અમેરિકાના ખાસ 1 ડોલરના સોનાના સિક્કા પર ડોનાલ્ડ ટ્રમ્પની તસવીર, નવી ડિઝાઇનને લઈને ચર્ચા તેજ

અમેરિકાની આઝાદીના 250 વર્ષ પૂર્ણ થવાના અવસર પર અમેરિકી સરકાર એક ખાસ સ્મારક સિક્કો બહાર પાડવાની તૈયારી કરી રહી છે. આ 1 ડોલરના 24 કેરેટ સોનાના સિક્કા પર રાષ્ટ્રપતિ ડોનાલ્ડ ટ્રમ્પની તસવીર હશે. અમેરિકાના નાણાં મંત્રી સ્કોટ બેસેન્ટે આ સિક્કાને દેશની આઝાદી અને દેશભક્તિના પ્રતિક તરીકે રજૂ કરવાની વાત કરી છે.

સિક્કા પર હશે ટ્રમ્પની તસવીર અને ખાસ લખાણ
આ સ્મારક સિક્કા પર ડોનાલ્ડ ટ્રમ્પની તસવીર સાથે “Liberty” અને “In God We Trust” જેવા શબ્દો અંકિત કરવામાં આવશે. સાથે જ અમેરિકાની આઝાદીના 250 વર્ષ દર્શાવવા માટે 1776-2026 પણ લખવામાં આવશે. અમેરિકાને 4 જુલાઈ, 1776ના રોજ બ્રિટિશ શાસનથી આઝાદી મળી હતી. આ ઐતિહાસિક ઘટનાની ઉજવણી માટે આ ખાસ સિક્કો તૈયાર કરવામાં આવી રહ્યો છે.

જીવિત રાષ્ટ્રપતિની તસવીર પર ઉઠ્યા સવાલ
ટ્રમ્પની તસવીરવાળા સિક્કાની જાહેરાત બાદ અમેરિકામાં રાજકીય અને કાનૂની ચર્ચા શરૂ થઈ છે. પરંપરાગત રીતે અમેરિકામાં જીવિત રાષ્ટ્રપતિઓની તસવીર ચલણી નાણાં અથવા સિક્કા પર મૂકવામાં આવતી નથી. આ કારણે કેટલાક લોકોનું કહેવું છે કે આ નિર્ણય અમેરિકાની લાંબા સમયથી ચાલતી પરંપરાથી અલગ છે.

ટ્રેઝરી વિભાગે આપ્યો કાયદાનો હવાલો
અમેરિકાના ટ્રેઝરી વિભાગે જણાવ્યું છે કે Circulating Collectible Coin Redesign Act, 2020 હેઠળ દેશની 250મી વર્ષગાંઠ માટે વિશેષ સિક્કા બહાર પાડવાનો અધિકાર આપવામાં આવ્યો છે. નાણાં મંત્રી સ્કોટ બેસેન્ટના જણાવ્યા મુજબ, આ જ કાયદાકીય જોગવાઈ હેઠળ સિક્કાની ડિઝાઇનને મંજૂરી આપવામાં આવી છે.

અગાઉ પણ બહાર પાડવામાં આવ્યો હતો ખાસ સિક્કો
ટ્રેઝરી વિભાગે પોતાના નિર્ણયના સમર્થનમાં અમેરિકાના ઇતિહાસનો ઉલ્લેખ કર્યો છે. વર્ષ 1926માં અમેરિકાની 150મી વર્ષગાંઠ દરમિયાન તત્કાલીન રાષ્ટ્રપતિ કેલ્વિન કૂલિજની તસવીર ધરાવતો સ્મારક સિક્કો બહાર પાડવામાં આવ્યો હતો. સરકારનું કહેવું છે કે આ ઉદાહરણને ધ્યાનમાં રાખીને ટ્રમ્પની તસવીરવાળા સિક્કાને મંજૂરી આપવામાં આવી છે.

સિક્કાને લઈને રાજકીય ચર્ચા ચાલુ
ટ્રમ્પની તસવીર ધરાવતા આ સ્મારક સિક્કાને કેટલાક લોકો ઐતિહાસિક ઉજવણીનો ભાગ ગણાવી રહ્યા છે, જ્યારે કેટલાક લોકો તેને રાજકીય નિર્ણય તરીકે જોઈ રહ્યા છે.