CA ઇન્ટર પરીક્ષામાં ગુજરાતની સિદ્ધિ, અમદાવાદ અને વડોદરાના વિદ્યાર્થીઓ ચર્ચામાં

દેશની સૌથી પ્રતિષ્ઠિત અને પડકારજનક પરીક્ષાઓમાંની એક ગણાતી CA ઇન્ટરમીડિએટ પરીક્ષાનું પરિણામ જાહેર થતાં ગુજરાતના વિદ્યાર્થીઓએ ફરી એકવાર પોતાની પ્રતિભાનો પરચો આપ્યો છે. મે 2026 સત્રના પરિણામોમાં રાષ્ટ્રીય સ્તરે પાસ ટકાવારીમાં ઘટાડો જોવા મળ્યો હોવા છતાં અમદાવાદ અને વડોદરાના વિદ્યાર્થીઓએ શાનદાર સફળતા મેળવી છે.

અમદાવાદના વિદ્યાર્થીઓએ રાષ્ટ્રીય સ્તરે ચમકાવ્યું નામ
Institute of Chartered Accountants of India દ્વારા જાહેર કરાયેલા પરિણામ મુજબ અમદાવાદના વિદ્યાર્થી Moksh Rathodએ ઓલ ઇન્ડિયા 5મો રેન્ક (AIR 5) પ્રાપ્ત કરીને ગુજરાતનું ગૌરવ વધાર્યું છે. તે જ રીતે અમદાવાદની વિદ્યાર્થીની Stuti Goenkaએ ઓલ ઇન્ડિયા 10મો રેન્ક (AIR 10) મેળવીને દીકરીઓએ ફરી એકવાર પોતાની પ્રતિભા સાબિત કરી છે. ખાસ વાત એ છે કે સમગ્ર દેશના ટોપ-50 વિદ્યાર્થીઓની યાદીમાં અમદાવાદ સેન્ટરના કુલ ત્રણ વિદ્યાર્થીઓએ સ્થાન મેળવ્યું છે.

વડોદરાની દીકરીની સંઘર્ષથી સફળતા સુધીની સફર
પરિણામોમાં સૌથી પ્રેરણાદાયી કિસ્સો વડોદરાથી સામે આવ્યો છે. એક સામાન્ય સ્કૂલ વાન ડ્રાઇવરની પુત્રીએ CA ઇન્ટરમીડિએટ પરીક્ષામાં ઉત્કૃષ્ટ પ્રદર્શન કરીને સમગ્ર શહેરમાં ત્રીજો રેન્ક મેળવ્યો છે. મર્યાદિત આર્થિક પરિસ્થિતિ અને અનેક પડકારો વચ્ચે સતત મહેનત અને સમર્પણના બળે આ વિદ્યાર્થીનીએ સાબિત કર્યું છે કે સફળતા માટે પરિસ્થિતિ નહીં પરંતુ સંકલ્પ મહત્વનો હોય છે.

આ વખતે પરિણામ રહ્યું નિરાશાજનક
મે 2026 સત્રમાં CA ઇન્ટરમીડિએટ ગ્રુપ-1ની પરીક્ષાઓ 5, 7 અને 9 મેના રોજ યોજાઈ હતી, જ્યારે ગ્રુપ-2ની પરીક્ષાઓ 11, 13 અને 15 મેના રોજ લેવામાં આવી હતી. પરિણામના આંકડા મુજબ દેશભરમાં કુલ 33,304 વિદ્યાર્થીઓએ બંને ગ્રુપની પરીક્ષા આપી હતી, જેમાંથી માત્ર 2,820 વિદ્યાર્થીઓ સફળ રહ્યા હતા.

ઓલ ઇન્ડિયા પાસ ટકાવારીમાં ઘટાડો
ગત જાન્યુઆરી સત્રમાં ઓલ ઇન્ડિયા પાસ ટકાવારી 9.39 ટકા હતી, જે મે 2026માં ઘટીને 8.47 ટકા પર પહોંચી ગઈ છે. અમદાવાદ સેન્ટરનું પરિણામ તો વધુ ઘટ્યું છે. જાન્યુઆરીમાં 13.19 ટકા રહેલી પાસ ટકાવારી આ વખતે ઘટીને માત્ર 6.55 ટકા રહી છે.

કડક મૂલ્યાંકન છતાં વિદ્યાર્થીઓનો ઉત્સાહ યથાવત
શૈક્ષણિક નિષ્ણાતોના મતે આ વખતે ICAI દ્વારા મૂલ્યાંકન પ્રક્રિયા વધુ કડક રાખવામાં આવી હતી, જેના કારણે પરિણામ પર અસર જોવા મળી છે. તેમ છતાં સફળ થયેલા વિદ્યાર્થીઓ માટે આ સિદ્ધિ અત્યંત મહત્વપૂર્ણ છે અને હવે તેઓ CA ફાઇનલની તૈયારીમાં જોડાશે. ગુજરાતના વિદ્યાર્થીઓ, ખાસ કરીને દીકરીઓએ મેળવેલી આ સફળતા રાજ્યના અન્ય વિદ્યાર્થીઓ માટે પણ પ્રેરણારૂપ બની છે.