વરસાદી સંકટને પગલે ગુજરાત હાઈ એલર્ટ: અમદાવાદમાં શાળાઓ બંધ, આર્મી-નેવી-એરફોર્સ સ્ટેન્ડબાય

ગુજરાતમાં આગામી ચાર દિવસ ભારે વરસાદની આગાહીને પગલે રાજ્ય સરકાર અને સ્થાનિક વહીવટી તંત્ર સંપૂર્ણ એલર્ટ મોડમાં આવી ગયું છે. હવામાન વિભાગે અમદાવાદ સહિત રાજ્યના અનેક જિલ્લાઓમાં ભારેથી અતિભારે વરસાદની સંભાવના વ્યક્ત કરીને રેડ એલર્ટ જાહેર કર્યું છે. આ પરિસ્થિતિને ધ્યાનમાં રાખીને અમદાવાદ મ્યુનિસિપલ કોર્પોરેશન (AMC) દ્વારા 31 જુલાઈ અને 1 ઓગસ્ટ દરમિયાન તમામ અધિકારીઓ અને કર્મચારીઓની રજાઓ તાત્કાલિક અસરથી રદ કરવામાં આવી છે. મ્યુનિસિપલ કમિશનર અને મેયરે સમગ્ર તંત્રને 24 કલાક હાઈ એલર્ટ પર રહેવા તેમજ તમામ ઝોનમાં વરસાદી સ્થિતિ પર સતત નજર રાખવા સૂચના આપી છે.

વરસાદની આગાહીને પગલે નાગરિકોને ઘરમાં રહેવાની અપીલ

વરસાદને લઇ AMC દ્વારા નાગરિકોની સુરક્ષાને સર્વોચ્ચ પ્રાથમિકતા આપવામાં આવી રહી છે. આગામી બે દિવસ સુધી બિનજરૂરી બહાર ન નીકળવા અને શક્ય હોય ત્યાં સુધી ‘વર્ક ફ્રોમ હોમ’ અપનાવવા અપીલ કરવામાં આવી છે. ભારે પવન અને વરસાદને કારણે ઝાડ તેમજ મોટા હોર્ડિંગ્સ નીચે ઊભા ન રહેવાની પણ ખાસ ચેતવણી આપવામાં આવી છે. શહેરમાં જોખમી ગણાતા હોર્ડિંગ્સ દૂર કરવાની કામગીરી પૂર્ણ કરવામાં આવી છે. સાથે જ અકસ્માતની શક્યતા ઘટાડવા જોખમી ઝાડની ડાળીઓનું ટ્રિમિંગ પણ કરવામાં આવ્યું છે.

31 જુલાઈએ વરસાદને લઇ શાળાઓ અને કોલેજોમાં રજા જાહેર

વરસાદને લઇ વિદ્યાર્થીઓની સલામતીને ધ્યાનમાં રાખીને અમદાવાદ જિલ્લા કલેક્ટર અને જિલ્લા શિક્ષણ અધિકારી (DEO) વચ્ચેની બેઠક બાદ શહેરની તમામ આંગણવાડીઓ, સરકારી અને ખાનગી શાળાઓ તેમજ કોલેજોમાં 31 જુલાઈના રોજ રજા જાહેર કરવામાં આવી છે. આંગણવાડીઓમાં સોમવાર સુધી રજા રહેશે. તમામ શૈક્ષણિક સંસ્થાઓને કડક સૂચના આપવામાં આવી છે કે કોઈપણ વિદ્યાર્થીને શૈક્ષણિક કે અન્ય પ્રવૃત્તિ માટે કેમ્પસમાં બોલાવવામાં ન આવે.

વરસાદી પાણીના નિકાલ માટે તંત્રની આગોતરી તૈયારી

શહેરમાં જળભરાવ ટાળવા માટે AMC દ્વારા આગોતરા આયોજન હેઠળ વિવિધ કામગીરી પૂર્ણ કરવામાં આવી છે. ગોતા-ગોધાવી કેનાલના બોપલ-ઘુમા વિસ્તારમાં ડી-સિલ્ટિંગની કામગીરી પૂર્ણ થઈ ગઈ છે. શહેરના તળાવોમાં પાણીનું સ્તર નિયંત્રિત રાખવા હાઈ-કેપેસિટી પંપ દ્વારા સતત પાણી બહાર કાઢવાની કામગીરી ચાલી રહી છે. સંવેદનશીલ વિસ્તારોમાં ડીવોટરિંગ પંપ, મશીનરી અને ફિલ્ડ ટીમોને તૈનાત કરવામાં આવી છે, જેથી વરસાદી પાણીનો ઝડપથી નિકાલ થઈ શકે.

