ભાવનગરના મહુવામાં કોળી સેનાના પ્રમુખ મુકેશ ઢાપા પર જીવલેણ હુમલો, CCTV દ્રશ્યો આવ્યા સામે

મહુવા ખાતે કોળી સેનાના પ્રમુખ મુકેશ ઢાપા પર જીવલેણ હુમલાની ઘટના સામે આવતા વિસ્તારમાં ચકચાર મચી ગઈ છે. ઘટનાના CCTV દ્રશ્યો પણ સામે આવ્યા છે, જેમાં કેટલાક શખ્સો દ્વારા મુકેશ ઢાપા પર હુમલો કરવામાં આવ્યો હોવાનું દેખાઈ રહ્યું છે.

પ્રાથમિક માહિતી મુજબ, અગાઉ એક ક્રિકેટ મેચ દરમિયાન થયેલા ઝઘડામાં દીકરાને માર માર્યાની અદાવત રાખીને હુમલો કરવામાં આવ્યો હોવાનું સામે આવ્યું છે. હુમલાખોરોએ મુકેશ ઢાપા પર હુમલો કરતા તેમને બચાવવા વચ્ચે પડેલી તેમની માતા અને પત્નીને પણ માર માર્યો હતો.

આ બનાવમાં અલ્પેશ મકવાણા, સંજય મકવાણા સહિત ત્રણ મહિલાઓ સામે પણ ગુનો નોંધવામાં આવ્યો છે. હુમલા દરમિયાન મુકેશ ઢાપા અને એક મહિલાને ઈજા પહોંચતા તાત્કાલિક સારવાર માટે હોસ્પિટલમાં ખસેડવામાં આવ્યા હતા.

ઘટનાને લઈને મહુવા પોલીસ દ્વારા વધુ તપાસ હાથ ધરવામાં આવી છે. પોલીસ સૂત્રોના જણાવ્યા મુજબ CCTV ફૂટેજના આધારે આરોપીઓને ઝડપી પાડવા કાર્યવાહી શરૂ કરવામાં આવી છે. ઘટનાના CCTV દ્રશ્યો સામે આવતા સમગ્ર વિસ્તારમાં ભારે ચર્ચા જાગી છે, જ્યારે પોલીસે કાયદેસરની કાર્યવાહી આગળ ધપાવી છે.