Bindia
બોલિવૂડ અભિનેત્રી Jએક્વેલિન ફર્નાન્ડીઝ ફરી એકવાર ચર્ચિત 200 કરોડ રૂપિયાના મની લોન્ડરિંગ કેસને લઈને ચર્ચામાં આવી છે. બુધવારે અભિનેત્રી નવી દિલ્હીની પટિયાલા હાઉસ કોર્ટમાં વ્યક્તિગત રીતે હાજર થઈ હતી અને કોર્ટ સમક્ષ પોતાનું નિવેદન નોંધાવ્યું હતું. આ દરમિયાન તેમણે તપાસ એજન્સી દ્વારા લગાવવામાં આવેલા તમામ આરોપોને નકારી કાઢતા પોતાને નિર્દોષ ગણાવ્યા હતા.
કોર્ટની કાર્યવાહી પૂર્ણ થયા બાદ જેકલીન કોઈપણ પ્રકારની મીડિયા ચર્ચા કર્યા વગર પોતાના ગંતવ્ય તરફ રવાના થઈ ગઈ હતી. આ સમગ્ર મામલો દેશના સૌથી ચર્ચિત ઠગોમાંના એક સુકેશ ચંદ્રશેખર સાથે જોડાયેલો છે.
તપાસ એજન્સીઓના જણાવ્યા મુજબ સુકેશ ચંદ્રશેખરે એક ઉદ્યોગપતિના પરિવાર પાસેથી અંદાજે 200 કરોડ રૂપિયાની ખંડણી વસૂલી હતી. ત્યારબાદ આ રકમનો મોટો હિસ્સો મોંઘી ભેટો અને લક્ઝરી વસ્તુઓ ખરીદવામાં વપરાયો હોવાના આરોપો છે. તપાસમાં એવો પણ દાવો કરવામાં આવ્યો છે કે જેકલીન ફર્નાન્ડીઝ અને તેમના પરિવારને મોંઘી કાર, ડિઝાઇનર બેગ, હીરાના દાગીના તેમજ અન્ય કિંમતી ભેટો આપવામાં આવી હતી.
આ કેસમાં Enforcement Directorate (ED) દ્વારા દાખલ કરવામાં આવેલી પૂરક ચાર્જશીટમાં જેકલીન ફર્નાન્ડીઝને પણ આરોપી તરીકે સામેલ કરવામાં આવી છે. એજન્સીનું કહેવું છે કે અભિનેત્રીને સુકેશની પૃષ્ઠભૂમિ અને તેની આવકના સ્ત્રોત અંગે જાણ હોવા છતાં તેણે ભેટો સ્વીકારી હતી.
બીજી તરફ, જેકલીનની કાનૂની ટીમે કોર્ટમાં દલીલ કરી હતી કે અભિનેત્રી પોતે આ સમગ્ર કથિત કૌભાંડમાં શિકાર બની છે. વકીલોના જણાવ્યા મુજબ સુકેશે પોતાની સાચી ઓળખ છુપાવીને એક સફળ બિઝનેસમેન તરીકે પોતાને રજૂ કર્યો હતો અને જેકલીનને તેની ગુનાહિત પ્રવૃત્તિઓ વિશે કોઈ જાણકારી નહોતી.
કોર્ટ દ્વારા મુખ્ય આરોપી સુકેશ ચંદ્રશેખર, તેની પત્ની લીના મારિયા પોલ અને અન્ય સહ-આરોપીઓ સામે મની લોન્ડરિંગ કાયદા હેઠળ આરોપો નક્કી કરવામાં આવ્યા છે. જોકે, જેકલીન સહિત તમામ આરોપીઓએ પોતાને નિર્દોષ જાહેર કર્યા છે અને ટ્રાયલનો સામનો કરવાની તૈયારી દર્શાવી છે.
હવે આ હાઈ-પ્રોફાઇલ કેસની આગામી સુનાવણી 16 જુલાઈએ થશે. કેસમાં આગળ શું વળાંક આવે છે તેના પર ફિલ્મ જગત તેમજ દેશભરના લોકોની નજર ટકેલી છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
