Bindia
હિમાચલ પ્રદેશમાં વેસ્ટર્ન ડિસ્ટર્બન્સની તીવ્ર અસરના કારણે પહાડી વિસ્તારોમાં ભારે હિમવર્ષા થઈ રહી છે. રાજ્યના ઊંચાઈવાળા વિસ્તારોમાં કુદરતનું રૌદ્ર સ્વરૂપ જોવા મળી રહ્યું છે. આ સ્થિતિએ અનેક પર્યટન સ્થળોએ ભારેથી અતિભારે સ્નોફોલ નોંધાયો છે.
ખાસ કરીને 7500થી 8000 ફૂટની ઊંચાઈએ આવેલા વિસ્તારોમાં હિમવર્ષાનું તોફાન મચ્યું છે. સોલાંગ વેલી, ચંબા, ખજિયાર, ડેલહાઉસી, તાબો, અટલ ટનલ, રોહતાંગ પાસ અને શિશુ જેવા વિસ્તારોમાં ધોધમાર બરફ વરસી રહ્યો છે. આ સીઝનમાં અત્યાર સુધીમાં અંદાજે 5 ફૂટ જેટલી હિમવર્ષા નોંધાઈ ચૂકી છે. હિમવર્ષાની ગતિ યથાવત્ રહી તો સવાર સુધીમાં કુલ બરફનો થર ૭ ફૂટ સુધી પહોંચવાની શક્યતા છે.
હવામાન વિભાગ (IMD)ની આગાહી અને એલર્ટ
હવામાન વિભાગના સત્તાવાર આંકડા મુજબ હિમાચલ પ્રદેશના ૧૨માંથી મોટાભાગના જિલ્લાઓમાં હવામાનમાં અચાનક ફેરફાર નોંધાયો છે.
– આગાહી: શિમલા, કુલ્લુ, ચંબા અને લાહૌલ-સ્પીતિ જિલ્લામાં આગામી 48 કલાક માટે ભારે વરસાદ અને હિમવર્ષાની આગાહી કરવામાં આવી છે. આ વિસ્તારોમાં ‘યલો એલર્ટ’ અને કેટલાક ભાગોમાં ‘ઓરેન્જ એલર્ટ’ જાહેર કરાયું છે.
– તાપમાનમાં ઘટાડો: સતત હિમવર્ષાના કારણે લઘુત્તમ તાપમાનમાં ૨ થી ૪ ડિગ્રી સેલ્સિયસનો ઘટાડો થયો છે. મનાલી અને કેલોંગમાં તાપમાન માઈનસમાં પહોંચી ગયું છે.
– વેસ્ટર્ન ડિસ્ટર્બન્સની અસર: ઉત્તર પાકિસ્તાન અને અફઘાનિસ્તાન ઉપર સર્જાયેલા વેસ્ટર્ન ડિસ્ટર્બન્સના કારણે ફેબ્રુઆરીની શરૂઆતમાં જ આટલી ભારે હિમવર્ષા થઈ રહી છે.
પ્રશાસનની અપીલ
વહીવટી તંત્રએ પ્રવાસીઓ અને સ્થાનિક લોકોને અટલ ટનલ અને રોહતાંગ પાસ તરફ જતા માર્ગો પર ખાસ સાવચેતી રાખવા અને રાત્રિના સમયે મુસાફરી ટાળવા અપીલ કરી છે. પાંગી વેલી અને અન્ય અંતરિયાળ વિસ્તારોમાં રસ્તાઓ બંધ થવાના અહેવાલો પણ સામે આવી રહ્યા છે.
Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP https://whatsapp.com/channel/0029Va4rXSZ5q08d1AuVRO2I
Instagram: bindia.in
