રાજકોટ સહિત ગુજરાતમાં મહિલાઓના નામે પ્રોપર્ટી ખરીદીનો ટ્રેન્ડ વધ્યો, છતાં હિસ્સો હજુ ઓછો

ગુજરાતમાં મિલકત માલિકીના ક્ષેત્રમાં મહિલાઓનો હિસ્સો ધીમે ધીમે વધતો જોવા મળી રહ્યો છે. વિધાનસભામાં રજૂ થયેલા સત્તાવાર આંકડા મુજબ છેલ્લા બે વર્ષમાં રાજ્યમાં કુલ 16.52 લાખથી વધુ વેચાણ દસ્તાવેજો નોંધાયા છે, જેમાંથી આશરે 4.68 લાખ દસ્તાવેજો મહિલાઓના નામે નોંધાયા છે. એટલે કે મહિલાઓનો હિસ્સો માત્ર 28.33 ટકા રહ્યો છે, જ્યારે પુરુષોનો હિસ્સો હજુ પણ 71.66 ટકા છે.

જિલ્લાવાર તફાવત સ્પષ્ટ
રાજ્યના વિવિધ જિલ્લાઓમાં મહિલાઓના નામે મિલકત ખરીદવાના વલણમાં નોંધપાત્ર તફાવત જોવા મળે છે. બોટાદ જિલ્લામાં મહિલાઓનો હિસ્સો સૌથી વધુ 41.23 ટકા રહ્યો છે. આ ઉપરાંત છોટા ઉદેપુરમાં 38.63 ટકા અને ગીર સોમનાથમાં 35.07 ટકા દસ્તાવેજો મહિલાઓના નામે નોંધાયા છે. સૌરાષ્ટ્રના મુખ્ય શહેર રાજકોટમાં પણ સ્થિતિ સરેરાશથી સારી જોવા મળી છે, જ્યાં 34.60 ટકા મિલકત નોંધણી મહિલાઓના નામે થઈ છે.

મધ્ય ગુજરાતમાં સ્થિતિ નબળી
બીજી તરફ, મધ્ય ગુજરાતના વિકસિત જિલ્લાઓમાં મહિલાઓનો હિસ્સો નોંધપાત્ર રીતે ઓછો રહ્યો છે. આણંદ જિલ્લામાં માત્ર 20.56 ટકા, ભરૂચમાં 21.30 ટકા, ખેડામાં 24.90 ટકા અને વડોદરામાં 25.05 ટકા દસ્તાવેજો મહિલાઓના નામે નોંધાયા છે. રાજ્યના સૌથી મોટા શહેર અમદાવાદમાં 2.93 લાખ દસ્તાવેજોમાંથી માત્ર 25.41 ટકા જ મહિલાઓના નામે નોંધાયા છે. સુરતમાં 27.62 ટકા અને મહેસાણામાં 28.80 ટકા મહિલા હિસ્સેદારી નોંધાઈ છે.

સરકારની રાહતો છતાં ખાઈ યથાવત
સરકાર દ્વારા મહિલાઓને પ્રોત્સાહન આપવા સ્ટેમ્પ ડયુટી અને નોંધણી ફીમાં રાહતો આપવામાં આવી રહી છે. છેલ્લા બે વર્ષમાં મહિલાઓના નામે મિલકત ખરીદી પર કુલ ₹792 કરોડથી વધુની ફી માફ કરવામાં આવી છે.

તેમ છતાં, આ આંકડા દર્શાવે છે કે સામાજિક અને આર્થિક કારણોસર મિલકત માલિકી હજી પણ મોટા ભાગે પુરુષપ્રધાન જ છે. જોકે, સરકારની રાહતો અને જાગૃતિને કારણે મહિલાઓના નામે મિલકત નોંધાવવાનો ટ્રેન્ડ ધીમે ધીમે વધતો જઈ રહ્યો છે.

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in