કેનેડાના આગામી વડાપ્રધાન તરીકે ભારતીય મૂળના અનિતા આનંદની મજબૂત દાવેદારી

કેનેડાના વડા પ્રધાન જસ્ટિન ટ્રુડોના રાજીનામા બાદ તેમના અનુગામીને લઇને રાજકીય વર્તુળોમાં હલચલ વધુ તેજ બની છે. કેનેડાના આગામી વડાપ્રધાનની રેસમાં અનિતા આનંદ, ક્રિસ્ટિયા ફ્રીલેન્ડ અને માર્ક કાર્ને જેવા અગ્રણી નામો ઉભરી રહ્યા છે. આ પૈકી, ભારતીય મૂળના નેતા અનિતા આનંદને તેમના અસરકારક શાસન અને જાહેર સેવાના સારા રેકોર્ડને કારણે સૌથી મજબૂત દાવેદાર માનવામાં આવે છે. જો અનિતા આનંદ કેનેડાના પીએમ બને છે, તો એવી આશા રાખી શકાય છે કે ભારત સાથે કેનેડાના સંબંધો ફરી સારા બની શકે છે, જે ટ્રુડોના સમયમાં સૌથી નીચા સ્તરે આવ્યા હતા.

કેનેડામાં ભારતીય મૂળના લોકોની નોંધપાત્ર સંખ્યા છે. આ કારણથી ભારતીય મૂળની વ્યક્તિનું પીએમ બનવું ભારત માટે સારા સંકેત આપી શકે છે. આ પહેલા ટ્રુડોના શાસનકાળ દરમિયાન ભારત પર હરદીપ સિંહ નિજ્જરની હત્યાનો ખોટો આરોપ લગાવવામાં આવ્યો હતો, ત્યારબાદ બંને દેશોના સંબંધો બગડ્યા હતા. કેનેડાની સરકારે આ અંગે કોઈ નક્કર પુરાવા રજૂ કર્યા ન હતા. પરિણામ એ આવ્યું કે પાર્ટીના અન્ય નેતાઓ સાથે ટ્રુડોના સંબંધો બગડ્યા. ઘણા લોકોએ તેમના રાજીનામાની માંગ કરી હતી.

-> હું કોઈપણ લડાઈમાંથી પીછેહઠ કરતો નથી :-  ટ્રુડો લગભગ એક દાયકા સુધી કેનેડાના વડા પ્રધાન રહ્યા પછી સોમવારના રોજ તેમના પદ પરથી રાજીનામું આપવાની જાહેરાત કરી. તેમણે તેમના રાજીનામા પાછળના મુખ્ય કારણો તરીકે મતદારોના સમર્થનની ખોટ અને લિબરલ પાર્ટીમાં આંતરિક તકરારનો ઉલ્લેખ કર્યો. ટ્રુડોએ સ્પષ્ટ કર્યું કે પાર્ટીના નવા નેતાની પસંદગી ન થાય ત્યાં સુધી તેઓ વડાપ્રધાન રહેશે. તેમણે કહ્યું, “હું લડાઈમાંથી પીછેહઠ કરતો નથી, ખાસ કરીને જ્યારે તે આપણા દેશ અને પક્ષ માટે મહત્વપૂર્ણ હોય. પરંતુ કેનેડાના લોકોના હિત અને લોકશાહીની સુખાકારી મારા માટે સર્વોપરી છે.

