિલિયન ટન સુધી વધારવાની તૈયારી દર્શાવવામાં આવી છે. વાર્તાલાપ દરમિયાન બંને નેતાઓએ સૈન્ય સહકાર અને તાઈવાન જેવા સંવેદનશીલ મુદ્દાઓ પર પણ મંતવ્યોની આપ-લે કરી હતી.

વૈશ્વિક સંઘર્ષો પર ચર્ચા
રશિયા-યુક્રેન યુદ્ધ તેમજ ઈરાનની હાલની સ્થિતિ અંગે પણ બંને દેશોના નેતાઓએ ચર્ચા કરી હતી. આ વાતચીત એવા સમયગાળામાં થઈ છે જ્યારે શી જિનપિંગે તાજેતરમાં રશિયાના રાષ્ટ્રપતિ વ્લાદિમીર પુતિન સાથે પણ સંવાદ કર્યો હતો.

એપ્રિલમાં ચીનની મુલાકાત
ડોનાલ્ડ ટ્રમ્પે પુષ્ટિ કરી છે કે તેઓ આગામી એપ્રિલ મહિનામાં ચીનની સત્તાવાર મુલાકાતે જશે. તેમણે આ મુલાકાત અંગે ઉત્સાહ વ્યક્ત કરતાં જણાવ્યું કે અમેરિકા-ચીન સંબંધોને વધુ આગળ લઈ જવા માટે આ પ્રવાસ મહત્વપૂર્ણ રહેશે.

વ્યક્તિગત સંબંધો પર ભાર
ટ્રમ્પે જણાવ્યું હતું કે, “ચીન સાથેના સંબંધો અને રાષ્ટ્રપતિ શી સાથેના મારા વ્યક્તિગત સંબંધો ખૂબ જ મજબૂત છે. આ સંબંધોને જાળવી રાખવા બંને દેશો માટે જરૂરી છે.” તેમણે આશા વ્યક્ત કરી કે તેમના શાસનના આગામી ત્રણ વર્ષોમાં અમેરિકા અને ચીન વચ્ચેના સંબંધોમાં સકારાત્મક પરિણામો જોવા મળશે.

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in