Bindia
પાકિસ્તાન અને અફઘાનિસ્તાન વચ્ચેનો તણાવ વધુ ઘેરો બન્યો છે. તાલિબાનની આગેવાની હેઠળના અફઘાનિસ્તાનના રક્ષા મંત્રાલયે દાવો કર્યો છે કે પાકિસ્તાની હવાઈ હુમલાના જવાબમાં તેમણે સીમાવર્તી પાકિસ્તાની સૈન્ય ચોકીઓ પર હુમલાઓ કર્યા છે. આ અથડામણમાં પાંચ પાકિસ્તાની સૈનિકો મૃત્યુ પામ્યા હોવાનું કહેવાઈ રહ્યું છે અને કેટલીક ચોકીઓનો કબજો પણ અફઘાન દળોએ લઈ લીધો છે.
તાલિબાનનો આક્રમક પ્રતિસાદ
અફઘાન રક્ષા મંત્રાલયના નિવેદન અનુસાર, આ કાર્યવાહી “પાકિસ્તાન દ્વારા અફઘાન વિસ્તારમાં કરાયેલા બોમ્બ હુમલાના જવાબમાં” કરવામાં આવી છે. તેઓએ દાવો કર્યો કે ડ્યુરન્ડ લાઇન નજીક પાકિતિકા પ્રાંતના મારગી વિસ્તારમાં એક નાગરિક બજાર પર હુમલો કરવામાં આવ્યો હતો, જેને અફઘાનિસ્તાનએ તેના સાર્વભૌમત્વનું ઉલ્લંઘન ગણાવ્યું છે.
“આ ઉશ્કેરણીજનક પગલું છે. અફઘાનની જમીનનું રક્ષણ કરવાનો અમારો અધિકાર છે,” – અફઘાન સંરક્ષણ મંત્રાલય.
હવાઈ હુમલાનો આરોપ અને કડક નિવેદન
તાલિબાને પાકિસ્તાન પર અનધિકૃત હવાઈ પ્રવેશ નો આરોપ લગાવ્યો છે. તેમના જણાવ્યા પ્રમાણે, પાકિસ્તાનના લડાકૂ વિમાનોએ ડ્યુરન્ડ લાઇન નજીક આવેલા પ્રદેશોમાં “નાગરિક વિસ્તારોને નિશાન” બનાવી બોમ્બમારો કર્યો, જેના કારણે સ્થાનિક નાગરિકોમાં ભયનો માહોલ જોવા મળ્યો.
પાકિસ્તાનની હજી સુધી કોઈ સત્તાવાર પ્રતિસાદ નથી
અત્યાર સુધીમાં પાકિસ્તાન તરફથી કોઈ સત્તાવાર નિવેદન બહાર પાડવામાં આવ્યું નથી, પરંતુ તાજેતરમાં પાકિસ્તાનના રક્ષામંત્રી ખ્વાજા આસિફે ચેતવણી આપી હતી કે “જો પાકિસ્તાની દળો પર હુમલો થશે, તો તેનો જવાબ જરૂર અપાશે. હવે બહુ થયું છે.”
કૂટનૈતિક તણાવમાં વધારો – ભારતની મુલાકાત દરમિયાન ટકરાવ
આ સૈન્ય અથડામણ એ સમયે થઈ છે જ્યારે તાલિબાનના વિદેશ મંત્રી અમીર ખાન મુત્તાકી ભારતની મુલાકાતે છે. 9 થી 16 ઓક્ટોબર દરમ્યાન ચાલતી આ મુલાકાત દરમિયાન ભારત અને અફઘાનિસ્તાન બંનેએ પાકિસ્તાન પ્રાયોજિત આતંકવાદ સામે કડક વલણ અપનાવ્યું છે. બંને દેશોએ “સામાન્ય ખતરા” તરીકે આ ઘટના પર ચિંતાઓ વ્યક્ત કરી છે.
“આ સમય દરમિયાન આતંકવાદી પ્રવૃત્તિઓ વધવી માત્ર ઉશ્કેરણી છે, જે સંપૂર્ણપણે અસ્વીકાર્ય છે.” – ભારતીય અધિકારીનું નિવેદન
ભાવિ સંકેત: તણાવ યુદ્ધમાં બદલાઈ શકે?
વિશ્લેષકો માને છે કે જો આ ટકરાવો વધે છે, તો અફઘાન-પાકિસ્તાન સંબંધો વધુ તૂંટવાનો ખતરો ઊભો થઈ શકે છે, અને દક્ષિણ એશિયામાં એક નવી સામરિક અસ્થિરતા સર્જાઈ શકે છે.
