Bindia
લેબનાનમાં જાહેર થયેલા સીઝફાયર છતાં ઇઝરાયેલ અને હિઝબુલ્લાહ વચ્ચેનો તણાવ સતત વધી રહ્યો છે. ઇઝરાયેલ સંરક્ષણ દળો (IDF) એ દાવો કર્યો છે કે છેલ્લા કેટલાક દિવસોમાં દક્ષિણ લેબનાનમાં ચલાવવામાં આવેલા ઓપરેશન દરમિયાન હિઝબુલ્લાહના 220થી વધુ આતંકીઓ તેમજ અનેક કમાન્ડરોને ઠાર કરવામાં આવ્યા છે. IDF દ્વારા આ કાર્યવાહીનો વીડિયો પણ જાહેર કરવામાં આવ્યો છે, જેમાં હિઝબુલ્લાહના ઠેકાણાઓ પર નિશાનાબંધ હવાઈ હુમલાઓ દેખાઈ રહ્યા છે.
સીઝફાયરના ઉલ્લંઘનનો આરોપ
ઇઝરાયેલનું કહેવું છે કે આ હુમલાઓ એવા તત્વો સામે કરવામાં આવ્યા હતા, જે ઇઝરાયેલના નાગરિકો અને સૈનિકો માટે સીધો ખતરો બની રહ્યા હતા. IDF એ જણાવ્યું કે દક્ષિણ લેબનાનમાં હિઝબુલ્લાહની સૈન્ય ગતિવિધિઓ પર સતત નજર રાખવામાં આવી રહી છે અને સુરક્ષા માટે જરૂરી કાર્યવાહી ચાલુ રહેશે. ઇઝરાયેલના દાવા મુજબ, હવાઈ હુમલાઓ દરમિયાન હિઝબુલ્લાહના અનેક કમાન્ડ સેન્ટરો, હથિયાર ભંડારો અને મહત્વના સૈન્ય ઠેકાણાઓને પણ નિશાન બનાવી નષ્ટ કરવામાં આવ્યા છે.
બેરૂતમાં તાજા હુમલાથી જાનહાનિ
બીજી તરફ, ગુરુવારે ઇઝરાયેલે બેરૂતના દક્ષિણ ઉપનગર દહિયેહ સહિત દક્ષિણ લેબનાનના અનેક વિસ્તારોમાં ફરી હુમલા કર્યા હતા. લેબનાનના આરોગ્ય મંત્રાલય અનુસાર, દહિયેહ વિસ્તારમાં થયેલા હુમલામાં ઓછામાં ઓછા 2 લોકોના મોત થયા છે જ્યારે 7 લોકો ઘાયલ થયા છે.
લેબનાન સરકારે આ હુમલાઓને સીઝફાયર કરારનું ખુલ્લું ઉલ્લંઘન ગણાવ્યું છે. વધતા હુમલાઓને કારણે વિસ્તારમાં ફરીથી યુદ્ધ જેવી સ્થિતિ સર્જાવાની ભીતિ વ્યક્ત કરવામાં આવી રહી છે.
વિસ્તારમાં વધ્યો તણાવ
સીઝફાયર બાદ પણ બંને પક્ષો વચ્ચે અથડામણો અને હવાઈ હુમલાઓ ચાલુ રહેતા મધ્ય પૂર્વમાં ફરી અસ્થિરતા વધવાની શક્યતા વ્યક્ત થઈ રહી છે. આંતરરાષ્ટ્રીય સમુદાય દ્વારા બંને પક્ષોને સંયમ રાખવા અને શાંતિ જાળવવા અપીલ કરવામાં આવી રહી છે.
- Follow us on WHATSAPP :- https://whatsapp.com/channel/0029Va4r…
- WEBSITE : https://bindia.co/
- INSTAGRAM : https:// bindia.in
- FACEBOOK : https://www.facebook.com/buletinindialive
- X : https://x.com/bindia276
