નડિયાદ પોક્સો કોર્ટનો ઐતિહાસિક ચુકાદો: સગીરા પર દુષ્કર્મ આચરી ફોટા વાયરલ કરનારને ૨૦ વર્ષની સખત કેદ

– ઘરમાં ઘૂસી નરાધમે આચર્યું હતું પાપ; ઇન્સ્ટાગ્રામ પર ફોટા અપલોડ કરી પીડિતાને કરી હતી બદનામ
– અદાલતે નરાધમને ફટકાર્યો ₹૪૧,૦૦૦નો દંડ; ભોગ બનનાર સગીરાને ₹૧ લાખનું વળતર ચૂકવવા હુકમ

પંકજ મકવાણા – નડિયાદ, બુધવાર:
ખેડા જિલ્લાની સ્પેશિયલ પોક્સો અદાલતે મહિલા સુરક્ષા અને સાયબર ક્રાઇમના આજના યુગમાં એક અત્યંત મહત્વપૂર્ણ અને દાખલારૂપ ચુકાદો સંભળાવ્યો છે. મહેમદાવાદ પંથકમાં સગીરાને ઘરમાં એકલી જોઈ ધમકીના જોરે હવસનો શિકાર બનાવનાર અને ત્યારબાદ તેના ફોટા સોશિયલ મીડિયા પર વાયરલ કરી બ્લેકમેઇલ કરનાર નરાધમ આરોપીને અદાલતે ૨૦ વર્ષની સખત કેદની સજા ફટકારી જેલના સળિયા પાછળ ધકેલી દીધો છે. સ્પેશિયલ પોક્સો જજ પી. પી. પુરોહિતે ગુનાની ગંભીરતાને ધ્યાને રાખી આરોપીને કુલ ₹૪૧,૦૦૦નો દંડ અને પીડિતાને ₹૧ લાખનું આર્થિક વળતર ચૂકવવાનો આદેશ કર્યો છે.

ધમકી આપી અવારનવાર નરાધમ આચરતો હતો દુષ્કર્મ
કેસની વિગતો મુજબ, આ શરમજનક ઘટના મહેમદાવાદ પોલીસ સ્ટેશનની હદમાં આવેલા આકલાચા ગામે બની હતી. ગામમાં જ રહેતો આરોપી હિમંત ઉર્ફે આકલો ઘનશ્યામ શાંતિ પટેલ ફરિયાદીની સગીરવયની દીકરીને ઘરમાં એકલી જોઈ ઘૂસી ગયો હતો. તેણે સગીરાને જાનથી મારી નાખવાની ધમકી આપી પ્રથમ વખત દુષ્કર્મ આચર્યું હતું. ત્યારબાદ, જો આ વાત કોઈને કહેશે તો તેના ફોટા વાયરલ કરી દેવાની ગર્ભિત ધમકીઓ આપીને નરાધમે અવારનવાર પીડિતા પર બળાત્કાર ગુજાર્યો હતો.

ઇન્સ્ટાગ્રામ પર ફોટા અપલોડ કરી વિકૃતિ પ્રદર્શિત કરી
આરોપીની હેવાનિયત અહીં જ ન અટકી, તેણે પીડિતાને સામાજિક રીતે બદનામ કરવાના બદઇરાદાથી પોતાની ઇન્સ્ટાગ્રામ (Instagram) આઇડી પર સગીરાના ફોટા અપલોડ કરી દીધા હતા. આ મામલે પીડિતાના પરિવારે હિંમત દાખવી મહેમદાવાદ પોલીસ મથકે ફરિયાદ નોંધાવતા પોલીસે તાત્કાલિક ધોરણે આઇપીસી, પોક્સો એક્ટ તેમજ આઇટી એક્ટ (IT Act) હેઠળ ગુનો નોંધી આરોપી ‘આકલા’ની ધરપકડ કરી જેલભેગો કર્યો હતો.

સરકારી વકીલ – યોગીબેન બારોટ

૨૨ દસ્તાવેજી પુરાવા અને ૯ સાક્ષીઓની જુબાની
તપાસ અધિકારીએ આ કેસમાં ટેકનિકલ અને સાયન્ટિફિક પુરાવાઓ એકત્ર કરી અદાલતમાં ચાર્જશીટ રજૂ કરી હતી. અદાલતી સુનાવણી દરમિયાન સરકારી વકીલ દ્વારા કોર્ટ સમક્ષ ધારદાર અને કાયદાકીય દલીલો રજૂ કરવામાં આવી હતી. સ્પે. પ્રોસિક્યુટરે ગુનો સાબિત કરવા માટે અદાલત સમક્ષ ૯ મહત્વના સાક્ષીઓની જુબાની અને ૨૨ જેટલા સચોટ દસ્તાવેજી પુરાવાઓ રજૂ કર્યા હતા, જેને નામદાર અદાલતે ગ્રાહ્ય રાખ્યા હતા.

તમામ સજાઓ એકસાથે ભોગવવી પડશે: કોર્ટ
બંને પક્ષોની દલીલો અને પુરાવાઓની ચકાસણી બાદ સ્પેશિયલ પોક્સો જજ પી. પી. પુરોહિતે આરોપી હિમંત ઉર્ફે આકલાને કસૂરવાર ઠેરવી ૨૦ વર્ષની સખત કેદની સજા ફટકારી છે અને સ્પષ્ટ કર્યું છે કે આરોપીએ તમામ સજાઓ એકસાથે ભોગવવાની રહેશે. આ ઉપરાંત, રાજ્ય સરકારના ગૃહ વિભાગના પ્રવર્તમાન ઠરાવને આધીન રહીને, ભોગ બનનાર સગીરાને થયેલા માનસિક આઘાત અને પીડાના વળતર પેટે ₹ ૧ લાખ ચૂકવવાનો પણ અદાલતે ઐતિહાસિક હુકમ કર્યો છે.

 

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276