સુરતમાં કુદરતનો કહેર: અનેક વિસ્તારો જળમગ્ન, ગળાડૂબ પાણીમાંથી 193થી વધુ નાગરિકોનું રેસ્ક્યૂ

દક્ષિણ ગુજરાતમાં છેલ્લા બે દિવસથી વરસી રહેલા અતિભારે વરસાદે સુરત જિલ્લામાં જનજીવનને ગંભીર રીતે પ્રભાવિત કર્યું છે. સતત ધોધમાર વરસાદને કારણે શહેર તેમજ ગ્રામ્ય વિસ્તારોમાં પાણી ભરાઈ જતાં અનેક વિસ્તારો જળમગ્ન બન્યા છે. નીચાણવાળા વિસ્તારોમાં લોકો ઘરોમાં જ ફસાઈ ગયા હતા, જેના પગલે SDRF, NDRF અને સ્થાનિક તંત્ર દ્વારા વ્યાપક બચાવ કામગીરી હાથ ધરવામાં આવી છે.

ગળાડૂબ પાણીમાંથી નાગરિકોને સુરક્ષિત સ્થળે ખસેડાયા
સુરતના પાંડેસરા વિસ્તારના કૃષ્ણનગર અને ગઢા નગરમાં પાણી ભરાતા 150થી વધુ નાગરિકો ગળાડૂબ પાણીમાં ફસાઈ ગયા હતા. SDRFની ટીમે સ્થળ પર પહોંચી સફળ રેસ્ક્યૂ ઓપરેશન ચલાવી તમામ લોકોને સુરક્ષિત સ્થળે ખસેડ્યા. આ ઉપરાંત મીઠી ખાડી વિસ્તારમાં પાણીમાં ફસાયેલા 71 પુરુષ, 53 મહિલા અને 19 બાળકો સહિત કુલ 143થી વધુ નાગરિકોને NDRFની ટીમે બચાવી સુરક્ષિત સ્થળે પહોંચાડ્યા. ભારે વરસાદ વચ્ચે બચાવ દળોએ સતત કામગીરી ચાલુ રાખી છે.

સુરતમાં છેલ્લા 24 કલાકનો વરસાદ
છેલ્લા 24 કલાક દરમિયાન સુરત જિલ્લાના વિવિધ તાલુકાઓમાં નોંધાયેલ વરસાદ આ મુજબ રહ્યો છે:
– પલસાણા – 18.19 ઇંચ
– કામરેજ – 17.40 ઇંચ
– સુરત સિટી – 14.09 ઇંચ
– બારડોલી – 9.37 ઇંચ
– અંબિકા – 9.25 ઇંચ
– મહુવા – 8.86 ઇંચ
– ઉમરપાડા – 6.34 ઇંચ
– ચોરાસી – 6.26 ઇંચ
– માંડવી – 4.88 ઇંચ

જનજીવન પર ભારે અસર
ભારે વરસાદને કારણે અનેક માર્ગો પાણીમાં ગરકાવ થઈ ગયા છે. રહેણાંક વિસ્તારોમાં પાણી ઘૂસી જતાં લોકોને મુશ્કેલીઓનો સામનો કરવો પડી રહ્યો છે. નીચાણવાળા વિસ્તારોમાં હજુ પણ પાણી ભરાયેલા હોવાથી તંત્ર દ્વારા લોકોને સાવચેત રહેવા અને જરૂરી ન હોય તો બહાર ન નીકળવાની અપીલ કરવામાં આવી છે. હવામાન વિભાગે આગામી કલાકોમાં પણ દક્ષિણ ગુજરાતમાં ભારે વરસાદની શક્યતા વ્યક્ત કરી છે. સ્થિતિને ધ્યાનમાં રાખીને તંત્ર એલર્ટ મોડ પર છે અને બચાવ તેમજ રાહત કામગીરી સતત ચાલુ રાખવામાં આવી રહી છે.