Bindia
SD PAY અને APNA PAY એપથી 634 કરોડના કથિત ફ્રોડમાં ત્રણ મુખ્ય સૂત્રધાર ઝડપાયા, અમરેલી સાયબર સીટ ટીમની મોટી કાર્યવાહી
અમરેલી: SD PAY અને APNA PAY એપ્લિકેશનના માધ્યમથી લોકોને ટૂંકા સમયમાં ઊંચું નાણાકીય વળતર આપવાની લોભામણી જાહેરાતો કરીને રોકાણ કરાવવાના કથિત 634 કરોડ રૂપિયાના ફ્રોડ કેસમાં અમરેલી સાયબર ક્રાઈમની SIT ટીમે વધુ ત્રણ આરોપીઓને ઝડપી પાડ્યા છે. આ સમગ્ર મામલે અમરેલીના પોલીસ અધિક્ષક સંજય ખરાતે પ્રેસ કોન્ફરન્સ યોજીને પોલીસ તપાસની વિગતો જાહેર કરી હતી.
પોલીસના જણાવ્યા અનુસાર, આ કેસમાં અગાઉ છ આરોપીઓની ધરપકડ કરવામાં આવી હતી. જોકે, કથિત નાણાકીય છેતરપિંડીના મુખ્ય સૂત્રધારો સુધી પહોંચવા માટે વિશેષ SIT ટીમની રચના કરવામાં આવી હતી. આ ટીમે તપાસ આગળ ધપાવીને ધવલ ગોવિંદ પટેલ, હિરેન મુકેશ શાહ અને ભાવેશ અરવિંદ ધનેચાની ધરપકડ કરી છે.
-> ત્રણેય આરોપીઓ સામે સંગઠિત રીતે રોકાણ કરાવવાનો આક્ષેપ : પોલીસના જણાવ્યા પ્રમાણે, ત્રણેય આરોપીઓ સહિતના પ્રમોટરો, ડિરેક્ટરો, સંચાલકો, એજન્ટો અને અન્ય અજાણ્યા સહયોગીઓએ એકબીજાની સાથે મળી પૂર્વઆયોજિત ગુનાહિત કાવતરું રચ્યું હોવાનો તપાસમાં ખુલાસો થયો છે.પોલીસનો આક્ષેપ છે કે SD PAY અને APNA PAY એપ્લિકેશન મારફતે લોકોને ટૂંકા સમયમાં અસાધારણ નાણાકીય વળતર મળવાની લાલચ આપવામાં આવતી હતી. આ રીતે લોકોને રોકાણ કરવા માટે પ્રેરિત કરવામાં આવ્યા હતા.પોલીસે અગાઉ આ કેસમાં છ આરોપીઓને ઝડપી પાડ્યા હતા. ત્યારબાદ તપાસમાં મુખ્ય સૂત્રધારોની ભૂમિકા સામે આવતાં તેમને ઝડપી પાડવા માટે વિશેષ SIT ટીમની રચના કરવામાં આવી હતી.
-> રેફરલ સિસ્ટમ મારફતે મોટી સંખ્યામાં લોકોને જોડ્યાનો દાવો : પોલીસ તપાસમાં SD PAY એપ્લિકેશનના એકાઉન્ટ અંગે તપાસ કરતા આરોપીઓ પૈકી એક આરોપીએ પોતાના રેફરલથી પ્રથમ લેવલમાં કુલ 271 લોકોને રોકાણ કરાવ્યું હોવાનું સામે આવ્યું હોવાનું પોલીસનું કહેવું છે.આગળના તબક્કામાં આ લોકોને પણ અલગ-અલગ લેવલ પ્રમાણે રેફરલ કરાવવામાં આવ્યા હોવાનો પોલીસનો દાવો છે. તપાસમાં અંદાજે દોઢથી પોણા બે લાખ જેટલા લોકોને SD PAY સાથે જોડીને રોકાણ કરાવવામાં આવ્યું હોવાની માહિતી મળી હોવાનું અમરેલી પોલીસ દ્વારા જણાવાયું છે.આ રેફરલ આધારિત માળખું કેટલા સમયથી કાર્યરત હતું, તેમાં કેટલા લોકો સીધી કે આડકતરી રીતે જોડાયેલા હતા અને કોની ભૂમિકા શું હતી તે અંગે વધુ તપાસ કરવામાં આવી રહી છે.
