Bindia
રાજ્યમાં માદક પદાર્થોની હેરાફેરી અટકાવવા માટે પોલીસ વિભાગ સતત સક્રિય છે. આવા સમયમાં ગીર સોમનાથ જિલ્લા SOGએ મોટી સફળતા પ્રાપ્ત કરી છે. પોલીસે સોમનાથ-બાયપાસ ચોકડી પાસે આવેલી એશટોરીયા હોટલ નજીકથી બે શખ્સોને 4 કિલો ગાંજા સાથે ઝડપી પાડ્યા છે. આ ઘટનાથી ઓરિસ્સા સુધીના ડ્રગ નેટવર્કનો પર્દાફાશ થયો છે.
હેરાફેરી કરતા બે શખ્સોની ધરપકડ
પકડાયેલ શખ્સોની ઓળખ સમીરશા ફકીર અને અસપાક કાલુ તરીકે થઈ છે. પોલીસ તપાસમાં જાણવા મળ્યું છે કે બંને શખ્સોએ ઓરિસ્સાના ચંદનસિંહ નામના સપ્લાયર પાસેથી ગાંજાનો જથ્થો લાવ્યો હતો. તેમને આ ગાંજો વેરાવળના અબ્બાસ સુલેમાન મંગરોલીયા માટે પહોંચાડવાનો હતો.
NDPS એક્ટ હેઠળ ગુનો દાખલ
પ્રભાસપાટણ પોલીસે NDPS એક્ટ હેઠળ બંને પેડલરો સામે ગુનો દાખલ કર્યો છે. પોલીસની પ્રાથમિક તપાસ અનુસાર, અબ્બાસ પેડલરોને દરેક વખતની હેરાફેરી માટે ₹5,000 આપે છે અને સમગ્ર નેટવર્ક વેરાવળ અને સોમનાથ વિસ્તારમાં ફેલાયેલું છે.
ઓરિસ્સા સુધી પહોંચી તપાસ
DySP વી.આર. ખેંગરે પ્રેસ કોન્ફરન્સમાં જણાવ્યું હતું કે, પકડાયેલા શખ્સોથી પૂછપરછ બાદ ખુલાસો થયો છે કે આ ડ્રગ સપ્લાય ઓરિસ્સા સુધીથી શરૂ થઈ ને ગુજરાતના વિવિધ શહેરોમાં વહેંચાઈ રહ્યો છે. અબ્બાસનું નેટવર્ક મોટી હદે ગેરકાયદે વેચાણ માટે જવાબદાર હોવાનું સામે આવ્યું છે.
પોલીસે શરૂ કરી વધુ તપાસ
અત્યારે અબ્બાસ સુલેમાન મંગરોલીયાની ધરપકડ માટે પોલીસ ત્વરિત પગલાં લઈ રહી છે. સાથે જ સમગ્ર નેટવર્કમાં જોડાયેલા અન્ય શખ્સોની ઓળખ અને દબિશ માટે એક ખાસ ટીમ રચવામાં આવી છે.
