અફઘાનિસ્તાન પર પાકિસ્તાનની એર સ્ટ્રાઈકની ભારતે કરી કડક નિંદા, કહ્યું- ‘સાર્વભૌમત્વનું સન્માન જરૂરી’

અફઘાનિસ્તાન પર પાકિસ્તાન દ્વારા કરવામાં આવેલી એર સ્ટ્રાઈકને લઈને ભારતે સખત પ્રતિક્રિયા વ્યક્ત કરી છે. ભારતના વિદેશ મંત્રાલયે આ હુમલાની કડક નિંદા કરતા કહ્યું છે કે અફઘાનિસ્તાનની સાર્વભૌમત્વ અને ક્ષેત્રીય અખંડિતતાનું સંપૂર્ણ સન્માન થવું જોઈએ.

વિદેશ મંત્રાલયના સત્તાવાર પ્રવક્તા રણધીર જયસ્વાલે જણાવ્યું હતું કે ભારત અફઘાનિસ્તાનની ધરતી પર પાકિસ્તાન દ્વારા કરવામાં આવેલા હવાઈ હુમલાઓને સ્વીકારતું નથી અને આ ઘટનાની કડક શબ્દોમાં નિંદા કરે છે. તેમણે ભારપૂર્વક જણાવ્યું કે કોઈપણ દેશે બીજા દેશની સાર્વભૌમત્વ અને પ્રાદેશિક અખંડિતતાનું ઉલ્લંઘન કરવું યોગ્ય નથી.

મીડિયા રિપોર્ટ મુજબ પાકિસ્તાનના હુમલામાં અનેક લોકોના મોત થયા હોવાનું જણાવવામાં આવી રહ્યું છે. આ હુમલામાં કેટલાક ઘરો અને નાગરિક સુવિધાઓને પણ ભારે નુકસાન થયું છે. ભારતે આ ઘટનાને દુઃખદ ગણાવતા કહ્યું કે કોઈપણ સંઘર્ષ દરમિયાન નિર્દોષ નાગરિકોને નિશાન બનાવવું અમાનવીય છે અને આવી ઘટના અસ્વીકાર્ય છે.

ભારતે વધુમાં જણાવ્યું કે આ પ્રકારની કાર્યવાહી અફઘાનિસ્તાનની આંતરિક બાબતોમાં સીધો હસ્તક્ષેપ સમાન છે. આ ઘટનાને પ્રદેશમાં વધતા તણાવ તરીકે પણ જોવામાં આવી રહી છે.

ભારતે ફરી એકવાર આંતરરાષ્ટ્રીય સમુદાય સમક્ષ સ્પષ્ટ કર્યું છે કે અફઘાનિસ્તાનની સાર્વભૌમત્વ અને તેની પ્રાદેશિક અખંડિતતાનો સંપૂર્ણ આદર થવો જોઈએ. પડોશી દેશોએ એકબીજાની સરહદોનું સન્માન કરવું અત્યંત જરૂરી છે જેથી વિસ્તારમાં શાંતિ અને સ્થિરતા જળવાઈ રહી શકે.

Follow us On Social Media
YouTube : https://www.youtube.com/@BIndiaDigital
Website : https://bindia.co/
TWITTER : https://x.com/bindia276
FOLLOW ON WHATSAPP  https://whatsapp.com/channel/0029Va4rXSZ5q08d1AuVRO2I
Instagram:  bindia.in