મ્યુનિસિપલ શાળાઓમાં આશ્રયસ્થાનો તૈયાર

ભારે વરસાદની સ્થિતિમાં નીચાણવાળા વિસ્તારોમાં રહેતા નાગરિકોને સુરક્ષિત સ્થળે ખસેડવા માટે પશ્ચિમ ઝોન એસ્ટેટ વિભાગ દ્વારા મ્યુનિસિપલ શાળાઓમાં આશ્રયસ્થાનો તૈયાર કરવામાં આવ્યા છે. સેન્ટ્રલ અને ઝોનલ કંટ્રોલ રૂમ 24 કલાક કાર્યરત રાખવામાં આવ્યા છે. જરૂરિયાત મુજબ સ્થળાંતર કરાયેલા લોકોને આશ્રય, ભોજન, પીવાનું પાણી અને અન્ય જરૂરી સુવિધાઓ તાત્કાલિક ઉપલબ્ધ કરાવવામાં આવશે.

આ જિલ્લાઓમાં જાહેર થયું રેડ એલર્ટ

હવામાન વિભાગના અનુમાન મુજબ 31 જુલાઈથી 2 ઓગસ્ટ દરમિયાન સુરત, વડોદરા, અમદાવાદ, ભાવનગર, ભરૂચ, આણંદ, નર્મદા, તાપી, ડાંગ, છોટાઉદેપુર, પંચમહાલ, દાહોદ અને મહીસાગર સહિતના જિલ્લાઓમાં ભારેથી અતિભારે વરસાદની શક્યતા છે. આ જિલ્લાઓમાં સ્થાનિક વહીવટી તંત્રને સંપૂર્ણ સજ્જ રહેવા અને પરિસ્થિતિ પર સતત નજર રાખવા સૂચના આપવામાં આવી છે.

અધિકારીઓની રજાઓ રદ, NDRF-SDRF ટીમો તૈનાત

રાજ્ય સરકારે પ્રભાવિત જિલ્લાઓના તમામ અધિકારીઓની રજાઓ તાત્કાલિક અસરથી રદ કરવાનો નિર્ણય લીધો છે. દરેક જિલ્લામાં 24×7 કંટ્રોલ રૂમ કાર્યરત રાખવામાં આવ્યા છે અને એક વર્ગ-1 અધિકારીને સતત દેખરેખ માટે ફરજ પર મૂકવામાં આવ્યો છે. સંવેદનશીલ વિસ્તારોમાં જરૂરિયાત મુજબ NDRF અને SDRFની ટીમોને તાત્કાલિક તૈનાત કરવા સૂચના આપવામાં આવી છે.

આર્મી, નેવી અને એરફોર્સ પણ સ્ટેન્ડબાય

સરકારે જણાવ્યું છે કે જો વરસાદી પરિસ્થિતિ વધુ ગંભીર બને તો રાહત અને બચાવ કામગીરી માટે ભારતીય સેનાની ત્રણેય પાંખો – આર્મી, નેવી અને એરફોર્સ –ને સ્ટેન્ડબાય રાખવામાં આવી છે. તમામ જિલ્લાઓને નીચાણવાળા વિસ્તારો પર ખાસ નજર રાખવા, જરૂરી હોય તો લોકોને સુરક્ષિત સ્થળે ખસેડવા અને સતત જાહેર સૂચનાઓ જારી રાખવા આદેશ આપવામાં આવ્યો છે.

નાગરિકો માટે મહત્વની સૂચનાઓ

તંત્રએ નાગરિકોને બિનજરૂરી મુસાફરી ટાળવા, પાણી ભરાયેલા રસ્તાઓથી દૂર રહેવા, વીજળીના થાંભલા અને જોખમી સ્થળોથી સાવચેત રહેવા તેમજ હવામાન વિભાગ અને ટ્રાફિક પોલીસ દ્વારા જાહેર કરવામાં આવતા અપડેટ્સ પર સતત નજર રાખવાની અપીલ કરી છે. આગામી કેટલાક દિવસો સુધી ભારે વરસાદની શક્યતા હોવાથી દરેક નાગરિકે સાવચેતી રાખવી જરૂરી બની છે.

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276