-> વડાપ્રધાન પદ માટે દાવેદારીની રેસ તેજ બની છે :- લિબરલ પાર્ટીમાં આગામી વડાપ્રધાનની રેસ તેજ થઈ ગઈ છે. આને ધ્યાનમાં રાખીને, સંસદનું સત્ર 27 જાન્યુઆરીથી 24 માર્ચ સુધી સ્થગિત કરવામાં આવ્યું છે, જેથી લિબરલ પાર્ટીને તેના નવા નેતાની પસંદગી માટે સમય મળી શકે. આ દરમિયાન વિપક્ષી પાર્ટીઓએ પણ લિબરલ પાર્ટીને પડકારવાની તૈયારીઓ શરૂ કરી દીધી છે, જેના કારણે નવા નેતાની પસંદગી થયા બાદ ચૂંટણી થવાની સંભાવના છે. અનિતા આનંદ એ 5 સંભવિત ઉમેદવારોમાંથી છે,જેઓ કેનેડાના આગામી વડાપ્રધાન બનવાની રેસમાં છે.57 વર્ષીય અનિતા આનંદ હાલમાં દેશના પરિવહન અને ગૃહ મંત્રી તરીકે સેવા આપી રહી છે. તેણીની શૈક્ષણિક અને રાજકીય પૃષ્ઠભૂમિને કારણે, તેણી એક મહત્વપૂર્ણ રાજકીય વ્યક્તિ તરીકે ઉભરી આવી છે. અનિતા આનંદે ક્વીન્સ યુનિવર્સિટીમાંથી પોલિટિકલ સ્ટડીઝ, ઓક્સફોર્ડ યુનિવર્સિટીમાંથી ન્યાયશાસ્ત્રમાં સ્નાતક, ડેલહાઉસી અને યુનિવર્સિટી ઓફ ટોરોન્ટોમાંથી કાયદાની સ્નાતકની ડિગ્રી મેળવી છે. વધુમાં, તેમણે યેલ, ક્વીન્સ યુનિવર્સિટી અને વેસ્ટર્ન યુનિવર્સિટી જેવી પ્રતિષ્ઠિત સંસ્થાઓમાં ભણાવ્યું છે. રાજકારણમાં પ્રવેશતા પહેલા, તે ટોરોન્ટો યુનિવર્સિટીમાં કાયદાના પ્રોફેસર હતા.

-> આ બધાની વચ્ચે બીબીસીએ ભારતીય મૂળના નેતા અનિતા આનંદને 5 ઉમેદવારોમાં ગણ્યા છે જેઓ જસ્ટિન ટ્રુડોનું સ્થાન લઈ શકે છે :

-> અનિતા આનંદ પરિવહન અને ગૃહ મંત્રાલયના મંત્રી :- જસ્ટિન ટ્રુડોનું સ્થાન લઈ શકે તેવા ટોચના પાંચ ઉમેદવારોમાં બીબીસી દ્વારા ભારતીય મૂળની અનિતા આનંદની ગણતરી કરવામાં આવી છે.

-> અનિતા આનંદની પારિવારિક પૃષ્ઠભૂમિ :- અનિતા આનંદનો જન્મ નોવા સ્કોટીયાના કેન્ટવિલેમાં થયો હતો. તેમના માતા-પિતા, સરોજ ડી. રામ અને એસ.વી. (એન્ડી) આનંદ, બંને ભારતીય ચિકિત્સકો હતા. તેમની બે બહેનો ગીતા અને સોનિયા આનંદ પણ પોતપોતાના ક્ષેત્રમાં સફળ છે.

-> રાજકારણમાં પ્રવેશ :- અનિતા આનંદે 2019 માં રાજકારણમાં પ્રવેશ કર્યો અને ત્યારથી તે લિબરલ પાર્ટીના સૌથી મહત્વાકાંક્ષી સભ્યોમાંના એક બની ગયા. તેમણે COVID-19 રોગચાળા દરમિયાન જાહેર સેવાઓ અને પ્રાપ્તિ મંત્રી તરીકે મુખ્ય ભૂમિકા ભજવી હતી, જ્યાં રસી મેળવવાના તેમના પ્રયત્નો માટે તેમની પ્રશંસા કરવામાં આવી હતી. 2021 માં, તેમને કેનેડાના સંરક્ષણ પ્રધાન બનાવવામાં આવ્યા હતા, જ્યાં તેઓએ રશિયા-યુક્રેન યુદ્ધ દરમિયાન યુક્રેનને મદદ કરવામાં મુખ્ય ભૂમિકા ભજવી હતી.