કાંકરિયા લેક ફ્રન્ટ હવે મુલાકાતીઓ માટે બનશે આકર્ષણનું કેન્દ્ર, સર્જાશે ભવ્ય ઈતિહાસ

અમદાવાદની શાન સમાન કાંકરિયા લેકફ્રન્ટ હવે મુલાકાતીઓ માટે વધુ એક આકર્ષણનું કેન્દ્ર બનવા જઈ રહ્યું છે. એએમસી દ્વારા કાંકરિયા ખાતે અત્યાધુનિક ‘લાઈટ એન્ડ સાઉન્ડ શો’ શરૂ કરવાની યોજના તૈયાર કરવામાં આવી છે, જે અમદાવાદના હેરિટેજ, સંસ્કૃતિ અને વિકાસની ગાથાને આધુનિક ઓડિયો-વિઝ્યુઅલ માધ્યમથી રજૂ કરશે. એએમસીની આ પહેલથી અમદાવાદના નાગરિકો માટે રાતના સમયે હરવા-ફરવાનું વધુ એક આધુનિક અને આકર્ષક સ્થળ તૈયાર થશે. આ શો મુખ્યત્વે નગીનાવાડી ટાપુની આસપાસના આશરે 400 રનિંગ મીટર વિસ્તારમાં આયોજિત કરવામાં આવશે.

– 360-ડિગ્રી વિઝિબિલિટી: શો એવી રીતે ડિઝાઈન કરવામાં આવશે કે તળાવની ચારે બાજુથી એટલે કે પ્રોમેનેડ, બોટિંગ ઝોન અને નગીનાવાડીના વોકવે પરથી પણ મુલાકાતીઓ તેને સ્પષ્ટ રીતે જોઈ શકશે.

– અદ્યતન સાધનોનો ઉપયોગ: આ શોમાં શાર્પી લાઈટ્સ (Sharpy lights), બ્લાઈન્ડર લાઈટ્સ, સિટી કલર ફિક્સ્ચર અને લેસર યુનિટ્સ જેવી હાઈટેક ટેક્નોલોજીનો ઉપયોગ થશે.

– સ્ટોરી-ડ્રિવન કોન્સેપ્ટ: મુલાકાતીઓને માત્ર લાઈટિંગ જ નહીં, પરંતુ એક વાર્તાના સ્વરૂપમાં અમદાવાદનો ભવ્ય વારસો અને ઉત્ક્રાંતિ જોવા મળશે.

મુલાકાતીઓને થનારા લાભ
નવો રોમાંચ: કાંકરિયા ખાતે આવતા સહેલાણીઓ માટે સાંજનો સમય વધુ રોમાંચક બનશે.નવી પેઢી અને પ્રવાસીઓને મનોરંજન સાથે અમદાવાદની ઐતિહાસિક વિગતોની પણ જાણકારી મળશે. આ શો કાંકરિયાને રાષ્ટ્રીય કક્ષાના પ્રવાસન સ્થળ તરીકે સ્થાપિત કરશે, જેનાથી મુલાકાતીઓને આંતરરાષ્ટ્રીય સ્તરનું મનોરંજન મળશે.

એએમસી દ્વારા પસંદ કરાયેલ કન્સલ્ટન્ટ માટે કામગીરીના કડક માપદંડ નક્કી કરવામાં આવ્યા છેઃ

1. ઈકો-ફ્રેન્ડલી ડિઝાઈન: શોની ડિઝાઇન એવી રીતે કરવાની રહેશે કે જેથી તળાવની ઇકોલોજી, પ્રાણી સંગ્રહાલયના પ્રાણીઓ કે વનસ્પતિને કોઈ નુકસાન ન થાય.

2. પાણીમાં કોઈ ઈન્સ્ટોલેશન નહીં: તમામ સાધનો લેકફ્રન્ટની દીવાલો, પેરાફિટ કે રેલિંગ પર જ લગાવવામાં આવશે, પાણીમાં કોઈ પણ પ્રકારનું ફ્લોટિંગ ઈન્સ્ટોલેશન કરવામાં આવશે નહીં.

3. સલામતી અને અવાજ નિયંત્રણ: અવાજનું પ્રદૂષણ રોકવા માટે ડાયરેક્શન-કંટ્રોલ્ડ ઓડિયો સિસ્ટમનો ઉપયોગ થશે, જેથી આસપાસના રહીશોને તકલીફ ન પડે.

4. સમયમર્યાદા: કન્સલ્ટન્ટે ૨૭ અઠવાડિયામાં ડિઝાઇનિંગ, બિડ પ્રોસેસ અને પ્રોજેક્ટ મેનેજમેન્ટની કામગીરી પૂર્ણ કરવાની રહેશે.

 

• Follow us on WHATSAPP :- https://whatsapp.com/channel/0029Va4r…
• WEBSITE : https://bindia.co/
• INSTAGRAM : https:// bindia.in
• FACEBOOK : https://www.facebook.com/buletinindialive 
• X : https://x.com/bindia276