કોમનવેલ્થ ગેમ્સ 2026નું સંપૂર્ણ શેડ્યૂલ જાહેર, 126 ખેલાડીઓ મેદાનમાં ઉતરશે

ગ્લાસગોમાં યોજાશે કોમનવેલ્થ ગેમ્સ 2026

રમતપ્રેમીઓ માટે મોટા સમાચાર સામે આવ્યા છે. કોમનવેલ્થ ગેમ્સ 2026નું સંપૂર્ણ શેડ્યૂલ જાહેર કરવામાં આવ્યું છે. આ વખતે રમતોના મહાકુંભનું આયોજન સ્કોટલેન્ડના ગ્લાસગોમાં કરવામાં આવશે. કોમનવેલ્થ ગેમ્સની શરૂઆત 23 જુલાઈથી થશે અને 2 ઓગસ્ટ સુધી વિવિધ રમતોમાં ખેલાડીઓ મેડલ માટે પોતાનું શ્રેષ્ઠ પ્રદર્શન કરશે.

આ ગેમ્સમાં દુનિયાભરના 74 દેશોના લગભગ 3,000 ખેલાડીઓ ભાગ લેશે. પેરા-સ્પોર્ટ્સ સહિત કુલ 13 રમતોમાં ખેલાડીઓ પોતાની પ્રતિભા બતાવશે. ભારત પણ આ વખતે મજબૂત ટીમ સાથે મેદાનમાં ઉતરી રહ્યું છે.

ભારતના 126 ખેલાડીઓ કરશે પ્રતિનિધિત્વ

કોમનવેલ્થ ગેમ્સ 2026 માટે ભારતીય દળમાં કુલ 126 ખેલાડીઓનો સમાવેશ કરવામાં આવ્યો છે. જેમાં 77 પુરુષ અને 48 મહિલા ખેલાડીઓ સામેલ છે. ભારતીય ખેલાડીઓ એથલેટિક્સ, બોક્સિંગ, જ્યુડો, સ્વિમિંગ, વેઈટલિફ્ટિંગ, સાઈકલિંગ, જિમ્નાસ્ટિક્સ અને પેરા-સ્પોર્ટ્સ જેવી રમતોમાં ભાગ લેશે.

ભારતીય ટીમમાં સૌથી વધુ ખેલાડીઓ એથલેટિક્સમાં છે. આ વિભાગમાં કુલ 32 ખેલાડીઓ ભારતનું પ્રતિનિધિત્વ કરશે. તેમાં 22 પુરુષ અને 10 મહિલા ખેલાડીઓનો સમાવેશ થાય છે.

નીરજ ચોપરા અને મીરાબાઈ ચાનૂ પર રહેશે નજર

કોમનવેલ્થ ગેમ્સ 2026માં ભારતના ઘણા સ્ટાર ખેલાડીઓ ભાગ લેશે. ઓલિમ્પિક ચેમ્પિયન નીરજ ચોપરા પુરુષોની જેવલિન થ્રો સ્પર્ધામાં ભારત માટે મેડલની આશા તરીકે મેદાનમાં ઉતરશે.

આ ઉપરાંત વેઈટલિફ્ટિંગમાં મીરાબાઈ ચાનૂ, સ્વિમિંગમાં શ્રીહરિ નટરાજ, બોક્સિંગમાં લવલીના બોર્ગોહેન સહિતના ખેલાડીઓ પાસેથી પણ સારા પ્રદર્શનની અપેક્ષા રાખવામાં આવી રહી છે.

23 જુલાઈએ ઉદ્ઘાટન, 2 ઓગસ્ટે સમાપન

કોમનવેલ્થ ગેમ્સ 2026નો પ્રારંભ 23 જુલાઈના રોજ થશે. ભારતીય સમય અનુસાર રાત્રે 10:30 વાગ્યે ઉદ્ઘાટન સમારોહ યોજાશે. ત્યારબાદ 24 જુલાઈથી વિવિધ રમતોની સ્પર્ધાઓ શરૂ થશે.

