Bindia
IPL 2025 ની 18મી મેચમાં, રાજસ્થાન રોયલ્સે પંજાબ કિંગ્સ (PBKS) ને 50 રનથી હરાવ્યું. મુલ્લાનપુરના મહારાજા યાદવિન્દ્ર સિંહ ઇન્ટરનેશનલ ક્રિકેટ સ્ટેડિયમ ખાતે 5 એપ્રિલ ના રોજ રમાયેલી મેચમાં, પંજાબને જીતવા માટે 206 રનનો ટાર્ગેટ હતો, પરંતુ તેઓ 9 વિકેટે 155 રન જ બનાવી શક્યા. આ સિઝનમાં રાજસ્થાન રોયલ્સની બીજી જીત હતી. આ સાથે જ, સતત બે મેચોથી ચાલી રહેલી પંજાબ કિંગ્સની જીતનો સિલસિલો પણ સમાપ્ત થઈ ગયો.
રાજસ્થાન રોયલ્સની જીતથી પોઈન્ટ ટેબલમાં ઉથલપાથલ મચી ગઈ છે. આ મેચ બાદ પંજાબ કિંગ્સ ચોથા સ્થાને સરકી ગયું છે. જ્યારે રોયલ ચેલેન્જર્સ બેંગ્લોર (RCB) બીજા સ્થાને આવી ગયું છે. ગુજરાત ટાઇટન્સ (GT) ટીમ 4 પોઈન્ટ સાથે ત્રીજા સ્થાને છે. પંજાબ, બેંગલુરુ અને ગુજરાત ત્રણેયના ચાર-ચાર પોઇન્ટ સમાન છે. પરંતુ બેંગલુરુનો નેટ-રન રેટ પંજાબ કિંગ્સ અને ગુજરાત ટાઇટન્સ કરતા સારો છે.
જો આપણે પોઈન્ટ ટેબલ પર નજર કરીએ તો, દિલ્હી કેપિટલ્સ ત્રણ મેચમાં 6 પોઈન્ટ સાથે ટોચ પર છે. દિલ્હી કેપિટલ્સ એકમાત્ર એવી ટીમ છે જેણે આ સિઝનમાં અત્યાર સુધી એક પણ મેચમાં હારનો સામનો કર્યો નથી. કોલકાતા નાઈટ રાઈડર્સ (KKR) પાંચમા ક્રમે, લખનૌ સુપર જાયન્ટ્સ (LSG) છઠ્ઠા ક્રમે અને રાજસ્થાન રોયલ્સ ટીમ સાતમા ક્રમે છે. જો આપણે વર્તમાન પરિસ્થિતિ પર નજર કરીએ તો, છ ટીમો કોલકાતા, પંજાબ, ગુજરાત, બેંગલુરુ, રાજસ્થાન અને લખનૌના સમાન 4 પોઇન્ટ છે.
આવી સ્થિતિમાં, આ ટીમો નેટ-રન રેટના આધારે એકબીજાથી આગળ અથવા પાછળ છે. મુંબઈ ઈન્ડિયન્સ (MI) આઠમા ક્રમે, ચેન્નાઈ સુપર કિંગ્સ (CSK) નવમા ક્રમે અને સનરાઈઝર્સ હૈદરાબાદ (SRH) દસમા અને છેલ્લા ક્રમે છે. ત્રણેય ટીમોના બે-બે પોઈન્ટ છે. IPL 2025 માં અત્યાર સુધીમાં ફક્ત 18 મેચ રમાઈ છે.
લેટેસ્ટ IPL સ્કોર ટેબલ
હાલમાં, નિકોલસ પૂરન IPL 2025 માં સૌથી વધુ રન બનાવનારા ખેલાડીઓની યાદીમાં ટોચ પર છે. લખનૌ સુપર જાયન્ટ્સના આ બેટ્સમેને 4 મેચમાં 218.47 ના સ્ટ્રાઇક રેટથી 201 રન બનાવ્યા છે. પૂરણે 16 સિકસ અને 18 ચોગ્ગા ફટકાર્યા છે. પૂરન પછી સાઈ સુદર્શન (186 રન), મિશેલ માર્શ (184 રન) અને સૂર્યકુમાર યાદવ (171 રન) છે.
ચેન્નાઈ સુપર કિંગ્સનો સ્પિનર નૂર અહેમદ હાલમાં 10 વિકેટ સાથે વર્તમાન સિઝનમાં સૌથી સફળ બોલર છે. તેમના પછી દિલ્હી કેપિટલ્સના મિશેલ સ્ટાર્કનો નંબર આવે છે. જેણે 9 વિકેટ લીધી છે. મુંબઈ ઈન્ડિયન્સના કેપ્ટન હાર્દિક પંડ્યાએ IPL 2025માં 8 વિકેટ લીધી છે અને તે સંયુક્ત રીતે ત્રીજા સ્થાને છે. CSK ના ફાસ્ટ બોલર ખલીલ અહેમદે પણ 8 વિકેટ લીધી છે.
