Bindia
રાજ્યમાં ચોમાસાના સત્તાવાર આગમન પહેલાં જ સૌરાષ્ટ્રના દરિયાકાંઠાના વિસ્તારોમાં વાતાવરણમાં નોંધપાત્ર ફેરફાર જોવા મળી રહ્યો છે. પોરબંદરમાં સોમવારે બપોર બાદ અચાનક પ્રિમોન્સૂન એક્ટિવિટીની અસર જોવા મળી હતી. શહેરમાં કાળાડિબાંગ વાદળો છવાઈ જતા પવનના જોરદાર સુસવાટા સાથે વરસાદી ઝાપટાં શરૂ થયા હતા.
છેલ્લા ઘણા દિવસોથી ગરમી અને બફારાથી પરેશાન રહેલા પોરબંદરવાસીઓને વરસાદી માહોલથી મોટી રાહત મળી છે. વરસાદના આગમન સાથે જ વાતાવરણમાં ઠંડક પ્રસરી ગઈ હતી અને અસહ્ય ઉકળાટમાંથી લોકોને રાહત મળી હતી. ઉનાળાની ગરમી વચ્ચે અચાનક થયેલા આ વાતાવરણના પલટાએ લોકોને આનંદિત કરી દીધા છે.
વરસાદી માહોલની અસર અરબી સમુદ્ર પર પણ જોવા મળી રહી છે. દરિયામાં ભારે કરંટ સર્જાતા વિશાળ મોજા ઉછળતા જોવા મળ્યા હતા. સમુદ્રની સ્થિતિ તોફાની બનતા વહીવટી તંત્ર દ્વારા સાવચેતીના પગલાં લેવામાં આવ્યા છે. માછીમારો અને પ્રવાસીઓને દરિયા કિનારાથી દૂર રહેવા તેમજ જરૂરી સાવચેતી રાખવા સૂચના આપવામાં આવી રહી છે.
પ્રિમોન્સૂન વરસાદથી ખેડૂતોમાં પણ ખુશીનો માહોલ જોવા મળી રહ્યો છે. વાવણીની સીઝન નજીક આવી રહી હોવાથી ખેડૂતો લાંબા સમયથી વરસાદની રાહ જોઈ રહ્યા હતા. વરસાદી વાતાવરણ સર્જાતા ખેડૂતોમાં આશાનું કિરણ જાગ્યું છે અને હવે તેઓ સારા વરસાદની ચાતક નજરે રાહ જોઈ રહ્યા છે.
હવામાનમાં આવેલા આ અચાનક બદલાવથી પોરબંદર સહિત આસપાસના વિસ્તારોમાં ચોમાસાની એન્ટ્રીની આશા વધુ મજબૂત બની છે. જો આગામી દિવસોમાં વરસાદી માહોલ યથાવત રહેશે તો કૃષિ ક્ષેત્રને પણ તેનો સીધો લાભ મળી શકે છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
