Bindia
દિલ્હી વિધાનસભાની કુલ 70 બેઠકો માટે મતદાન પૂર્ણ થયા બાદ, ભારતીય જનતા પાર્ટીએ ગુરુવારે એક સમીક્ષા બેઠક યોજી હતી. દિલ્હી ભાજપની ચૂંટણી પછીની સમીક્ષા બેઠકમાં, સંભવિત ચૂંટણી પરિણામોની ચર્ચા કરવામાં આવી હતી. ચર્ચા દરમિયાન પક્ષના નેતાઓએ પોતપોતાના અંદાજો વ્યક્ત કર્યા. ત્યારબાદ પાર્ટીએ 2025ની દિલ્હી વિધાનસભા ચૂંટણીમાં લગભગ 50 બેઠકો જીતવાનો દાવો કર્યો.દિલ્હી ભાજપ પ્રમુખ વીરેન્દ્ર સચદેવાએ જણાવ્યું હતું કે બુધવારે 5 ફેબ્રુઆરી, 2025ના રોજ દિલ્હીના લોકોએ વડા પ્રધાન નરેન્દ્ર મોદીની અપીલ પર રાષ્ટ્રીય રાજધાનીમાં ‘ડબલ એન્જિન’ સરકાર માટે મતદાન કર્યું હતું. જેથી દિલ્હીમાં વિકાસને ઝડપથી પ્રોત્સાહન મળી શકે.
-> દિલ્હીના લોકો AAP સરકારથી નારાજ છે :- બેઠક બાદ તેમણે દાવો કર્યો કે ભાજપ લગભગ ૫૦ બેઠકો જીતશે. અભૂતપૂર્વ પરિણામો બાદ 8 ફેબ્રુઆરીએ ભાજપ દિલ્હીમાં સરકાર બનાવશે. વીરેન્દ્ર સચદેવાએ કહ્યું, “દિલ્હીના લોકો અરવિંદ કેજરીવાલની આગેવાની હેઠળની આમ આદમી પાર્ટીના ભ્રષ્ટાચારથી ભરેલા, અરાજક અને બિનકાર્યક્ષમ શાસનથી કંટાળી ગયા છે. રાષ્ટ્રીય રાજધાનીના લોકોએ AAP સરકાર વિરુદ્ધ નિર્ણાયક મતદાન કર્યું છે.
-> આ નેતાઓએ બેઠકમાં હાજરી આપી હતી :- ગુરુવારે દિલ્હી ભાજપ કાર્યાલયમાં પાર્ટી ઉમેદવારો, તેમના ચૂંટણી એજન્ટો અને જિલ્લા પ્રમુખો પાસેથી પ્રતિસાદ લેવા માટે એક સમીક્ષા બેઠક યોજાઈ હતી. આ બેઠકમાં ભાજપના નેતા શિવ પ્રકાશ, દિલ્હી ભાજપના ચૂંટણી પ્રભારી બૈજયંત જય પાંડા, સહ-પ્રભારી અતુલ ગર્ગ અને પાર્ટીના સાંસદો પણ હાજર રહ્યા હતા.
-> ભાજપ 26 વર્ષથી સત્તાની બહાર છે :- તમને જણાવી દઈએ કે દરેક સ્તરે પ્રયાસો છતાં, ભાજપ 26 વર્ષથી દિલ્હીમાં સત્તાથી બહાર છે. દિલ્હી વિધાનસભાની રચના પછી, ભાજપ 1993 માં પહેલી વાર પોતાની સરકાર બનાવવામાં સફળ રહી. ભાજપ 1998 થી સત્તાની બહાર છે. દરમિયાન, ભાજપ સતત 15 વર્ષ સુધી MCDમાં સત્તામાં રહ્યો. 2022ની MCD ચૂંટણીમાં, ભાજપનો પરાજય થયો અને આમ આદમી પાર્ટીની જીત થઇ. આવી સ્થિતિમાં, વિધાનસભા ચૂંટણીના મતદાન પછીના એક્ઝિટ પોલના પરિણામો ભાજપ તરફના વલણનો સંકેત આપતા પક્ષ માટે રાહતદાયક રહેશે. હવે લોકો ફક્ત એ જોવાની રાહ જોઈ રહ્યા છે કે શનિવારે મતગણતરી પછી ચૂંટણી પરિણામો ભાજપની તરફેણમાં આવે છે કે નહીં.
