ગુજરાતમાં MD ડ્રગ્સ ફેક્ટરીનો પર્દાફાશ: કોંગ્રેસ સાથે જોડાયેલા સ્થાનિક નેતાની ATSએ કરી ધરપકડ

ગુજરાત ATSએ વલસાડ જિલ્લાના વાપીમાંથી મોટા ડ્રગ્સ રેકેટનો પર્દાફાશ કર્યો છે. સ્ક્રેપના ગોડાઉનની આડમાં ચાલી રહેલી MD ડ્રગ્સ બનાવવાની ગેરકાયદેસર ફેક્ટરી પર ATSએ દરોડા પાડી બે આરોપીઓની ધરપકડ કરી છે. સમગ્ર મામલે રાજ્યભરમાં ચકચાર મચી ગઈ છે.

વાપીના ગોડાઉન પર ATSની રેડ
ગુજરાત ATSને મળેલી ગુપ્ત બાતમીના આધારે વાપી તાલુકાના સરીગામ વિસ્તારમાં આવેલા એક ગોડાઉન પર દરોડા પાડવામાં આવ્યા હતા. તપાસ દરમિયાન બહાર આવ્યું કે આરોપીઓ ભંગારના વેપારની આડમાં ગેરકાયદેસર રીતે MD ડ્રગ્સનું ઉત્પાદન કરતા હતા. ATSએ સ્થળ પરથી 2.377 કિલો મેફેડ્રોન (MD ડ્રગ્સ) તેમજ 0.658 કિલો શંકાસ્પદ માદક પદાર્થ જપ્ત કર્યો છે. ઉપરાંત ડ્રગ્સ બનાવવા માટે ઉપયોગમાં લેવાતા રસાયણો અને અન્ય સામગ્રી પણ કબજે કરવામાં આવી છે.

કોંગ્રેસ સાથે જોડાયેલા સ્થાનિક આગેવાનની ધરપકડ
ઝડપાયેલા આરોપીઓમાં મેહુલ મકવાણા નામનો વ્યક્તિ કોંગ્રેસ સાથે જોડાયેલો સ્થાનિક આગેવાન હોવાનું સામે આવ્યું છે. મેહુલ મકવાણાએ તાજેતરમાં વાપી મહાનગરપાલિકાની ચૂંટણીમાં વોર્ડ નંબર-2માંથી કોંગ્રેસના ઉમેદવાર તરીકે ચૂંટણી પણ લડી હતી. જોકે ચૂંટણીમાં તેને હારનો સામનો કરવો પડ્યો હતો. પરંતુ હવે ડ્રગ્સ કેસમાં નામ સામે આવતા રાજકીય વર્તુળોમાં ભારે ચર્ચા શરૂ થઈ ગઈ છે.

પાંચ મહિનાથી ચાલતો હતો કારોબાર
ATSની પ્રાથમિક તપાસ અનુસાર આરોપીઓ છેલ્લા પાંચ મહિનાથી વાપીના કુંતાગામ વિસ્તારમાં ભાડે રાખેલા ગોડાઉનમાં MD ડ્રગ્સ બનાવતા હતા. બહારથી ભંગારના ગોડાઉન તરીકે દેખાતા સ્થળે અંદરથી ડ્રગ્સનું ઉત્પાદન ચાલી રહ્યું હતું. આરોપીઓએ એવો માહોલ ઉભો કર્યો હતો કે કોઈને ગેરકાયદેસર પ્રવૃત્તિની શંકા ન જાય.

દમણ અને ઉમરગામ સુધી જોડાણ
આ કેસમાં ઝડપાયેલો અન્ય આરોપી અબ્દુલ કલામ ખાન દમણના ખારીવાડ વિસ્તારનો રહેવાસી હોવાનું જાણવા મળ્યું છે. જ્યારે સમગ્ર રેકેટનો મુખ્ય સૂત્રધાર રાજેશ મૌર્ય હોવાનું ATSની તપાસમાં સામે આવ્યું છે. રાજેશ મૌર્ય ઉમરગામના સરી ગામનો રહેવાસી હોવાનું કહેવાય છે અને હાલ ATS તેની શોધખોળ કરી રહી છે.

NDPS એક્ટ હેઠળ ગુનો નોંધાયો
ગુજરાત ATSએ સમગ્ર મામલે NDPS એક્ટ હેઠળ ગુનો દાખલ કરીને વધુ તપાસ શરૂ કરી છે. હવે આ ડ્રગ્સનો સપ્લાય ક્યાં કરવામાં આવતો હતો, તેમજ સમગ્ર નેટવર્કમાં અન્ય કોણ કોણ સંડોવાયેલા છે તે દિશામાં તપાસ હાથ ધરવામાં આવી રહી છે. વાપી જેવા ઔદ્યોગિક વિસ્તારમાં ડ્રગ્સ બનાવવાની ફેક્ટરી ઝડપાતા સ્થાનિકોમાં પણ ચિંતા ફેલાઈ છે.

 

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276