પોલીસે SD PAY એપ્લિકેશન અંગે પ્લે સ્ટોર પર તપાસ હાથ ધરતા તેમાં 10 લાખથી વધુ યુઝર જોડાયેલા હોવાની માહિતી સામે આવી હોવાનું જણાવ્યું છે.મોટી સંખ્યામાં યુઝર્સ એપ્લિકેશન સાથે જોડાયેલા હોવાના દાવાને પગલે પોલીસ દ્વારા હવે આ એપ્લિકેશન મારફતે થયેલા વ્યવહારો, રોકાણકારોની સંખ્યા, રેફરલ સિસ્ટમ અને નાણાંની હેરફેર અંગે વધુ વિગતો એકત્ર કરવામાં આવી રહી છે.પોલીસ તપાસનો મુખ્ય હેતુ માત્ર આરોપીઓ સુધી મર્યાદિત ન રાખીને સમગ્ર નાણાકીય વ્યવસ્થાની કડી શોધવાનો હોવાનું પણ જણાવાયું છે.
-> સાત અલગ-અલગ કંપનીઓ ઉભી કર્યાનો આક્ષેપ : પોલીસના જણાવ્યા મુજબ, SD PAY કંપનીમાં લોકો પાસેથી નાણા મેળવવા, નાણાં સગેવગે કરવા અને તેની હેરફેર માટે અલગ-અલગ પ્રાઇવેટ લિમિટેડ કંપનીઓ બનાવવામાં આવી હોવાનો તપાસમાં ખુલાસો થયો છે.પોલીસે જે કંપનીઓના નામ તપાસમાં સામે આવ્યા હોવાનું જણાવ્યું છે તેમાં:
- એસ.ડી. હબ (ઓપીસી) પ્રા. લિ.
- શિવ ધરતી કોમ્યુનિકેશન પ્રાઇવેટ લિમિટેડ
- શિવધરતી ટેકનોલોજી પ્રાઇવેટ લિમિટેડ
- ઉપાય ડિજી પેમેન્ટ ઇન્ડિયા લિમિટેડ
- UPAY DIGI ઈન્ડિયા પ્રાઈવેટ લિમિટેડ
- યુ પેમેન્ટ ઇન્ડિયા લિમિટેડ
- હસ્ટલેનેસ્ટ પ્રાઇવેટ લિમિટેડ
આ કંપનીઓના નામે અલગ-અલગ બેંકોમાં આશરે 18 બેંક ખાતાઓનો ઉપયોગ કરવામાં આવ્યો હોવાનો પોલીસનો દાવો છે.
-> 18 બેંક ખાતામાં 1598 કરોડના વ્યવહારો : SITની તપાસમાં સામે આવેલી માહિતી મુજબ, ઉપરોક્ત બેંક ખાતાઓમાં અંદાજે 1598 કરોડ રૂપિયા જમા થયેલા હોવાનું પોલીસ દ્વારા જણાવાયું છે. આ રકમ કયા સમયગાળા દરમિયાન જમા થઈ, કેટલા લોકો પાસેથી નાણાં મેળવવામાં આવ્યા અને બાદમાં આ રકમ ક્યાં-ક્યાં ટ્રાન્સફર કરવામાં આવી તે અંગે તપાસ ચાલુ છે.નાણાકીય છેતરપિંડીના કેસમાં બેંકિંગ વ્યવહારો મહત્વપૂર્ણ પુરાવા બની શકે છે. તેથી પોલીસ દ્વારા સંબંધિત બેંક ખાતાઓ અને નાણાકીય વ્યવહારોની વિગતો એકત્ર કરવામાં આવી રહી છે.
આ કેસમાં અગાઉ પકડાયેલા છ આરોપીઓના બેંક ખાતાઓ અંગે પણ તપાસ હાથ ધરવામાં આવી છે. પોલીસના જણાવ્યા પ્રમાણે, આ છ આરોપીઓના અલગ-અલગ બેંકોમાં 35થી 40 જેટલા બેંક ખાતાઓ મળી આવ્યા છે.આ તમામ ખાતાઓમાં થયેલા નાણાકીય વ્યવહારોની તપાસ હાલ ચાલુ હોવાનું અમરેલી એસપી સંજય ખરાતે જણાવ્યું હતું. પોલીસ એ પણ તપાસી રહી છે કે આ ખાતાઓનો ઉપયોગ કયા હેતુ માટે કરવામાં આવ્યો હતો અને તેમાં થયેલા વ્યવહારોનો SD PAY તથા APNA PAY સાથે કેટલો સીધો કે પરોક્ષ સંબંધ છે.
