Bindia
રાજસ્થાનના બીકાનેર જિલ્લામાં સોમવારે એક હૃદયદ્રાવક માર્ગ અકસ્માત સર્જાયો હતો. શ્રીડુંગરગઢ નજીક નેશનલ હાઈવે પર સીઝરાલ હોટલ પાસે કાર અને ટ્રક વચ્ચે થયેલી સામસામેની ભીષણ ટક્કરમાં 6 લોકોના મોત થયા છે, જ્યારે એક યુવતી ગંભીર રીતે ઘાયલ થઈ છે. મળતી માહિતી મુજબ, પૂરઝડપે દોડી રહેલી કાર અને ટ્રક વચ્ચે અચાનક સામસામે અથડામણ થતાં અકસ્માત સર્જાયો હતો. ટક્કર એટલી જોરદાર હતી કે કારનો કચ્ચરઘાણ નીકળી ગયો હતો. કારમાં સવાર 6 લોકોના ઘટનાસ્થળે જ મોત થયા હોવાનું જણાવવામાં આવ્યું છે.
અકસ્માત બાદ સ્થાનિક લોકો તાત્કાલિક બચાવ કામગીરીમાં જોડાયા હતા. ઘટનાની જાણ થતાં એમ્બ્યુલન્સ અને ટોલ પ્લાઝાની ઇમરજન્સી ટીમ પણ સ્થળ પર પહોંચી હતી. સેવાદારો અને સ્થાનિક લોકોની મદદથી કારમાં ફસાયેલા લોકોને બહાર કાઢવામાં આવ્યા હતા. અકસ્માતમાં ગંભીર રીતે ઘાયલ થયેલી યુવતીને પ્રાથમિક સારવાર આપ્યા બાદ વધુ સારવાર માટે બીકાનેરની હોસ્પિટલમાં રિફર કરવામાં આવી છે. તબીબોના જણાવ્યા મુજબ તેની હાલત નાજુક છે.
મૃતકોમાં ત્રણ પુરુષ, એક મહિલા અને એક યુવતીનો સમાવેશ થાય છે. પોલીસ ઘટનાસ્થળે પહોંચી તપાસ શરૂ કરી છે. પ્રાથમિક તપાસમાં અકસ્માતનું કારણ વધુ ઝડપ અને સામસામેની ટક્કર હોવાનું માનવામાં આવી રહ્યું છે. જોકે, અકસ્માતના ચોક્કસ કારણો જાણવા માટે પોલીસે વધુ તપાસ હાથ ધરી છે.
એક જ અકસ્માતમાં 6 લોકોના મોત થતાં સમગ્ર વિસ્તારમાં શોકનો માહોલ છવાઈ ગયો છે. મૃતકોની ઓળખ કરવાની અને તેમના પરિવારજનોને જાણ કરવાની પ્રક્રિયા ચાલી રહી છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
