લખનઉમાં કોચિંગ સેન્ટર-ગેમિંગ ઝોનમાં આગ લાગતાં 15 યુવાનોના મોત, દેશમાં શોક

ઉત્તર પ્રદેશની રાજધાની લખનઉના અલીગંજ વિસ્તારમાં પુરનિયા ચોરાહા પાસે આવેલી એક ઈમારતમાં સોમવારે ભયાનક આગ લાગવાની ઘટના સામે આવી છે. આ દુર્ઘટનામાં અત્યાર સુધીમાં 15 લોકોના મોત થયા છે, જેમાં મોટાભાગે 20થી 24 વર્ષની વયના યુવાનો હોવાનું જાણવા મળ્યું છે. ઘટનાને પગલે સમગ્ર વિસ્તારમાં શોકનો માહોલ છે.

ગેમિંગ ઝોનમાંથી શરૂ થઈ આગ, આખી ઈમારત ઝપટમાં
પ્રાથમિક માહિતી મુજબ આ ઈમારતમાં ગ્રાઉન્ડ ફ્લોર પર પેટ શોપ અને ઉપરના માળે ગેમિંગ ઝોન કાર્યરત હતો. શરૂઆતમાં આ આગ કોચિંગ સેન્ટર સાથે જોડાયેલી હોવાનું માનવામાં આવતું હતું, પરંતુ બાદમાં પોલીસ અધિકારીઓએ સ્પષ્ટ કર્યું કે આગ ગેમિંગ ઝોનમાંથી શરૂ થઈ હતી અને પછી ઝડપથી આખી બિલ્ડિંગમાં ફેલાઈ ગઈ. આ દરમિયાન કર્મચારીઓ અને હાજર લોકો અચાનક ફેલાયેલા ધુમાડામાં ફસાઈ ગયા હતા, જેના કારણે બહાર નીકળવાનો રસ્તો બંધ થઈ ગયો હતો.

જીવ બચાવવા લોકોએ લગાવી છલાંગ
આગ અને ધુમાડાના કારણે ઈમારતમાં અફરાતફરી મચી ગઈ હતી. કેટલાક લોકો પોતાનો જીવ બચાવવા માટે ઉપરના માળેથી છલાંગ લગાવતા જોવા મળ્યા હતા. એક વ્યક્તિ ગંભીર રીતે ઈજાગ્રસ્ત થઈને હોસ્પિટલમાં સારવાર હેઠળ છે. ફાયર બ્રિગેડની 14થી વધુ ગાડીઓએ ભારે જહેમત બાદ આગ પર કાબૂ મેળવ્યો હતો. હાલ ઘટનાસ્થળે રાહત અને બચાવ કામગીરી ચાલુ છે.

પીએમ મોદીની સંવેદના અને આર્થિક સહાયની જાહેરાત
વડાપ્રધાન નરેન્દ્ર મોદીએ આ ઘટનાને લઈને ઊંડો શોક વ્યક્ત કર્યો છે. તેમણે કહ્યું કે આ ઘટના અત્યંત દુઃખદ છે અને ઈજાગ્રસ્તો ઝડપથી સાજા થાય તેવી કામના કરી છે. સાથે જ PMNRF તરફથી મૃતકોના પરિવારજનોને ₹2 લાખ અને ઈજાગ્રસ્તોને ₹50,000ની આર્થિક સહાય આપવાની જાહેરાત કરવામાં આવી છે.

સીએમ યોગી એક્શનમાં, ઉચ્ચ સ્તરીય તપાસના આદેશ
મુખ્યમંત્રી યોગી આદિત્યનાથે ઘટનાની ગંભીર નોંધ લઈ તમામ કાર્યક્રમો રદ કર્યા છે. તેમણે ઉચ્ચ સ્તરીય તપાસના આદેશ આપ્યા છે અને સ્પષ્ટ કહ્યું છે કે દોષિતો સામે કડક કાર્યવાહી કરવામાં આવશે. નાયબ મુખ્યમંત્રી બ્રજેશ પાઠકે જણાવ્યું કે ઘટનાની તપાસ માટે ટીમો રચવામાં આવી છે અને વહીવટીતંત્ર સતત સ્થળ પર હાજર છે.

દેશભરમાં શોકની લાગણી
આ દુર્ઘટનાને લઈને રક્ષામંત્રી રાજનાથ સિંહ, કોંગ્રેસ નેતા રાહુલ ગાંધી, બસપા નેતા માયાવતી અને અન્ય અનેક નેતાઓએ શોક વ્યક્ત કર્યો છે. તમામે પીડિત પરિવારો પ્રત્યે સંવેદના પાઠવી છે. આ ઘટનાએ ફરી એકવાર શહેરી વિસ્તારોમાં ચાલતા કોચિંગ સેન્ટર અને ગેમિંગ ઝોનની સુરક્ષા વ્યવસ્થાઓ પર ગંભીર પ્રશ્નો ઊભા કર્યા છે.