સ્થાનિક સ્વરાજ્ય ચૂંટણીમાં 57% મતદાન: ગરમી વચ્ચે અંતિમ કલાકોમાં મતદારોનો ઉમટ્યો ઉત્સાહ

ગુજરાતમાં વિધાનસભા ચૂંટણી પહેલાં સેમિફાઈનલ સમાન ગણાતી સ્થાનિક સ્વરાજ્યની ચૂંટણી આજે (26 એપ્રિલ) શાંતિપૂર્ણ માહોલમાં પૂર્ણ થઈ છે. રાજ્યભરમાં મતદારોનો મધ્યમ પ્રતિસાદ જોવા મળ્યો છે અને સરેરાશ 57.08 ટકા જેટલું મતદાન નોંધાયું છે. સવારના કલાકોમાં મતદાનની ગતિ ધીમી રહી હતી, પરંતુ દિવસ દરમિયાન વધતી ગરમીને કારણે બપોરે 12થી 4 વાગ્યા વચ્ચે મતદાન મથકો પર હાજરી ઓછી જોવા મળી. જોકે, સાંજના અંતિમ કલાકોમાં મતદારોનો ઉત્સાહ નોંધપાત્ર રીતે વધ્યો હતો.

શહેરો કરતા ગામડાઓમાં વધુ મતદાન
ચૂંટણીના આંકડાઓ અનુસાર,
– 15 મહાનગરપાલિકાઓમાં આશરે 49% મતદાન નોંધાયું
– 84 નગરપાલિકાઓમાં 59% મતદાન થયું
– 34 જિલ્લા પંચાયતોમાં 61% મતદાન નોંધાયું
– 260 તાલુકા પંચાયતોમાં પણ અંદાજે 61% જેટલું મતદાન નોંધાયું
આથી સ્પષ્ટ થાય છે કે ગ્રામ્ય વિસ્તારોમાં મતદારો વધુ સક્રિય રહ્યા હતા.

કડક સુરક્ષા વચ્ચે શાંતિપૂર્ણ મતદાન
ચૂંટણી દરમિયાન સમગ્ર રાજ્યમાં પોલીસ અને સુરક્ષા દળોની કડક હાજરી વચ્ચે મતદાન પ્રક્રિયા શાંતિપૂર્ણ રીતે પૂર્ણ થઈ હતી. કોઈ પણ પ્રકારની અનિચ્છનીય ઘટના નોંધાઈ નથી. મતદાન પૂર્ણ થયા બાદ તમામ મતદાન મથકો પર ઈવીએમ મશીનોને નિયમ મુજબ સીલ કરવામાં આવી હતી. પ્રિસાઇડિંગ ઓફિસર અને સ્ટાફ દ્વારા જરૂરી દસ્તાવેજી પ્રક્રિયા પૂર્ણ કર્યા બાદ મશીનોને સુરક્ષિત રીતે સ્ટ્રોંગ રૂમ અને કલેકશન સેન્ટરોમાં પહોંચાડવામાં આવ્યા.

25 હજારથી વધુ ઉમેદવારોનું ભાવિ ઈવીએમમાં કેદ
આ ચૂંટણીમાં રાજ્યભરમાં અંદાજે 10 હજાર બેઠકો માટે 25 હજારથી વધુ ઉમેદવારો મેદાનમાં હતા. હવે તમામ ઉમેદવારોનું રાજકીય ભાવિ ઈવીએમમાં કેદ થઈ ગયું છે. હવે સૌની નજર 28 એપ્રિલ પર ટકેલી છે, જ્યારે મતગણતરી હાથ ધરાશે અને પરિણામ જાહેર થશે. સ્થાનિક પ્રશ્નો અને વિકાસના મુદ્દાઓ પર જનતાએ કોને પસંદ કર્યું છે તે જાણવા માટે લોકોમાં ભારે ઉત્સુકતા જોવા મળી રહી છે.