ટ્રમ્પના 'એક ગોળી' નિવેદનથી ઈરાનમાં રોષ, અમેરિકાને આપ્યો કડક જવાબ

અમેરિકા અને ઈરાન વચ્ચેના સંબંધોમાં ફરી એકવાર તણાવ વધ્યો છે. અમેરિકાના રાષ્ટ્રપતિ ડોનાલ્ડ ટ્રમ્પના એક નિવેદન બાદ ઈરાને આકરી પ્રતિક્રિયા આપી છે. ટ્રમ્પે ઈરાનના સર્વોચ્ચ નેતા આયાતુલ્લાહ અલી ખામેનીના અંતિમ સંસ્કારમાં એકત્ર થયેલા ઈરાની નેતાઓનો ઉલ્લેખ કરતાં વિવાદાસ્પદ ટિપ્પણી કરી હતી, જેના કારણે બંને દેશો વચ્ચે રાજદ્વારી તણાવ વધુ ગાઢ બન્યો છે.

ટ્રમ્પના નિવેદનથી વિવાદ
અમેરિકન મીડિયા રિપોર્ટ્સ અનુસાર, ટ્રમ્પે ખામેનીના અંતિમ સંસ્કારમાં મોટી સંખ્યામાં હાજર રહેલા ઈરાની નેતાઓ અંગે કહ્યું હતું કે, “બધા નેતાઓ એક જ જગ્યાએ છે, એક ગોળીથી બધું સમાપ્ત થઈ શકે, પરંતુ અમે એવું નહીં કરીએ કારણ કે પછી વાતચીત કરવા માટે કોઈ નહીં રહે.” ટ્રમ્પે એ પણ આશ્ચર્ય વ્યક્ત કર્યું હતું કે અલી ખામેનીના નિધન બાદ આટલી મોટી સંખ્યામાં લોકો શોક વ્યક્ત કરવા પહોંચ્યા, કારણ કે તેમના મતે ઘણા ઈરાનીઓ ખામેનીના વિરોધમાં હતા.

ઈરાને અમેરિકાને આપ્યો આકરો જવાબ
ટ્રમ્પના નિવેદન બાદ ઈરાને કડક શબ્દોમાં વિરોધ નોંધાવ્યો છે. ઈરાનના સત્તાવાર નિવેદનમાં અમેરિકાની ટીકા કરતાં કહેવામાં આવ્યું કે અમેરિકા ઈરાનની સંસ્કૃતિ, ઈતિહાસ અને પરંપરાઓને સમજી શકતું નથી. નિવેદનમાં કહેવામાં આવ્યું કે, “લોકોને મારી શકાય છે, પરંતુ તેમના વિચારો અને આદર્શોને નહીં. જેને સંસ્કૃતિ, ઈતિહાસ અને સન્માનની સમજ નથી, તે આ લાગણીઓને સમજી શકે નહીં.” ઈરાને દાવો કર્યો કે અલી ખામેની પ્રત્યે લોકોનો આદર અને લાગણી અંતિમ સંસ્કારમાં ઉમટેલી ભીડમાં સ્પષ્ટ જોવા મળી હતી.

અંતિમ સંસ્કારમાં લાખો લોકો ઉમટ્યા
અલી ખામેનીના અંતિમ સંસ્કારને ધ્યાનમાં રાખીને સમગ્ર ઈરાનમાં જાહેર રજા જાહેર કરવામાં આવી હતી. તેહરાનના ગ્રાન્ડ મોસલ્લા કોમ્પ્લેક્સમાં તેમના પાર્થિવ દેહને રાજ્ય સન્માન સાથે રાખવામાં આવ્યો હતો. ઈરાની ધ્વજથી લપેટાયેલી શબપેટી સાથે તેમના પરિવારના અન્ય સભ્યોના પાર્થિવ દેહ પણ રાખવામાં આવ્યા હતા. ઈરાની અધિકારીઓએ દાવો કર્યો છે કે અંતિમ સંસ્કારમાં 1 કરોડથી વધુ લોકો હાજર રહેવાની શક્યતા છે.

અમેરિકા-ઈરાન વચ્ચે તણાવ યથાવત
તાજેતરના નિવેદનો બાદ અમેરિકા અને ઈરાન વચ્ચે પહેલેથી જ તણાવપૂર્ણ રહેલા સંબંધોમાં વધુ કડવાશ આવી છે. બંને દેશો વચ્ચે રાજદ્વારી સંપર્ક ચાલુ હોવા છતાં જાહેર નિવેદનો અને આરોપ-પ્રત્યારોપના કારણે સ્થિતિ વધુ સંવેદનશીલ બની રહી છે. આગામી દિવસોમાં બંને દેશો આ મુદ્દે શું વલણ અપનાવે છે તેના પર આંતરરાષ્ટ્રીય સમુદાયની નજર રહેશે.