અમદાવાદમાં એરપોર્ટ પરથી સાત કરોડનું ડ્રગ્સ ઝડપાયું, આરોપીની પૂછપરછમાં થઈ શકે છે મોટો ખુલાસા

B INDIA અમદાવાદ : અમદાવાદમાં હવે થોડા-થોડા સમયના અંતરે ડ્રગ્સ પકડાવવા માંડ્યુ છે. હજી માંડ બે દિવસ પહેલા લાલ દરવાજામાં 27 લાખનું એમડી ડ્રગ્સ પકડાયું હતું, આટલું ઓછું હોય તેમ હવે અમદાવાદ એરપોર્ટ પરથી સાત કરોડ રૂપિયાનું ડ્રગ્સ ઝડપાયું છે. આ ડ્રગ્સ પોલીસે નહી પરંતુ કસ્ટમ વિભાગે ઝડપી પાડયું છે. મુસાફર ફલાઈટમાંથી બહાર નીકળ્યો અને તપાસ દરમિયાન 4.6 કિલો ડ્રગ્સ ઝડપી પાડવામાં આવ્યું છે. જેમાં મુસાફર બેંગકોકથી અમદાવાદ આવી રહ્યો હતો. અને અમદાવાદ ઈન્ટરનેશનલ એરપોર્ટ પર ઝડપાઈ ગયો છે. હાઇડ્રોપોનિક વીડના વેક્યુમનાં 10 પેકેટ મુસાફર પાસેથી મળી આવ્યા છે.

મળતી માહિતી મુજબ, કસ્ટમ્સને આ ડ્રગ્સને લઈને બાતમી મળી ગઈ હતી. તેના પગલે કસ્ટમ્સે એરપોર્ટ પર ચેકિંગ ડબલ કરી નાખ્યુ હતું. અને કસ્ટમ્સ વિભાગના ટોચના અધિકારીઓ પણ આ આખા ઓપરેશનમાં સામેલ હતા. સામાન્ય રીતે અમદાવાદ એરપોર્ટ પરથી દાણચોરીથી આવતું સોનું પકડાતું હોય છે, પરંતુ હવે ડ્રગ્સ પણ પકડાવવા લાગ્યું છે.કસ્ટમ્સ વિભાગે આરોપીની ધરપકડ કરીને તેને અમદાવાદ પોલીસને સુપ્રદ કર્યો છે. અમદાવાદ પોલીસે તેને પકડીને તેની પૂછપરછ શરૂ કરી દીધી છે. આ ડ્રગ્સ અમદાવાદ આવ્યું તેનો સીધો અર્થ એમ થાય કે અમદાવાદમાં તેને ક્યાંક સપ્લાય કરવાનું હતું.

અથવા તો અમદાવાદ તેનો ટ્રાન્સપોર્ટ રૂટ હતું. આ પકડાયેલા ડ્રગ્સના છેડા ક્યાં-ક્યાં અડી રહ્યા છે. તેની તપાસ પોલીસે શરૂ કરી દીધી છે. પોલીસ અધિકારીઓ પણ સાત કરોડનું ડ્રગ્સ પકડાવવાના પગલે ચોંકી ઉઠ્યા છે. પકડાયેલો આરોપી ફક્ત પેડલર છે કે પોતે જ માલ લાઈને સપ્લાય કરે છે. તેના પર કોના હાથ છે, તે કોના હાથ નીચે કામ કરે છે તેવા અનેક સવાલોના જવાબ મેળવવામાં પોલીસ લાગેલી છે. આગામી સમયમાં આ ડ્રગ્સ કાંડને લઈને કોઈ મોટો ખુલાસો થાય તો નવાઈ નહીં.