-> 18 બેંક ખાતા સામે 195 સાયબર ફ્રોડ ફરિયાદો : SITની તપાસ દરમિયાન કંપનીઓ અને આરોપીઓ સાથે જોડાયેલા અલગ-અલગ બેંક ખાતાઓની NCCRP પોર્ટલ પર તપાસ કરવામાં આવી હતી. પોલીસના જણાવ્યા પ્રમાણે, 18 બેંક ખાતાઓ વિરુદ્ધ કુલ 195 સાયબર ફ્રોડની ફરિયાદો મળી આવી છે.આ ફરિયાદો કયા વિસ્તારોમાંથી નોંધાઈ છે, તેમાં કેટલા લોકો ભોગ બન્યા છે અને ફરિયાદોમાં દર્શાવવામાં આવેલી નાણાકીય રકમ કેટલી છે તે અંગે પણ તપાસ કરવામાં આવી રહી છે.NCCRP પર મળેલી ફરિયાદોને આધારે પોલીસ હવે અલગ-અલગ ફરિયાદદારો સાથે સંપર્ક કરીને સમગ્ર નાણાકીય નેટવર્કની કડીઓ જોડવાનો પ્રયાસ કરી રહી છે.
પોલીસ દ્વારા SD PAY અને APNA PAY એપ્લિકેશનમાં રોકાણ કરનારા અરજદારોનો સંપર્ક કરવાની કામગીરી શરૂ કરવામાં આવી છે. રોકાણકારોના મોબાઇલ પર તેમજ રૂબરૂ નિવેદનો લેવામાં આવી રહ્યા છે.આ ઉપરાંત, આ કેસમાં ભોગ બનનાર સાક્ષીઓનો સંપર્ક કરવા માટે અલગ ટીમ પણ બનાવવામાં આવી છે. તેમને રૂબરૂ અથવા મોબાઇલ મારફતે નિવેદન આપવા માટે બોલાવવામાં આવી રહ્યા છે.રોકાણકારોએ કેટલા રૂપિયા રોક્યા હતા, તેમને કેટલું વળતર મળ્યું હતું કે નહીં, એપ્લિકેશનમાં તેમની સાથે કઈ રીતે વ્યવહાર કરવામાં આવ્યો હતો અને રેફરલ મારફતે અન્ય લોકોને કેવી રીતે જોડવામાં આવ્યા હતા જેવી વિગતો પણ તપાસનો ભાગ બની શકે છે.
->SD PAY વધુ રોકાણકારો અને આરોપીઓ સુધી પહોંચવાનો પ્રયાસ : અમરેલી સાયબર પોલીસની તપાસ હજુ ચાલુ છે. પોલીસ દ્વારા વધુમાં વધુ રોકાણકારોની વિગતો એકત્રિત કરવામાં આવી રહી છે. સાથે જ નાણાંની હેરફેર સાથે સંકળાયેલા લોકો, કંપનીઓ અને બેંક ખાતાઓની કડીઓની તપાસ કરવામાં આવી રહી છે.
634 કરોડ રૂપિયાના કથિત ફ્રોડ મામલે અગાઉ છ આરોપીઓની ધરપકડ બાદ હવે વધુ ત્રણ આરોપીઓની ધરપકડ થતાં તપાસનો વ્યાપ વધ્યો છે. જોકે, કેસમાં નાણાકીય વ્યવહારો, રોકાણકારોની ચોક્કસ સંખ્યા અને દરેક આરોપીની ભૂમિકા અંગે અંતિમ ચિત્ર તપાસ પૂર્ણ થયા બાદ જ સ્પષ્ટ થશે.હાલમાં અમરેલી પોલીસની SIT ટીમ દ્વારા આરોપીઓની પૂછપરછ, બેંક ખાતાઓની તપાસ, NCCRP ફરિયાદોની ચકાસણી તથા રોકાણકારોના નિવેદન લેવાની કાર્યવાહી ચાલી રહી છે. પોલીસ દ્વારા કથિત નાણાકીય નેટવર્કની અન્ય કડીઓ સુધી પહોંચવા માટે તપાસ આગળ ધપાવવામાં આવી રહી છે.
- us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAFollow GRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