આ વખતે રમતોનું આયોજન એવી રીતે કરવામાં આવ્યું છે કે ખેલાડીઓને પોતાની ક્ષમતા બતાવવા પૂરતી તક મળે. અલગ-અલગ દિવસોમાં એથલેટિક્સ, સ્વિમિંગ, બોક્સિંગ, જ્યુડો, વેઈટલિફ્ટિંગ અને સાઈકલિંગ જેવી રમતો યોજાશે.

મહત્વપૂર્ણ તારીખો અને ભારતીય ખેલાડીઓની સ્પર્ધાઓ

24 જુલાઈથી સ્વિમિંગ, બોક્સિંગ, જિમ્નાસ્ટિક્સ અને અન્ય રમતો શરૂ થશે. આ દિવસે વેઈટલિફ્ટિંગમાં મીરાબાઈ ચાનૂ જેવી દિગ્ગજ ખેલાડી મેદાનમાં ઉતરશે.

25 અને 26 જુલાઈ દરમિયાન સ્વિમિંગ અને જિમ્નાસ્ટિક્સની મહત્વપૂર્ણ સ્પર્ધાઓ યોજાશે. ભારતીય ખેલાડીઓ મેડલ માટે પોતાની દાવેદારી રજૂ કરશે.

27 જુલાઈથી એથલેટિક્સની મુખ્ય સ્પર્ધાઓ શરૂ થશે. ટ્રેક અને ફિલ્ડ ઈવેન્ટ્સમાં ભારતના અનેક ખેલાડીઓ ભાગ લેશે. એથલેટિક્સમાં ભારતને મેડલની મોટી આશા છે.

30 જુલાઈથી ટ્રેક સાઈકલિંગ, જ્યુડો અને અન્ય રમતોના મહત્વપૂર્ણ મુકાબલા યોજાશે. 1 ઓગસ્ટે પુરુષોની જેવલિન થ્રો ફાઈનલ યોજાશે, જેમાં નીરજ ચોપરા પર દેશની નજર રહેશે. આ સાથે બોક્સિંગના ગોલ્ડ મેડલ મુકાબલા પણ આ દિવસે યોજાશે.

કોમનવેલ્થ ગેમ્સમાં ભારતનો જૂનો રેકોર્ડ

કોમનવેલ્થ ગેમ્સની શરૂઆત વર્ષ 1930માં થઈ હતી. અત્યાર સુધીમાં તેની 22 આવૃત્તિઓ યોજાઈ ચૂકી છે. ભારતે મોટાભાગની આવૃત્તિઓમાં ભાગ લીધો છે અને અનેક રમતોમાં મેડલ જીતીને દેશનું નામ રોશન કર્યું છે.

ભારત માત્ર ચાર વખત કોમનવેલ્થ ગેમ્સમાં સામેલ થયું નહોતું. આ વખતે ભારતીય ખેલાડીઓ પાસેથી પણ શાનદાર પ્રદર્શનની અપેક્ષા રાખવામાં આવી રહી છે.

મેડલ માટે તૈયાર ભારતીય ટીમ

કોમનવેલ્થ ગેમ્સ 2026 ભારત માટે મહત્વપૂર્ણ તક છે. અનુભવી અને યુવા ખેલાડીઓના સંયોજન સાથે ભારતીય ટીમ મેડલ ટેબલમાં પોતાનું સ્થાન મજબૂત કરવાનો પ્રયાસ કરશે.

રમતપ્રેમીઓ હવે 23 જુલાઈથી શરૂ થનારી આ મોટી રમતોત્સવની રાહ જોઈ રહ્યા છે. ભારતીય ખેલાડીઓના પ્રદર્શન પર દેશભરની નજર રહેશે અને દરેક રમતપ્રેમી પોતાના ખેલાડીઓને પ્રોત્સાહન આપશે.

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276