Bindia
અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ઈરાનને આપવામાં આવેલી કડક ચેતવણી બાદ મધ્ય પૂર્વની રાજનીતિ વધુ ગરમાઈ ગઈ છે. ઈઝરાયેલના વડાપ્રધાન બેન્જામિન નેતન્યાહૂની હાજરીમાં ટ્રમ્પે ઈરાનના પરમાણુ અને બેલિસ્ટિક મિસાઈલ કાર્યક્રમને લઈને કડક ભાષા વાપરી હતી. હવે આ નિવેદન પર ઈરાને પણ પલટવાર કર્યો છે.
ઈરાનના રાષ્ટ્રપતિ મસૂદ પેજેશ્કિયાને ટ્રમ્પની ધમકીનો જવાબ આપતા જણાવ્યું છે કે જો ઈરાન પર કોઈ પણ પ્રકારનો હુમલો કરવામાં આવશે, તો તેનો જવાબ એટલો જ કડક અને જોખમી હશે. સોશિયલ મીડિયા પ્લેટફોર્મ ‘એક્સ’ પર કરેલી પોસ્ટમાં તેમણે અમેરિકાનું નામ લીધા વગર કહ્યું કે, “ઈસ્લામિક ગણરાજ્ય ઈરાન પર કોઈપણ દમનકારી હુમલો કરાશે તો તેનો જવાબ એવો હશે કે હુમલો કરનારને પસ્તાવો થશે.”
ટ્રમ્પની કડક ચેતવણી
ડોનાલ્ડ ટ્રમ્પે જણાવ્યું હતું કે જો ઈરાન ફરીથી પોતાનો પરમાણુ કાર્યક્રમ શરૂ કરશે અથવા બેલિસ્ટિક હથિયારોનો જથ્થો વધારશે, તો અમેરિકા સૈન્ય કાર્યવાહી કરવા પાછળ નહીં હટે. તેમણે કહ્યું હતું કે આવી સ્થિતિમાં ઈરાનને સંપૂર્ણ રીતે નષ્ટ કરી દેવામાં આવશે. જોકે સાથે સાથે ટ્રમ્પે ઈરાનને વાતચીત અને કરારનો માર્ગ અપનાવવાની પણ સલાહ આપી હતી.
નેતન્યાહૂ સાથે બેઠક બાદ નિવેદન
ફ્લોરિડામાં પોતાના રિસોર્ટ ખાતે ઈઝરાયેલના વડાપ્રધાન નેતન્યાહૂ સાથે બેઠક પહેલા ટ્રમ્પે પત્રકારોને સંબોધતા કહ્યું હતું કે તેમને માહિતી મળી છે કે ઈરાન ફરી પરમાણુ કાર્યક્રમ ઊભો કરવાનો પ્રયાસ કરી રહ્યું છે. તેમણે ચેતવણી આપતાં કહ્યું કે જો આવું થશે તો અમેરિકા ફરી એકવાર તે કાર્યક્રમને ખતમ કરશે.
મધ્ય પૂર્વમાં તણાવ યથાવત
આ નિવેદનો એવા સમયે આવ્યા છે જ્યારે મધ્ય પૂર્વમાં પહેલેથી જ તણાવપૂર્ણ માહોલ છે અને ઈઝરાયેલ તથા ઈરાન વચ્ચેના સંબંધો વધુ બગડ્યા છે. બંને તરફથી આપવામાં આવેલી કડક ચેતવણીઓના કારણે આંતરરાષ્ટ્રીય સ્તરે ચિંતા વધી છે અને વૈશ્વિક રાજનીતિ પર તેની અસર પડી શકે તેવી શક્યતા વ્યક્ત કરવામાં આવી રહી છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
