Bindia
– ૪ વર્ષની કેદ અને ₹ ૨૫૦૦ દંડ ફટકારવામાં આવ્યો
– ₹ ૨૫૦૦ દંડ ન ભરે તો વધુ ૨ માસની કેદ
પંકજ મકવાણા – નડિયાદ: ખેડા જિલ્લાના ઠાસરામાંથી માત્ર ૧૫ વર્ષ અને ૨ માસની સગીર વયની દીકરીને લલચાવી-ફોસલાવી વાલીપણામાંથી અપહરણ કરી જવાના ગંભીર ગુનામાં નડિયાદની સ્પેશિયલ પોક્સો કોર્ટે ઐતિહાસિક ચુકાદો આપ્યો છે. સ્પેશિયલ જજ પી. પી. પુરોહિતે આરોપી અક્ષયકુમાર ઉર્ફે અક્કીને કસૂરવાર ઠેરવી ૪ વર્ષની સાદી કેદની સજા અને રૂ. ૨,૫૦૦નો દંડ ફટકાર્યો છે. આ સાથે જ કોર્ટે ભોગ બનનાર માસૂમ દીકરીને વળતર પેટે રૂ. ૫૦,૦૦૦ ચૂકવવાનો પણ સંવેદનશીલ આદેશ કર્યો છે.
એક્ટિવા પર બેસાડી ભગાડી ગયો હતો આરોપી
બનાવની વિગત એવી છે કે, વર્ષ ૨૦૨૩માં ઠાસરાના હુસેની ચોક વિસ્તારમાંથી આરોપી અક્ષયકુમાર (ઉં.વ. ૨૨) ભોગ બનનાર સગીરાને પોતાની જાળમાં ફસાવી, તેના વાલીની સંમતિ વિના પોતાના એક્ટિવા (નંબર: જીજે-૦૭-સીઈ-૯૦૩૯) પર બેસાડીને ભગાડી ગયો હતો. આ અંગે ઠાસરા પોલીસ મથકે IPC કલમ ૩૬૩, ૩૬૬ અને પોક્સો એક્ટ હેઠળ ગુનો નોંધાતા સ્પેશિયલ કેસ નંબર ૯૬/૨૦૨૩ હેઠળ નડિયાદ કોર્ટમાં કાયદાકીય પ્રોસિડિંગ હાથ ધરવામાં આવ્યું હતું.
૬ દસ્તાવેજી પુરાવા અને ૧૪ સાક્ષીઓની જુબાની નડી ગઈ
સરકાર પક્ષે કડક પેરવી કરતા સરકારી વકીલ પ્રેમ આર. તિવારીએ ધારદાર દલીલો રજૂ કરી હતી. તેમણે કોર્ટ સમક્ષ ૧૪ મહત્ત્વના સાક્ષીઓની જુબાનીઓ અને ૬ જેટલા સજ્જડ દસ્તાવેજી પુરાવાઓ રજૂ કરીને ગુનાની ગંભીરતા સાબિત કરી હતી. નામદાર કોર્ટે આ તમામ પુરાવાઓ ગ્રાહ્ય રાખીને આરોપીને કાયદાનું ભાન કરાવતી સજા સંભળાવી છે.
કોર્ટ ચુકાદાના મુખ્ય અંશો
– ચુકાદો આપનાર: સ્પે. પોક્સો જજ પી. પી. પુરોહિત (નડિયાદ)
* સરકારી વકીલ: પ્રેમ આર. તિવારીની સફળ દલીલો
* મુખ્ય સજા: IPC કલમ ૩૬૩ હેઠળ ૪ વર્ષની કેદ અને રૂ. ૨,૫૦૦ દંડ (દંડ ન ભરે તો વધુ ૨ માસની કેદ)
* વિક્ટિમ કોમ્પેન્સેશન: ભોગ બનનાર બાળકીને રૂ. ૫૦,૦૦૦ વળતર ચૂકવવાનો હુકમ
સગીર વયની બાળકીઓની સુરક્ષા અને સામાજિક ન્યાયના પરિપ્રેક્ષ્યમાં પોક્સો કોર્ટનો આ નિર્ણય આવકારદાયક છે. આવા કડક ચુકાદાઓ સમાજમાં સગીરાઓ વિરુદ્ધ ગુનો આચરતા તત્વો માટે એક કડક ચેતવણી સમાન સાબિત થશે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
